Paalam, isang panalo sure na sa medalya, Villegas asam q'slot

ni Gerard Arce @Sports | August 1, 2024

Photo: One Sports / FB

Tatangkain ni Pinay southpaw Aira Villegas na mapahaba ang pananatili sa Summer Olympic Games laban kay No.2 seed Roumaysa Boualam ng Algeria sa round-of-16 ng women's 50kgs category, habang kailangang magwagi sa isa pang laban si Carlo Paalam upang makuha ang medalya sa men's 57kgs ng 2024 Paris Olympics boxing tournament sa North Paris Arena sa Roland Garros, France.

Bukod sa panalo, nais ni Villegas na maging regalo ang laban sa kanyang 29th birthday na ipinagdiwang kahapon upang talunin ang 2-time African Championship titlists mula Algeria na may hawak ng Bye bandang alas-2:16 ng madaling araw ngayong Biyernes.

“Same pa rin kami,” bulalas ni women's headcoach Reynaldo Galido. “Kailangan na ‘wag kami magpabaya. [Kung] kailangan na kung kaya naming makalamang sa first round, [dapat] gawin niya na.” Sakaling makalusot si Villegas ay maaaring makatapat nito ang magwawagi kina hometown bet Wassila Lkhadiri ng France at 2018 European Youth at 2017 Junior gold medalists Daina Moorehouse ng Ireland sa q'finals sa Sabado ng 10:50 ng gabi.

Puntirya namang makalusot sa siguradong medalya sa semis si Paalam matapos ang 5-0 unanimous decision win laban kay Jude Gallagher ng Ireland sa men’s bantamweight class Sunod na makakatapat si Australian at No.4 seed Charlie Senior na nakatakdang makaharap sa Sabado ng gabi 9:46.

Nananatiling kumakampanya para sa Pilipinas sa boxing si Tokyo Games silver medalist Nesthy Petecio na sunod na makakalaban si hometown bet Amina Zidani ng France sa Sabado ng madaling araw ng 2 a.m, habang patuloy ng nagpaalam sa kontensyon sina Tokyo Games bronze medalist Eumir Felix Marcial sa men’s 80kgs at Hergie Bacyadan sa women's 75kgs division.

Poyos at Perdido dinala ang UST sa V-League first win

ni Gerard Arce @Sports | July 29, 2024

Photo: UST Tigresses / X

Mga laro sa Miyerkules

(Paco Arena)

10 a.m. – Perpetual vs NU (Men)

12 p.m. – FEU vs UST (Men)

3 p.m. – FEU vs Letran (Women)

5 p.m. – UE vs Benilde (Women) 

Nagpasikat at nagkapit-kamay sa pagputok sa opensa sina outside hitters Jonna Perdido at last season UAAP Rookie of the Year Angeline Poyos para pagbidahan ang University of Santo Tomas Golden Tigresses sa pagsakmal sa Lyceum of the Philippines University Lady Pirates sa pamamagitan ng 4-set panalo sa 25-22, 23-25, 25-20, 25-17 para simulan ang kampanya sa 2024 V-League Women’s Collegiate Challenge kahapon sa Paco Arena sa Maynila.

Humataw sina Perdido at Poyos ng kapwa 16 puntos, kung saan nagdagdag din ng 3 excellent receptions ang 20-anyos na Second Best Outside Hitter sa season 86th ng UAAP. Kumana rin sa atake ang dalawang opposite spikers na sina Regine Jurado at rookie Margaret Altea na kapwa may tig-13 puntos, gayundin si Margaret Banagua na may 8 at Cassy Carballo na may 12 excellent sets.

“Ano naman ito whatever the result ang gusto lang namin mangyari kung paano sila magre-react for different scenario, adjustments yung tamang judgements, those things ang tinitignan namin kase skills wise, andun naman, more on decision-making na lang nga at yung adaptability kung sino yung mag-fit dun sa system, kung anong pinakamagandang mangyayari so far,” pahayag ni head coach Emilio “Kungfu” Reyes, na muling inilatag ang mga dating manlalaro matapos makuha ang runner-up finish sa nagdaang UAAP season.

“They have the power, pero 'yung consistency di pa masyadong makita, pero yung maturity okay na naman sa kanila. Halos lahat ng seniors, composed, confident, andun na yung galawan nila,” dagdag ni Reyes patungkol sa ‘core group’ na nagbalik muli sa eksena sa paglalaro. 

Pacman tumabla sa 3 minutong laban kay Anpo

ni Gerard Arce @Sports | July 28, 2024

Photo: Manny vs. Anpo / X

Nauwi sa tabla ang ikalawang salang sa exhibition bout ng nag-iisang eight division World champion na si Manny “Pacman” Pacquiao laban kay dating K1 fighter Rukiya Anpo ng Japan, Linggo ng gabi sa Super RIZIN 3 sa Super Saitama Arena.

Maituturing man na walang nanalo sa three-round-three-minute boxing match, tila mas kinakitaan ng kalamangan ang Japanese fighter na malaki ang bentahe pagdating sa height at lakas matapos na magpakawala ng mabibigat na suntok sa 45-anyos na Filipino boxing legend.

Tiniis ng future Hall of Famer ang mabibigat na suntok ni Anpo, kabilang ang right hooks sa first round, body shots sa round two at matitinding atake sa round three, kung saan nasaktan si Pacman sa huling round.

Naging pamalit lamang si Anpo kay kickboxing at mixed martial arts RIZIN featherweight champion Chihiro Suzuki, matapos kinailangang umatras dahil umano sa hand injury na natamo sa exhibition boxing match kay PRIDE FC Legend Takanori Gomi.

Huling beses sumabak sa exhibition match si Pacquiao nung Disyembre 11, 2022 kontra kay South Korean fighter DK Yoo sa Korea International Exhibition Center na nagtapos sa unanimous decision sa kanilang six round bout, na sinundan naman ng pagpirma ng kasunduan sa kilalang Japanese Promotions na RIZIN MMA para lumaban rin sa isang exhibition match.

Nakikita namang isang tune-up fight ni Pacquiao ang laban kay Anpo bilang daan sa nilulutong comeback professional fight nito kontra kay World Boxing Council (WBC) welterweight titlist Mario “El Azteca” Barrios ngayong taon sa Estados Unidos.

Matatandaang nabigo si Pacquiao sa huling professional bout kontra kay Yordenis “54 Milagros” Ugas ng Cuba nung Agosto 21, 2021 na nagresulta sa 12-round unanimous decision pabor sa 2008 Beijing Olympics bronze medalist para sa WBA (Super) 147-pound title belt.