Biyahe at pasyal ng lahat ng edad, aprub sa M'cañang

ni Lolet Abania | June 1, 2021

Pinayagan na ng gobyerno ang pagluluwag ng mga restriksiyon kaugnay sa COVID-19 para sa domestic travel habang inaprubahan ang mga leisure trips mula sa NCR Plus at mga lugar na nasa ilalim ng general community quarantine (GCQ) at modified GCQ anumang edad ng biyahero o lahat ng edad mula Hunyo 1 hanggang 15.

Sa isang press briefing ngayong Martes, sinabi ni Presidential Spokesperson Harry Roque na ang nasabing pagbiyahe ay pinapayagan na subalit dapat na negatibo sa test sa COVID-19 ang lahat ng mga travelers at sumusunod sa mga guidelines na ipinatutupad ng lokal na gobyernong kanilang pupuntahan.

Gayunman, nilinaw ni Roque na ang pagluluwag sa travel requirements ay pinapayagan lamang kung ito ay point-to-point travel. Binubuo ang NCR Plus ng mga lugar ng Metro Manila, Bulacan, Cavite, Rizal at Laguna.

Gayundin, ayon kay Roque, aprubado na rin ang outdoor non-contact sports, 30% operating capacity para sa mga venue meetings o conferences, 40% operating capacity para sa personal care services, at 30% sa outdoor tourist attractions para sa mga lugar na nasa ilalim ng GCQ with heightened restrictions, kabilang dito ang Metro Manila.

GCQ sa NCR Plus atbp., extended

ni Mary Gutierrez Almirañez | June 1, 2021

Mananatili sa general community quarantine (GCQ) ang buong NCR Plus simula June 1 hanggang 15, batay sa inanunsiyo ni Pangulong Rodrigo Duterte sa kanyang public address kagabi, May 31.

Kabilang sa NCR Plus ang buong National Capital Region at mga kalapit na probinsiya, katulad ng Cavite, Laguna at Rizal.

Samantala, extended naman ang GCQ hanggang June 30 sa mga sumusunod na lugar:

• Baguio City

• Kalinga

• Mountain Province

• Abra

• Isabela

• Nueva Vizcaya

• Quirino

• Batangas

• Quezon

• Iligan City

• Davao City

• Lanao del Sur

• Cotabato City

Ilalagay naman sa modified enhanced community quarantine (MECQ) o mas mahigpit na quarantine classifications hanggang June 15 ang mga susunod pang lugar:

• City of Santiago, Cagayan

• Apayao

• Benguet

• Ifugao

• Puerto Princesa City

• Iloilo City

• Zamboanga City

• Zamboanga Sibugay

• Zamboanga del Sur

• Zamboanga del Norte

• Cagayan de Oro City

• Butuan City

• Agusan del Sur

Matatandaan namang nagkasundo ang 17 Metro Manila mayors sa rekomendasyon na panatilihin sa GCQ ang NCR, habang paunti-unting binubuksan ang ekonomiya.

3 days nag-party, 54 nagpositibo sa COVID-19 sa QC

ni Mary Gutierrez Almirañez | May 24, 2021

Limampu’t apat ang nagpositibo sa COVID-19 matapos dumalo sa 3-day improvised pool party at inuman session na ginanap sa covered court ng Barangay Nagkaisang Nayon, Quezon City, ayon kay Mayor Joy Belmonte.

Batay sa panayam sa alkalde ngayong umaga, naging super spreader ng virus ang naganap na event, kung saan 610 indibidwal ang dumalo.

Aniya, “Nagkaroon ng improvised pool party. Merong diskuhan, may sayawan, may inuman, may videoke. Kumpleto po at walang nagsusuot ng mask."

Ayon pa sa ulat, kaagad na pinuntahan ng contact tracer ang nasabing lugar upang mag-conduct ng contact tracing at interview sa naging close contacts ng isa na unang nagpositibo sa COVID-19. Doon lamang nila nalaman ang nangyaring 3-day event.

Sabi pa ni Belmonte, "Sa pagko-conduct nila ng interviews sa taumbayan, saka pa lang nila nalaman na nagkaroon pala ng 3-day fiesta celebration from May 9 to May 11.”

Sa ngayon ay mayroon pang 18 results ng RT-PCR swab test ang hinihintay na lumabas upang makumpirma ng City Epidemiology and Disease Surveillance Unit (CESU) ang kabuuang bilang ng mga nagpositibo.

Samantala, dinala naman sa HOPE facilities ang mga nagpositibo upang doon mag-quarantine at maobserbahan ang kondisyon.

Nilinaw pa ni Belmonte na pananagutin pa rin nila ang 54 na nagpositibo, kahit sila ay tinamaan ng virus. Pinadalhan na rin nila ng show cause order ang punong barangay, kung saan mismong fire truck pa ng barangay hall ang naglagay ng tubig sa improvised pool na ipinuwesto sa covered court.

“Lahat ng mga mapapatunayang lumabag sa ating guidelines at mga ordinansa lalo na ‘yung mga nagkukumpulan at nag-iinuman o nagka-karaoke ay iisyuhan ng ordinance violation receipt (OVR) at maaaring makasuhan sa ilalim ng RA 11332,” giit pa ni Belmonte.

Matatandaan namang kasalukuyan pa ring nasa ilalim ng heightened general community quarantine (GCQ) ang buong NCR Plus, kabilang ang Quezon City, kung saan limitado lamang sa 30% capacity ang outdoor activities.