Undefeated Apolinario pinatumba ang Thai boxer

ni Gerard Arce @Sports | February 27, 2024

Hindi tulad ng nalasap ng dalawang kababayang Pinoy sa Japan, napanatili ni dating International Boxing Organization (IBO) flyweight champion Dave “Dobermann” Apolinario ang kanyang malinis na kartada ng patumbahin ang Thai boxer Tanes Ongjunta sa bisa ng fourth round knockout nitong nagdaang Huwebes sa Korakuen Hall sa Bunkyo, Tokyo.

Nalampasan ni Apolinario ang third-round knockdown upang samantalahin ang kapaguran ni Ongjunta ng bumitaw ito ng malutong na kaliwang straight na nagpatumba sa Thai boxer. Nagawa pang makatayo sa ito sa bilang ni referee Yuji Fukuchi, subalit hindi pinalampas ni Apolinario ang pagkakataon na banatan ng husto ang katunggali sa pamamagitan ng power punches kabilang ang pantapos na kanang uppercut upang tuluyang itigil ang laban sa 1:44 ng ika-apat sa nakatakdang 8 round.

Dahil sa panalo ay lalo pang iniangat ang kartada nito sa 20-0 kasama ang 14 panalo mula sa knockout habang nakatakdang maghanda ito para sa World Boxing Association (WBA) flyweight title na tangan-tangan ni Seigo Yuri Akui ng Japan na nagawa namang maagaw ang korona kay Artem Dalakian ng Ukraine sa bisa ng 12-round unanimous decision nitong nagdaang Enero 23 sa Edion Arena sa Osaka, Japan.

Inamin ng promoter at manager ni Apolinario na si Jim Claude Manangquil na naging pabaya ito sa kanyang laban kaya’t inabot ng kanang suntok ni Ongjunta, dahilan ng mainit na palitan ng suntok sa gitna ng ring na nagresulta rin sa pagsasalubong ng ulo ng bawat boksingero upang magtamo ng cut ang Thai boxer.

Ito ang ikalawang sunod na panalo ni Apolinario sa Japan ng naunang tinalo si Mexican Brian Mosinos sa eight-round unanimous decision noong Agosto 30, 2023, na sinundan ng pagpapasuko sa parehong taon kay Indonesian Frengky Rohi noong Pebrero 11 General Santos City.

Ancajas nabigo sa WBO title vs. Inoue, bumigay sa 9th rnd

ni Gerard Arce @Sports | February 26, 2024

Hindi pinalad na makuha ni dating World champion Jerwin “Pretty Boy” Ancajas ang kanyang ikalawang pagsubok sa kampeonato matapos sumuko sa ika-siyam na round laban kay reigning at defending World Boxing Association (WBA) bantamweight titlist Takuma Inoue matapos masapol ng malakas na upak sa bodega sa 12-round main event bout ng “Prime Video Presents Live Boxing 7” Sabado ng gabi sa Ryogoku Kokugikan National Sumo Arena sa Sumida City sa Tokyo, Japan.

Nagtapos ang pag-asang magtagumpay muli sa ikalawang weight division si Ancajas kasunod ng pagyuko nito sa bilang ni referee Mark Nelson sa 44 segundo ng naturang round matapos tamaan ng kanang uppercut sa sikmura kasunod ng ilang palitan ng suntok upang malasap ang ikaapat na pagkatalo kasama ang 34 panalo at dalawang table, habang nakuha ni Inoue ang kanyang ika-anim na sunod na panalo kabilang ang matagumpay na unang depensa sa naunang bakanteng titulong napanalunan kay Liborio Solis ng Venezuela nung isang taon.

Ito ang unang beses na napatumba ang 32-anyos mula Panabo City, Davao del Norte sa isang laban na unang beses ring sumabak sa bansang Japan, para malasap ang kanyang ika-apat na pagkabigo matapos mabitawan ang kanyang International Boxing Federation (IBF) super-flyweight laban kay Fernando “Pumita” Martinez ng Argentina sa dalawang beses na paghaharap nung 2022.

Nagmistulang hindi umepekto ang plano ng mas malaki at mas matangkad na Pinoy boxer na pinuntiryang patamaan sa simula pa lamang ng laban ang bodega at tagiliran ng nakababatang Inoue, kapatid ni undefeated at undisputed junior-featherweight champion na si “The Monster” Naoya Inoue.

Subalit sa pagpilit na ituloy ang kanyang planong tamaan ang katawan ni Inoue, kung saan naging dahilan ng pagkakaudlot ng unang laban nung Nobyembre 15, 2023 dahil sa nakuha umanong rib injury sa ensayo.

Crossovers sakalam sa 2nd win, SGA tinalo

ni Gerard Arce @Sports | February 25, 2024

Mga laro sa Martes (Philsports Arena)

4 n.h. – NXLed vs PLDT

6 n.g. – PLDT vs Choco Mucho 

Hindi nagpaawat sa mabilis na ratsada ang Chery Tiggo Crossovers upang ikamada ang ikalawang sunod na panalo para sa maagang liderato matapos sagasaan ang baguhang Strong Group Athletics sa bisa ng straight set sa 25-12, 25-17, 25-19, sa unang laro ng nakalatag na triple-header ng 8th Premier Volleyball League (PVL) All-Filipino Conference kahapon sa Smart Araneta Coliseum sa Quezon City.

Pakitang-gilas si 2022 Reinforced Conference MVP Mylene Paat ng doble pigura para pagbidahan ang atake ng Chery Tiggo sa 10 puntos mula sa siyam na atake at isang service ace upang dalhin sa malinis na 2-0 kartada ang koponan, habang ipinalasap naman sa Strong Group ang magkasunod na pagkatalo matapos yumuko sa Petro Gazz Angels sa straight set noong opening day.

“Siyempre yung past two games namin malaking tulong sa amin lalo na sa pagpasok ng mga bagong players at decision-making ng coaches na lahat kami ready talaga at magagamit namin lahat against sa choco mucho next game,” pahayag ni Paat matapos ang laro para sundan ang panalo laban sa baguhan ding Capital1 Solar Energy.” Lahat naman ng teams at players, pinag-aralan namin sila, gayundin yung SGA, talagang nirerespeto namin ang lahat ng mga kalaban namin.”

Sumegunda naman sa 29-anyos na dating Adamson University Lady Falcons si Ennajie “EJ” Laure na ipinalo lahat ng puntos sa atake, gayundin ang tig-pitong puntos nina Czarina Carandang at Princess Anne Robles kasama ang anim na excellent digs, habang may ambag sina team captain Abigail Marano ng anim na puntos at Ejiya “Eya” Laure sa 5 puntos