Domingo sasalang na sa Chargers kontra HD Spikers

ni Gerard Arce @Sports | February 24, 2024

Mga laro ngayong Sabado (Araneta Coliseum)

2 n.h. – Chery Tiggo vs Strong Group

4 n.h. – Cignal vs Akari

6 n.g. – Creamline vs Farm Fresh 

Ipaparada ng Akari Chargers ang kanilang mga bagong manlalaro kabilang si pro-league multi-titlist Celine “Ced” Domingo matapos magsimulang makapag-ensayo sa koponan kasunod ng pagiging free agent nitong nakaraang buwan para sa paghahanda sa kanilang unang salang sa 8th Premier Volleyball League (PVL) All-Filipino Conference ngayong hapon sa Araneta Coliseum.

Matapos matagumpay na mapagwagian ang kampeonato para sa Nakhon Ratchasima Cat Devils sa Women’s Volleyball Thailand League Championship, agad na umuwi ng bansa si Domingo upang samahan ang kanyang bagong koponan sa kanyang unang ensayo para sa nakatakdang laro kontra sa Cignal HD Spikers sa 2nd game ng 4 p.m. habang hahanapin ng Chery Tiggo Crossovers ang kanilang ikalawang sunod na panalo laban sa bagong koponan na Strong Group Athletics sa 2 p.m. 

Matutunghayan ang pagsisimula ng pagdepensa ng reigning champions na Creamline Cool Smashers kontra sa mas pinalakas na Farm Fresh Foxies sa pinakatampok na laro ng 6 p.m.

Naging malaking tulong ang 24-anyos na dating Far Eastern University Lady Tamaraws sa kampanya ng Cat Devils na madepensahan ang kanilang kampanya sa paglista ng 5 puntos tungo sa 25-18, 25-17, 25-18 laban sa Diamond Food Fine Chef nitong Linggo sa Nimibutr Stadium sa Bangkok, Thailand.

Sa inilabas na post ng kakampi na si Fifi Sharma sa social media ay mabilis na bumalik ng Pilipinas ang 2022 Invitational Conference Finals MVP, suot ang No.13 jersey nito.

Nagsimula na sa kanyang drills sa blocking si Domingo kasabay sina Christine Soyud at Gretchel Soltones, habang masaya itong sinalubong at binati ng kanyang mga kakampi sa pagpasok sa koponan na binigyan ng kaunting pagkilala.   

Boksing at wrestling hinasa ni Brooks sa ONE

ni Gerard Arce @Sports | February 24, 2024

Isinantabi lahat ni dating World champion Joshua “The Passion” Pacio ang lahat ng masasayang plano at patuloy na nagpursige sa pagpapaunlad ng kanyang kasanayan sa boksing at wrestling upang paghandaan ang nalalapit na rematch laban kay ONE Strawweight champion Jarred “The Monkey God” Brooks ng U.S. sa ONE 166 sa Marso 1 sa Lusail Sports Arena sa Lusail, Qatar.

Determinado ang Lions Nation MMA fighter na mabawi ang nawalang titulo sa American fighter na dumaig sa kanya sa bisa ng 5th round unanimous decision sa jampacked na MOA Arena sa Pasay City nung ONE 164 noong Dis. 3, 2022, kung saan nanlumo ang mahigit sa 20,000 manonood sa pagbabalik ng MMA event sa Pilipinas para putulin ang three-fight title defense ng 28-anyos mula La Trinidad, Benguet.

Todo ang paghahasa ni Pacio sa boksing at wrestling na parte umano ng naging kakulangan nito sa laban kay Brooks sa kanilang unang pagtatapat, kung saan makailang ulit na dinala sa grounds ng 30-anyos mula Detroit, Michigan si Pacio para magamit ang kanyang kahusayan sa wrestling na minsang naglaro sa NCAA Division II at nagtala ng 35-0 para makuha ang state championships. Sa naturang tagpo rin ay nahigitan ni Brooks si Pacio pagdating sa striking gamit ang kanyang kaalaman sa boksing, kahit na nailabas ng dating Team Lakay fighter ang kanyang mga kilalang atake at estilo.

Inaasahan umanong magiging mas agresibo ang atake ni Pacio laban kay Brooks matapos kakitaan ng pagkabagal sa laro ito sa unang paghaharap ng katigan ng tatlong hurado si Brooks na tatlong beses na matagumpay na nai-takedown si Pacio sa una, ikaapat at huling round, habang nagpamalas ito ng malulutong na kumbinasyong suntok at paminsan-minsan na nagpapakawala ng sipa.

De Leon at Canino, bumida sa Lady Spikers vs. Tams

ni Gerard Arce @Sports | February 22, 2024

Mahusay ang pagkakasalo sa floor defense ni Lyka May De Leon para sa DLSU Lady Spikers upang mapalaso ang pagsugod ng FEU Lady Tamaraws para sa panibagong pangwawalis sa straight set 25-20, 25-17, 25-22, kahapon, sa unang laro ng 86th  UAAPwomen’s volleyball tournament sa Araneta Coliseum.

Matagumpay na napalitan ng sophomore libero na si De Leon ang pwestong iniwan ni Justine Jazareno na tumuntong ng professional league para itala ang double-double sa kabuuang 16 excellent digs para dalhin ang defending at reigning champions La Salle sa maagang liderato, 2-0 kartada.

Patuloy na nanguna sa puntusan si reigning Rookie/MVP Angel Anne Canino sa paglista ng 13 puntos mula sa 11 atake.  Nag-ambag din si towering spiker Shevana Laput ng 10 puntos mula sa 8 kills at 2 blocks, habang may 8  puntos sina middle blocker Thea Gagate mula sa 5 atake. “Medyo nag-struggle nga kasi sobrang erratic, parang tentative yung galaw nila. Pinaalalahanan lang namin na bumalik sa sistema,” saad ni assistant coach Noel Orcullo na hindi kuntento sa laro ng Lady Spikers.

Walang manlalaro sa Lady Tamaraws ang tumapos sa doble pigura nang lumista si Gerzel Petallo ng 7  puntos mula lahat sa atake kasama ang 10 excellent receptions at 8 excellent digs, habang may tig-anim na puntos sina Faida Bakanke at Ched Tagaod. May 6  puntos na ambag si Alyzza Devosora sa apat na atake at tig-isang ace at block kasama ang 7 digs at 4 receptions, samantalang mayg 11 excellent sets  si Tin Ubaldo.