DLSU Lady Spikers matibay sa F4 kahit wala si Canino

ni Gerard Arce @Sports | April 5, 2024

Mga laro sa Martes (Abril 9)

(Smart Araneta Coliseum)

2 p.m. – Adamson vs FEU

4 p.m. – La Salle vs UE

Tinudla ng De La Salle University Lady Spikers ang pagpapatibay sa pwesto sa Final Four kahit na wala ang pangunahing pambato nito na si Rookie/MVP na si Angel Anne Canino matapos ang matakasan ang mahirap na pagsubok na hatid ng University of the Philippines Lady Maroons sa pamamagitan ng fourth set 26-24, 25-20, 24-26, 27-25 kahapon sa unang laro ng 86th season ng UAAP women’s volleyball tournament sa SM Mall of Asia Arena sa Pasay City.

Nagtulong-tulong ang mga manlalaro ng Lady Spikers upang punan ang kawalan ng 20-anyos na outside hitter na dumating sa MOA Arena na nakasuot ng sling na natatakpan ng jacket, kung saan maaaninag ang naka-cask na kanang kamay, para makuha ang kanilang ika-walong panalo laban sa isang talo para sa solong ikalawang pwesto at mapatibay ang Final Four spot.

“Nagkaroon ng accident sa arms nya, so, day by day inaalam pa,” wika ni assistant coach Noel Orcullo sa sa post-press conference kahapon.

Nagawang pagbidahan ni opposite spiker Shevana Laput ang Lady Spikers ng kumana ito ng kabuuang 21 puntos mula sa 18 atake, dalawang blocks at isang ace kasama ang tatlong excellent digs, habang sumuporta ang mga beteranong sina Alleiah Malaluan na halos bumuhos ng triple-double sa 17pts mula sa 16 atake at isang ace, 11 excellent receptions at siyam na excellent digs, gayundin si Maicah Larroza sa triple-double sa 12pts mula sa 11 kills.       

Solomon at Belen, malakas sa Lady Bulldogs vs. UE

ni Gerard Arce @Sports | April 4, 2024

Mga laro ngayong Huwebes (MOA Arena)

2 p.m. – UP vs La Salle

4 p.m. – Ateneo vs FEU

Nagpamalas ng matinding opensa at depensa ang National University Lady Bulldogs upang madaling lapangin ang University of the East Lady Warriors sa pamamagitan ng straight set sa 25-14, 25-14, 25-12, kahapon sa unang laro ng 86th UAAP women’s volleyball tournament sa MOA Arena sa Pasay City.

Pinangunahan ni opposite spiker Alyssa Solomon ang atake ng Lady Bulldogs sa pagkana ng 14 puntos mula sa 12 atake at tig-isang ace at block kasama ang 5 excellent digs, habang sumegunda sa puntusan si dating Rookie/MVP Mhicaela “Bella” Belen na kumana naman ng panibagong triple-double sa 13pts mula sa 8 kills, apat na blocks at isang ace, kasama ang 10 excellent digs at 10 excellent receptions.

Nag-ambag din sa opensa si Vange Alinsug sa 9 na puntos, apat na digs at dalawang receptions, gayundin sina Chamyy Maaya sa walong puntos, team captain Erin Pangilinan sa anim puntos at 13 excellent sets ni ace playmaker Camila Lamina.

Dahil sa panalo ay umangat sa 8-2 kartada ang Jhocson lady squad na kinubra ang kanilang three-game winning streak kaantabay ang malaking momentum na panalo na nakuha kontra sa nangungunang University of Santo Tomas Golden Tigresses.

Bumanat ng kabuuang 47 atake ang Lady Bulldogs kaantabay ang 10 matinding blocks kasama pa ang anim na aces at 12 errors ng katuggali, habang bumagsak naman sa 2-7 marka ang UE Lady Warriors.

Nalimitahan naman sa kanyang pinakamababang produksyon si Casiey Dongallon sa 6 na puntos lamang mula sa atake kasama ang anim na digs at apat na receptions, gayundin ang kanilang main middle blocker na si Riza Nogales sa anim na puntos. 

HD Spikers at Foxies habol ang chance sa semis slot

ni Gerard Arce @Sports | April 4, 2024

Mga laro ngayong araw (Philsports Arena, Pasig City)

4 n.h. – Farm Fresh vs Cignal

6 n.g. – NXLed vs Strong Group

Importanteng koneksyon ang kinakailangang kunin ng Cignal HD Spikers laban sa determinadong Farm Fresh Foxies na parehong naghahanap ng tsansang makakuha ng silya sa semifinal round, habang hanap ng NXLed Chameleons at Strong Group Athletics na matuldukan ang kanilang losing skid sa pagpapatuloy ng umiinit na tagpo ng elimination round ng Premier Volleyball League (PVL) All-Filipino Conference ngayong araw sa Philsports Arena sa Pasig City.

Nais makabawi ng HD Spikers sa 5th set na pagkatalo kontra sa defending champions na Creamline Cool Smashers sa 28-26, 25-22, 22-25, 21-25, 14-16 para hanapin ang mahalagang panalo upang manatiling buhay ang tsansa sa pwestuhan patungong Final Four semis round na hahataw sa pambungad na laro sa alas-4:00 ng hapon, na susundan naman ng mag-two-game losing skid na NXLed at bokyang panalo ng Strong Group sa alas-6:00 ng gabi.

Dahil sa nakuhang pagkabigo ay bumagsak sa 4-2 kartada ang Cignal para sa ika-anim na puwesto, subalit dalawang laro lang ang diperensya ng anim na koponan, kung saan mahalagang mapagwagian ng HD Spikers ang panalo kontra sa palabang grupo ng Farm Fresh, habang sunod na kakaharapin ang Chert Tiggo Crossovers, Petro Gazz Angels, at PLDT High Speed Hitters at tatapusin ang liga kontra Capital1 Solar Energy Spikers.

Patuloy na sasandal ang Cignal sa mga pambatong manlalaro na sina dating league MVP Ces Molina, ace playmaker Gel Cayuna, Jovelyn Gonzaga, Roselyn Doria, Ria Meneses at Vanessa Gandler laban sa magbabawing Farm Fresh, na may two-game losing skid laban sa Petro Gazz at PLDT, na pangungunahan naman nina Trisha Tubu, Rizza Cruz, Kate Santiago, ace playmaker Louie Romero, Chinnie Arroyo at Caitlin Viray.