'Tots' Carlos nagtala ng new record 30 pts.

ni Gerard Arce @Sports | April 1, 2024

Rumehistro ng panibagong rekord bilang lokal na manlalaro sa larangan ng women’s volleyball si Diana Mae “Tots” Carlos upang pangunahan ang Creamline Cool Smashers sa ika-6 na panalo upang higitan ang iba pang Pinay spikers na nagtala ng pambihirang 30-point performance.

Lumista ng 38 puntos mula sa 35 atake at 3 blocks ang three-time league MVP na naging pinakamataas na tala sa isang laro na nilikha ng lokal na manlalaro sa Premier Volleyball League (PVL) na siyang naging daan upang malampasan ng Cool Smashers ang matinding pagsubok na hatid ng Cignal HD Spikers sa come-from-behind 5th set panalo sa 26-28, 22-25, 25-22, 25-21, 16-14 nitong nagdaang Martes ng gabi.

Nahigitan ng 25-anyos mula Lubao, Pampanga ang inilistang career-high ni Cherry Ann “Sisi” Rondina ng Choco Mucho Flying Titans sa pro-league, na kontra rin mismo sa kanila noong Second All Filipino Conference Finals noong Disyembre, habang naunahan din nito ang itinala ng kakampi nitong si Alyssa Valdez na 37 puntos noong PVL Open Conference laban sa Bali Pure noong 2017 bilang non-pro rekord.

Gayunpaman, nananatiling nasa tuktok pa rin ng all-time record sa PVL ang 44 puntos ni Akari Chargers import at Olympian Priscilla Rivera ng Dominican Republic laban sa Choco Mucho noong Nob. 3, 2022 sa PVL Reinforced Conference.

Minsan nang nagtala ng 31 puntos ang 5-foot-9 opposite hitter na dating manlalaro ng UP Lady Maroons laban sa Akari Chargers sa 4th set panalo nitong nagdaang Pebrero 29.

Bukod sa mga nabanggit na manlalaro ay nakakuha rin ng 30 puntos ang mga lokal na sina Dindin Santiago-Manabat ng dalawang beses na 32pts na ang isa ay sa laban ng Chery Tiggo Crossovers kontra Creamline sa Game 3 ng PVL Finals sa Bacarra Ilocos Norte; Katrina Tolentino na 31pts sa 2022 PVL Invitationals at iba pa.

Nagpatingin sa espesyalista sa mata si Olympic Bound Petecio

ni Gerard Arce @Sports | April 1, 2024

Tila kailanganing dumaan pa sa panibagong pagsusuri sa mga espesyalista ang kalagayan ng mata ni 2020+1 Tokyo Olympics silver medalist at 2024 Paris-Bound boxer Nesthy Petecio lalo pa’t daraan sa matinding pagsasanay at paghahanda para sa Summer Olympics sa Hulyo sa France.

Tila inaasahan ng 2019 Ulan-Ude World women’s featherweight titlist na maaaring tumindi pa ang problema sa  kaliwang mata sakaling aksidenteng tamaan ito sa ensayo lalo pa’t mas iigting ang kanyang ensayo para sa asam na kauna-unahang gintong medalya ng Philippine  boxing sa Olympiad.

Ang 31-anyos ng Davao del Sur ang itinuturing na kauna-unahang babaeng boksingero sa Olympics na nagwagi ng medalya subalit may iniinda ito sa kanyang katawan, maging ang muscle injury sa  kaliwang kamao. “[Nagawa] na naming magpacheck-up sa isang eye center, pinuntahan talaga namin ni coach Mitchell (Martinez) yun, kaya iyon medyo nag-okay naman yung mata ko sana magtuloy-tuloy na (pero) malaman ko iyon this next week kung matamaan siya kung babalik pa,” kwento ni Petecio sa reporters nang makapanayam sa Ninoy Aquino Stadium sa Maynila.

Inalala ng two-time Southeast Asian Games gold medalist ang mga pangyayari sa kanyang laban sa First Olympic Qualification sa Italy, na nahihirapan itong imulat ang kanyang mata dulot ng nakuhang gasgas nito. “Panay ang dasal ko noon tapos sinasabayan ko na rin ng pag-iingat kase kapag nakita ng referee iyon, pwedeng ipatigil yung laban. Kay sabi ko Lord, ikaw na bahala, ibubuhos ko na lahat,” paglalahad ni Petecio.

Inamin din nitong patuloy ang pag-inom ng pain reliver upang maibsan ang sakit sa  kanyang kaliwang kamay na nakuha niya sa laan kay Esra Kahraman ng Turkey sa paborito nitong women’s under-57kgs category, bago makuha ang 4-1 split decision na panalo sa Olympic qualifying.

Saudi, babaling sa Pac-May 2, Team 2000 wagi sa ERJHS 3x3

ni MC / Gerard Arce @Sports | March 27, 2024

Nagselyo ng isang kasunduan si 8th-division World champion Manny “Pacman” Pacquiao sa Saudi Arabia patungkol sa hinaharap na laban – kung saan pangunahing nasa listahan si undefeated/retired Floyd Mayweather Jr. para sa inaabangang PacMay 2 na proyekto. 

Magandang balita ang ibinulgar ni MP Promotions President at international matchmaker Sean Gibbons matapos ang pakikipagpulong ni Pacquiao kay Saudi Arabian Chairman Turki Alalshikh tungkol sa  laban sa kanilang bansa para sa pagbabalik sa pro fight ng Filipino boxing legend para pagpilian ang laban kina Conor “The Destroyer” Benn, two-division UFC champion Conor “The Notorious” McGregor at Mayweather.  

“After meeting with his excellency Turki Alalshikh, boxing legend Manny Pacquiao is back at his gym in the Philippines and looking in incredible fighting shape,” wika ni Gibbons sa panayam ng World Boxing News.  

Samantala, walang iba kundi Team 2000. Nasungkit ng Team 2000 ang kampeonato sa kauna-unahang E. Rodriguez Jr High School Alumni 3x3 basketball tournament sa Barangay N.S. Amoranto covered court sa Malaya St. Quezon City. 

Sa pangunguna ng magkapatid na Mark and Jeff Caguisa, pinabagsak ng T2000 ang Batch 98, 14-10, para sa kampeonato sa 2-day competition na itinaguyod ng ERJHS Alumni Sports Club, sa pangunguna ni Ed Andaya ng Batch 81, bilang bahagi ng pagdiriwang ng ERJHS 72nd Foundation Day and Grand Alumni Homecoming noong Feb. 23-25.

Napili si Mark Caguisa bilang Most Valuable Player sa kompetisyon, na sinuportahan din ng ERJHS Alumni Association, sa ilalim nina President Jess Asistin at Vice-President Zeny Castor, at Barangay N.S. Amoranto Chairman Ato de Guzman. Sa pamumuno ni playing coach Jerome Nell. 

Ang iba pang mga miyembro ng T2000 ay sina Kelvin Pantaleon at Chris Santiago.  Iginawad ni incoming ERJHS alumni president Ramon "Monchie" Ferreros ng Batch 73 ang mga tropeo, katuwang sina Asistin at Andaya. Ang naturang kompetisyon ay sinuportahan din nina PBA Commissioner Willie Marcial at Deputy Commissioner Eric Castro.