Capital1, binigyan ng 1st win si coach Gorayeb

ni Gerard Arce @Sports | March 6, 2024

Mga laro bukas (Huwebes) (Philsports Arena, Pasig City)

4 n.h. – Creamline vs Galeries

6 n.g – Cignal vs NXLed 

Mainit-init na unang panalo ang pinasiklab ng Capital1 Solar Energy para mabigyan ng unang panalo ang beteranong head coach na si Roger Gorayeb matapos paliyabin ang kapwa baguhang koponan na Strong Group Athletics sa 25-18, 25-20, 19-25, 25-20 sa pambungad na laro ng itinampok na double-header ng 8th Premier Volleyball League (PVL) All-Filipino Conference, kagabi sa Philsports Arena sa Pasig City.

Nanguna sa atake ng Solar Energy Spikers ang beteranong hitter na si team captain Jorelle Singh ng lumista ito ng kabuuang 13 puntos mula sa 12 atake at isang block para ilagay sa winning column ang koponan kasunod ng dalawang pagkabigo sa 1-2 kartada, habang nahulog naman sa 0-3 marka ang baguhang koponan rin ng Strong Group.

“Sobrang masaya lang kase importante itong laro dahil ito yung magpa-boost ng confidence at morale naming. Kaya ine-expect namin na mas magiging maganda yung game at makapag-perform ng maayos next game,” wika ng 28-anyos na outside hitter na nalampasan ang pangangapa sa koponan matapos ang mahigit isang buwan pa lamang magkakasama. “Nagkulang sa cokmmunication at receive sa next set nagusap na kami,” dagdag ng 5-foot-5 hitter na dating National University Lady Bulldogs spiker.

Aminado naman si Gorayeb na hindi pa gaanong gamay ng mga manlalaro nito ang sistemang pinapatakbo na umaasang makakabisado sa lalong madaling panahon upang mas higit na makasabay sa takbo ng laro sa liga. “Hirap na hirap pa kami mula sa setter at libero, yung sistema ko kase bago sa katawan nila, parang alienated sila, na di ito yung ginagawa nila dati, sana wag abutin ng isang taon bago nila makuha,” paglalahad ng San Sebasntian Lady Stags chief tactician na nakakuha rin ng suporta mula kay Patty Orendain na may 9 na puntos.

Dyip muling nagwagi, Falcons dinagit ang UE

ni Clyde Mariano / Gerard Arce @Sports | March 4, 2024

Sumandal ang Terrafirma sa mainit na opensiba sa fourth  quarter para walisin ang 13 points lamang sa second quarter at tinalo ang NLEX, 99-95 para sumosyo sa Blackwater sa pamumuno sa kartadang 2-0 sa Philippine Cup sa Smart Araneta Coliseum kahapon.

Nagsanib-puwersa sina Juami Tiongson, Javier Gomez de Liano, Stephen  Jeffrey Holt, at  John Paul Calvo na nagsumite ng pinagsamang 72 points at iposte ang pangalawang sunod na panalo ayon kay coach Johnedel Cardel na  ngayon lang nangyari sa six years ng coaching career na nanalo ang Terrafirma ng dalawang sunod na panalo.

Samantala, nasilayan na ang pinagsamang husay at ganda ni Adamson University Lady Falcons spiker Barbie Jamili na pinangunahan ang ikalawang panalo laban sa dismayadong University of the East Lady Warriors na nagtapos sa 25-19, 25-19, 26-28, 29-27, sa unang laro ng 86th  UAAP women’s volleyball tournament, kahapon sa SM Mall of Asia Arena sa Pasay City.

Nagpamalas ng kakaibang laro ang inaabangan ng madla na si Jamili na kumana ng double-double performance sa kabuuang 20 puntos mula sa 18 atake at dalawang blocks, kasama ang 12 excellent digs at anim na receptions tungo sa 2-2 kartada ng last season bronze medalists para sa solong ika-limang pwesto.

Samantala, sinuspinde ng UAAP Board si coach Jerry Yee sa kabuuan ng women’s volleyball season dahil umano sa pakikibahagi sa mga gawaing hindi naaayon sa mga layunin ng liga.

Napagdesisyunan ng UAAP Board of Managing Directors na pagbawalang makapasok sa mga laro ng UE, subalit pinapayagang sanayin ang koponan at pinapayagan lamang magabayan ito sa ibang liga. Inihayag ng BMD na nagkaroon ng reklamo kay Yee ang isang miyembro ng UAAP na sinabing nagkaroon ito ng, “acts inconsistent with the league’s objectives…” 

Pacio, una ang ulo nang mabalibag, champ sa ONE

ni Gerard Arce @Sports | March 3, 2024

Hindi man hangad ang inaasam na resulta ng laban, patuloy pa ring napasakamay muli ni Filipino mixed martial arts fighter Joshua “The Passion” Pacio ang ONE Strawweight championship belt matapos mauwi sa diskwalipikasyon ang ginawang balibag sa kanya ni dating World titlist Jarred “The Monkey God” Brooks sa 56 segundo ng first round dulot ng ipinagbabawal na spike slam para sa kanilang  rematch, Biyernes ng gabi sa ONE 166: Qatar sa Lusail Sports Arena.

Agad namang idinaan sa pagsusuri at nilagyan ng neck brace support ang tubong La Trinidad, Benguet matapos buhatin at maibalibag ng American fighter na una ang ulo pabagsak na nagresulta sa pagtagilid ng leeg nito, na isa sa mga ipinagbabawal na throw sa ONE Championship. Inakala ni Brooks na nadepensahan nito ang titulo ng awatin at ipatigil ni referee Herb Dean ang laban kasunod ng ilan pang mga upak sa ulo matapos ang balibag, subalit inanunsiyong diskuwalipikado ito sa ginawang throw.

Agad namang dumaan sa Computerized Tomography (CT) Scan ang 28-anyos mula Lions Nation MMA at idineklarang klaro sa naturang pagsusuri para mabilis na ilabas ng ospital.

Naglabas naman si Brooks ng kanyang pahayag sa social media patungkol sa pangyayari na inaming hindi sinasadya ang pangyayari. “@joshuapacio wish nothing but the best for you brother. I hope you’re okay. I am sorry for letting down my family and the organization. I did not intentionally do anything,” saad ni Brooks sa kanyang Instagram post.

Nagkaroon naman ng pagkakataon sina Pacio (22-4, 8KOs, 9 Subs) at Brooks (20-3, 2KOs, 8Subs) sa tinutuluyang hotel at nagawang makapag-usap at magyakapan, kung saan naging emosyonal ang 30-anyos mula Warsaw, Indiana matapos mawala rito ang kanyang korona.