Pacman At Benn, nag-face-off may lulutuin bang bakbakan?

ni Gerard Arce @Sports | March 17, 2024

Nagawang makipag-face off ng nag-iisang eight division World champion na si Manny “Pacman” Pacquiao kay undefeated British boxer Conor “The Destroyer” Benn sa isang boxing event sa Riyadh, Saudi Arabia matapos ang bulung-bulungan na nilulutong upakan sa hinaharap.

Usap-usapan ang gaganaping banggaan ngayong darating na ‘summer’ (mga Mayo o Hunyo sa ibang bansa) bilang hudyat na rin ng pagbabalik sa pro-boxing ng 45-anyos na Filipino boxing legend na minsang hinamon ang kampo ng dating World Boxing Association (WBA) Continental (Europe) welterweight titlist na maaaring ganapin sa Middle East.

Sa huling dalawang laban ng 27-anyos na mula Greenwich. London na ginanap sa U.S.,  magkasunod na nagpositibo sa ipinagbabawal na substantiya ang ipinataw kay Benn kasunod ng VADA testing, dahilan upang maudlot ang laban nito noong 2022 kay Chris Eubank Jr., subalit malaki ang posibilidad na malampasan nito ang naturang alegasyon laban kay Pacquiao sakaling ganapin ang laban sa Gitnang Silangan. “That’s what I was there for, really,” paglalahad ni Benn upang agarang magtungo sa Saudi Arabia. “I knew he [Pacquiao] was going to be there. Right now, that’s looking like the one that we’re focusing on.”

Malaki ang pagnanais ni Benn na makatapat ang malalaking pangalan sa larangan ng boksing higit na sa 147-pound division, higit na ang makatapat ang future “Hall of Famer.”

Minsang nabuhay ang espekulasyon sa harapan nina Pacquiao at Benn noong isang taon matapos ibunyag din mismo ni Matchroom Sport chairman at promoter Eddie Hearn na potensiyal na magkaharap ang dalawa, habang nakakuha ng paghahamon ang kampo ni Pacman na interesadong makaharap ang British boxer, na nanatiling undefeated sa panalo kontra kay Peter Dobson nitong nagdaang Pebrero 3 na nauwi sa unanimous decision na panalo.

Crossovers giniba ang winning streak ng CCS

ni Gerard Arce @Sports | March 17, 2024

Mga laro sa Martes (FilOil Ecooil Arena, San Juan)

4 n.h. – Strong Group vs Cignal

6 n.g. – Choco Mucho vs PLDT 

Tinapos ng Chery Tiggo Crossovers ang 19-game winning streak ng Creamline Cool Smashers kasunod ng mainit na laro ni Eya Laure at magandang depensa ni Jennifer Nierva tungo sa pambihirang sweep sa 25-18, 26-24, 25-23 straight set sa unang laro ng nakalinyang triple-header kahapon sa 8th Premier Volleyball League (PVL) All-Filipino Conference na isinagawa sa Sta, Rosa Sports Complex sa Laguna.

Tumapos ang 5-foot-10 spiker ng kabuuang 14 puntos mula sa 12 atake at dalawang service ace, kasama ang apat na excellent receptions upang tuldukan ang matagal na pananalasa ng Cool Smashers sa liga na planong duplikahin ang ginawang pangwawalis sa kabuuang kumperensya nung nagdaang season.

Sumegunda naman sa iskoran si Czarina Carandang sa 12pts mula sa siyam atake at tatlong blocks, gayundin si Ara Galang na gumawa ng 10pts kasama ang anim na excellent digs. Nag-ambag rin si dating conference MVP Mylene Paat ng siyam puntos at Abigail Marano ng anim, habang namahagi naman si Alina Bicar ng 12 excellent sets at ang magandang floor defense ni Nierv ana kumaala ng double-double sa 20 excellent digs at 10 excellent receptions. “Masayang-masaya kami, kase back nung championship last conference nanood po kami ng entire game, sonbrang amaze kami, napatanong ako kung paano namin matatalo ang Creamline, kase system wise, solid ang sistema nila, attackers, defense, passing, even kapag nag-scout kami sa kanila, ‘di namin alam kung paano namin sila bubutasan eh,” pahayag ni Laure matapos ang laro na nakabawi sa dalawang sunod na pagkatalo kontra Choco Mucho Flying Titans at Farm Fresh.

Bigatin ang double-header, UST, DLSU AT NU, abangan

ni Gerard Arce @Sports | March 16, 2024

Mga laro sa Sabado (Smart Araneta Coliseum)

2 pm – DLSU vs NU

4 pm – Adamson vs UST

Lalapain ng University of Santo Tomas Golden Tigresses ang kauna-unahang pangwawalis sa first round laban sa Adamson University Lady Falcons, habang masasaksihan ang inaabangang Finals rematch sa pagitan ng reigning at defending champions na De La Salle University Lady Spikers at National University Lady Bulldogs sa bigating double-header ngayong araw sa 86th UAAP women’s volleyball tournament sa Smart Araneta Coliseum.

Hindi magpapaawat ang Golden Tigresses na determinadong sakmalin ang 7-0 sweep sa pinakatampok na laro ng 4 p.m. kontra Lady Falcons, na naghahanap makabawi sa nagdaang pagkatalo.

Kasunod ng magkasunod na taon na paghaharap sa Finals, sisimulan ng DLSU Lady Spikers at NU Lady Bulldogs ang agawan sa solo 2nd place na kapwa may 5-1 kartada para sa pambungad na laro ng 2 p.m.

Minsang nawalis ng UST ang first round noong season 2006-2007, kung saan suspendido ang La Salle, subalit ngayon ay mahaharap sila sa panibagong hamon na mailista ang tagumpay para sa volleyball program na pinagbibidahan ni league-leading scorer Angeline “Angge” Poyos.

“Hindi pa dapat kaming magpakampante kasi mahaba pa ang season at may second round pa. Bawal mag-relax,” wika ni super-rookie Poyos, na magkasunod na winalis ang Ateneo Blue Eagles at UP Lady Maroons.

Masaklap man ang pagkawala ng mga importanteng manlalaro ngayong season, matapos ang 3rd place finish noong nagdaang taon, tila hindi naman sumusuko ang Adamson sa panibagong pagkatalo na naitala kontra sa Ateneo sa 19-25, 19-25, 25-22, 23-25 noong Miyerkules upang tumabla sa 2-4 marka.

Inaasahang matinding salpukan ang harapan sa La Salle at NU, na tinapos ang 65-taong pagkagutom sa kampeonato noong 2022, habang binawian  sila noong isang taon para kunin ng DLSU ang ika-12 titulo.