Bubuntunan ng Lady Spikers ang Blue Eagles sa banatan

ni Gerard Arce @Sports | March 2, 2024

Mga laro ngayong Sabado (MOA)

12 pm – La Salle vs Ateneo (men’s)

2 pm – NU vs UP (women’s)

4 pm – La Salle vs Ateneo (women’s) 

Paniguradong paglalabasan ng ngitngit ng reigning at defending champions na De La Salle University Lady Spikers sa pangunguna ni Rookie/MVP Angel Anne Canino ang Ateneo Lady Blue Eagles sa pagtangkang makabawi sa pagkatalo sa nagdaang laro, habang ipagpapatuloy ng NU  Lady Bulldogs ang 2-game winning streak laban sa bokya sa panalo na UP Lady Maroons sa pagpapatuloy ng aksyon sa 86th season UAAP women’s volleyball tournament ngayon sa MOA Arena sa Pasay City.

Bubuhaying muli ang dating mahigpit na tunggalian sa pagitan Lady Spikers at Blue Eagles sa sagupaang may matinding misyon ang outside spiker na si Canino na matapos ang masaklap na pagkabigo sa nangunguna at unbeaten na UST Golden Tigresses noong nakaraang Linggo na nagtapos sa pambihirang 6-0 run tungo sa 18-25, 23-25, 25-14, 25-16, 12-15 fifth set, kaya’t nakatuon ang pansin sa Lady Eagles na nakuha ang unang panalo sa Lady Maroons sa 5th set, 22-25, 20-25, 25-22, 25-17, 15-9 nitong nagdaang Miyerkules.

Nagtapos ang nine-game winning streak ng Lady Spikers sapol noong nagdaang season, kung saan UST din ang pumutol sa kanilang nine-game winning run sa elimination round upang maiwasan ang step-ladder semifinals at diretsong ticket sa Finals. Paniguradong pilit na muling ibabawi ng 5-foot-11 spiker ang ngitngit na makabawi kasunod ng inilistang 28 puntos mula sa 24 atake. Masasandalan din sa grupo ni multi-titlist coach Ramil De Jesus sina Baby Jyne Soreno, Amie Provido, Alleiah Malaluan, setter Julyana Tolentino, team captain Julia Coronel, libero Lyka De Leon, spiker Shevana Laput at two-time middle blocker Thea Gagate.

Speed Hitters, Titans at Crossovers, patibayan

ni Gerard Arce @Sports | March 2, 2024

Mga laro ngayon (Sabado) (Philsports Arena, Pasig City)

2 n.h. – Galeries vs Cignal

4 n.h. – PLDT vs Petro Gazz

6 n.g. – Choco Mucho vs Chery Tiggo

Pare-parehong hangad ng PLDT High Speed Hitters, Choco Mucho Flying Titans at Chery Tiggo Crossovers na mapanatili ang maagang liderato sa single-round robin na eliminasyon ng matinding aksyon na hatid ng 8th Premier Volleyball League (PVL) All-Filipino Conference 2024 ngayon sa Philsports Arena sa Pasig City.

Kapwa nailista ng tatlong koponan ang 2-0 rekord kasama ang reigning at defending champion na Creamline Cool Smashers sa four-way tie, subalit hanap ng bawat isa na mapanatili ang paggiya sa liderato sa pakikipagharap ng PLDT magbabawing Petro Gazz Angels habang maghihiwalay ng landas ang Flying Titans at Crossovers. Plano namang ikonekta ng Cignal HD Spikers ang back-to-back panalo laban sa Galeries Highrisers sa triple-header. 

Bumida para sa PLDT sa straight set 25-17, 25-23, 25-22 panalo kontra NXLed Chameleons si last season best scorer Savannah Dawn Davison na lumikha ng triple-double sa 13 puntos. Makakatulong ng Fil-Canadian sina middle blocker Jessey De Leon, Majoy Baron, Fiola Ceballos Kiesha Bedonia, Erika Santos, Jules Samonte at setter Kim Fajardo.

Epektibo ang mahuhusay na sets ng bagong playmaker ng Choco Mucho Flying Titans na si Marionne “Mars” Alba upang masikwat ang pagsosyo sa liderato matapos mamahagi  kabuuang 25 excellent sets Angels sa dikdikang 24-26, 25-22, 25-18, 24-26, 15-13 noong Martes upang mabiyayaan ang limang manlalaro ng doble pigura sa pangunguna ni high-flying MVP Cherry Ann “Sisi” Rondina sa 24pts. 

Gayunpaman, hindi pa rin umano kuntento sa ipinapakitang laro ang 5-foot-7 playmaker mula sa DLSU  Lady Spikers na patuloy pa ring inaaral ang sistema ni coach Dante Alinsunurin, gayundin ang pag-alalay sa puwesto ni Deanna Wong na unti-unting ibinabalik ang laro dulot ng injury.

Chinnie ng Foxies nagpasiklab naka-1st win kontra Capital1

ni Gerard Arce @Sports | March 1, 2024

Unti-unting inaangat ni dating collegiate champion Chinnie Arroyo ang kanyang kumpiyansa at laro matapos magpasikat sa bagong koponan na Farm Fresh Foxies na tinulungang makuha ang unang panalo laban sa bagong koponan na Capital1 Solar Energy sa pamamagitan ng 25-16, 25-18, 25-16 straight set para sa unang handog na laro ng 8th edisyon ng Premier Volleyball League (PVL) All Filipino Conference, kahapon sa Philsports Arena sa Pasig City.

Nagawang magpakitang-gilas ng dating National University Lady Bulldogs spiker na kuminang ng 11 puntos galing sa 10 atake at isang service ace upang hiranging player of the game, na unti-unting umaangat ang laro matapos tumalon galing sa nabuwag na F2 Logistics Cargo Movers ng umiskor din ng 8  puntos sa pagkatalo kontra sa reigning at defending champions na Creamline Cool Smashers sa unang laro nito. “Madami kaming natutunan sa past games namin [kung saan] nagkulang kami, kaya 'yun ang ina-apply namin ngayong game na ito. Simula nu'ng nag-team building na kami, naging mabilis 'yung samahan namin sa isa’t isa,” saad ni Arroyo.

Nagbida pagdating sa opensiba si dating Adamson University Lady Falcons spiker Trisha Gayle Tubu ng tumapos ito ng kabuuang 15 puntos mula sa 12 atake, dalawang blocks at isang ace upang pangunahan ang opensa ng Foxies tungo sa 1-1 kartada para samahan ang Petro Gazz Angels, habang nahulog naman sa 0-2 marka ang Capital1 kasosyo ang NXLed Chameleons at Strong Group Athletics.

Patuloy rin sa pamamahagi ng magandang takbo ng opensa si ace playmaker Louie Romero sa kanyang 12 excellent sets kasama ang dalawang puntos, habang nag-ambag si Kate Santiago ng anim puntos, gayundin sina Sofia Ildefonso at Alyssa Bertolano.