HD Spikers at Crossovers unahan sa PVL semifinals

ni Gerard Arce @Sports | April 11, 2024

Mga laro ngayong Huwebes

(Philsports Arena, Pasig City)

4 n.h. – Capital1 vs Akari

6 n.g. – Cignal vs Chery Tiggo 

Matinding agawan sa puwesto ang pagtatalunan ng Cignal HD Spikers at Chery Tiggo Crossovers sa importanteng laro ngayong araw upang patatagin ang puwesto sa semifinals sa tampok na laro, habang sisipatin ng Akari Chargers ang kanilang ika-4 na panalo kontra Capital1 Solar Energy Spikers sa pambungad na laro sa mas lumalalim na elimination round ng 8th Premier Volleyball League (PVL) All-Filipino Conference sa Philsports Arena sa Pasig City.

Kapwa hangad ng Cignal at Chery Tiggo na makuha ang ika-6 na panalo upang makatabla sa Petro Gazz Angels at defending champions na Creamline Cool Smashers na pare-parehong naghahangad makapasok sa semifinals. Nakatakdang magharap ang Cignal at Chery Tiggo sa main game sa 6 p.m. Puntirya ng Akari na makuha ang ikalawang sunod na panalo laban sa nangungulelat na Solar1 Energy Spikers sa unang laro sa alas-4:00 ng hapon.

Buhat ang laro ni Sgt. Jovelyn Gonzaga ng bumuhos ito ng 17 puntos mula sa 14 atake, dalawang aces at isang block kasama pa ang 10 excellent digs at pitong excellent receptions upang walisin ang Farm Fresh Foxies noong nagdaang Huwebes sa 25-10, 25-14, 25-15. Paniguradong naka-alalay rin sa atake sina dating league MVP Frances Molina, Filipino-American Vanessa Gandler, Roselyn Doria, Marivic Meneses at ace playmaker Maria Angelica Cayuna na namahagi ng 18 excellent sets, gayundin ang mahigpit na depensa ni floor defender Dawn Catindig.

Buhat naman ng silatin at walisin ang nagtatanggol na kampeon na Cool Smashers, sunod na sinagasaan ng Crossovers ang matikas na lipad ng two-time league champions na Petro Gazz sa fifth set at talunin sa fourth set ang NXLed Chameleons sa 23-25, 25-23, 25-16, 25-20 para sa ikatlong sunod na panalo.

Perdido at Jurado ng UST tumirada kontra Maroons

ni Gerard Arce @Sports | April 11, 2024

Mga laro bukas (Sabado)

(Ninoy Aquino Stadium)

10 a.m. – Adamson vs UP (Men)

12 noon – FEU vs UST (Men)

2 p.m. – Adamson vs UP (Women)

4 p.m. – FEU vs UST (Women) 

Hindi naging malaking problema para sa UST  Golden Tigresses ang pagkawala sa laro ni ace scorer at super-rookie Angge Poyos at starting middle blocker Margaret Banagua ng pagbidahan nina Jonna Perdido at Regina Jurado ang atake ng koponan upang lampasan ang pagsubok na hatid ng UP Lady Maroons sa bisa ng 25-14, 25-13, 28-30, 25-15, kahapon sa unang laro ng 86th UAAP women’s volleyball tournament sa SM Mall of Asia Arena sa Pasay City.

Parehong nagtala ng tig-24 puntos sina Perdido at Jurado mula sa 22 atake at tig-isang ace at block at 21 kills at 3 blocks, ayon sa pagkakasunod, habang nag-ambag din si Xyza Gula ng 12 puntos mula lahat sa atake, kasama ang 9 na receptions at 7 digs, gayundin sina Mae Coronado sa 9 puntos at Bianca Plaza sa 5 puntos.

“Nag-step lang po at trinabaho yung responsibilidad sa loob ng court, naging motivation namin ay para kina Angge at Em kaya namin nakuha 'yung panalo,” pahayag ni Perdido na nagbigay din ng walong excellent digs at apat na excellent receptions, habang pinaghugutan din ng koponan ang nakuhang pagkatalo sa NU Lady Bulldogs ngayong 2nd round upang makapag-adjust ng mga kinakailangang diskarte sa laro.

“Eversince 'yung lost kinailangan na magising at iyong lapses na kailangan pagtuunan ng pansin, kahit paano napanindigan namin 'yung sinasabi naming babawi kami,” wika ni Jurado na nag-ambag din ng limang excellent digs.

Pasabog ng JRU Lady Bombers napasuko ang Generals sa NCAA

ni Gerard Arce @Sports | April 11, 2024

Mga laro bukas (Biyernes)

(Filoil EcoOil Arena)

7:30 a.m.- San Beda vs CSB (men)

10 a.m.- San Beda vs CSB (women)

2 p.m.- SSC-R vs LPU (women)

5 p.m.- SSC-R vs LPU (men) 

Sumandal sa balanseng atake ang Jose Rizal University Lady Bombers upang pataubin ang Emilio Aguinaldo College Lady Generals sa pamamagitan ng straight set sa 25-20, 25-20, 25-23, kahapon upang makuha ang unang panalo sa 99th season ng National Collegiate Athletic Association (NCAA) women’s volleyball tournament sa San Andres Gymnasium sa Malate, Manila.

Nagpamalas ng mahusay na pagmamando sa opensa si Inday Laurente ng pamunuan ang atake ng Lady Bombers kasunod ng 13 excellent sets, kung saan naging pinakamalaking nabahagian si Karyla Jasareno na tumapos ng 13 puntos upang makabawi sa unang laro laban sa University of Perpetual Help Altas sa bisa ng 25-14, 25-14, 25-21 straight set nitong nagdaang Linggo.

“Nadistribute ni Inday ng mabuti yung bola. Wala siyang specifically sinasabihan na pag set niya ng bola, ibato mo dito,” wika ni JRU coach Mia Tioseco. “It’s more of basta kailangan ng points, kung sino nasa harap dun niya bibibigay yung bola,” dagdag ni Tioseco.

Naging malaking tulong rin ang siyam na puntos na ambag ni Mary May Ruiz upang bigyan ang tropa ni Tioseco ng unang panalo, kung saan nagbigay sa JRU ng kapabalidad na kayang kaharapin ng koponan ang anumang pagsubok na pagdaraanan sa mga susunod na laro.

“I’m happy they get to feel and ma-realize nila yan ang game nila,” wika ni Tioseco, na paunti-unting kinakapa ang grupo kasunod ng isinagawang rebuilding sa pagkakawala ng mga mahahalagang manlalaro sa nagdaang seson habang nakikipagpambuno para sa pwesto sa Final Four. “We want to make the Final Four, but more importantly, I also want the younger ones to be able to fight during games, laban lang sila dapat,” saad ni Tioseco.