GCQ sa Albay, extended, mga resort sarado pa rin

ni Ronalyn Seminiano Reonico | June 17, 2021

Pinalawig ang pagsasailalim sa Albay sa general community quarantine (GCQ) hanggang sa June 30 dahil sa pagtaas ng kaso ng COVID-19.

Ayon kay Gov. Al Francis Bichara, ie-extend ang GCQ sa Albay maliban sa Jovellar at Rapu-rapu towns na mayroong mababang kaso ng COVID-19.

Saad ni Bichara, “The GCQ in all the cities and municipalities in the Province of Albay, except the Municipalities of Jovellar and Rapu-Rapu, is hereby extended until June 30, 2021.”

Nanawagan din si Bichara na mahigpit na ipatupad ng awtoridad ang mga health protocols.

Aniya pa, "All the cities and municipalities shall observe and strictly follow the protocols under the latest Omnibus Guidelines and Resolutions issued by the Inter-Agency Task Force for the Management of Emerging Infectious Diseases (IATF-EID) corresponding to the declared community quarantine category.

"Failure to comply with the said directive shall be a ground for the filing of appropriate cases pursuant to Republic Act No. 11332 and other pertinent laws applicable."

Sa isang teleradyo interview naman, ayon kay Bichara, marami ang nagnanais na ipatupad ang enhanced community quarantine (ECQ) ngunit marami umano ang mahihirapan.

Aniya pa, "Ang iba nag-i-insist na mag-ECQ. Kapag nag-ECQ naman, sarado na naman ang ekonomiya rito, maraming maghihirap dito. Kulang naman ang perang pambigay sa mga ayuda sa mga households."

Ayon kay Bichara, ipinatigil din ng lokal na pamahalaan ang operasyon ng mga resorts upang maiwasan ang pagkakahawahan ng COVID-19.

Aniya, "Ipinahinto muna namin ‘yung mga resorts dahil maraming nagka-karaoke, nag-iinuman.”

Samantala, nanawagan din ng tulong si Bichara sa Department of Health (DOH) para sa pagpoproseso ng RT-PCR tests upang mapabilis ang contact-tracing capacity ng lokal na pamahalaan.

NCR Plus, GCQ “with restrictions” pa rin — P-Du30

ni Ronalyn Seminiano Reonico | June 15, 2021

Mananatili sa ilalim ng general community quarantine (GCQ) na may restriksiyon ang NCR Plus na binubuo ng Metro Manila, Bulacan, Cavite, Laguna, at Rizal hanggang sa katapusan ng Hunyo, ayon kay Pangulong Rodrigo Duterte noong Lunes.

Saad ng pangulo, ang Metro Manila at Bulacan ay isasailalim sa GCQ "with some restrictions" habang ang Rizal, Laguna at Cavite naman ay GCQ "with heightened restrictions."

Isasailalim naman sa modified enhanced community quarantine (MECQ) ang ilang lugar sa bansa mula sa June 16 hanggang 30.

Ang mga sumusunod na lugar ay isasailalim sa MECQ mula sa June 16 hanggang 30, ayon kay P-Duterte: Santiago City at Cagayan sa Region 2; Apayao at Ifugao sa Cordillera Administrative Region; Bataan sa Region 3; Lucena City sa Region 4-A; Puerto Princesa City sa Region 4-B; Naga City sa Region 5; Iloilo City at Iloilo sa Region 6; Negros Oriental sa Region 7; Zamboanga City, Zamboanga Sibugay, Zamboanga Del Sur, at Zamboanga Del Norte sa Region 9; Cagayan De oro City sa Region 10; Davao City sa Region 11; at Butuan City, Agusan Del Sur, Dinagat Islands, at Surigao del Sur sa CARAGA.

Ang mga sumusunod na lugar naman ay isasailalim sa GCQ: Baguio City, Kalinga, Mountain Province, Abra, at Benguet sa Cordillera Administrative Region; Isabela, Nueva Vizcaya, at Quirino sa Region 2; Batangas at Quezon sa Region 4-A; Iligan City sa Region 10; Davao Del Norte sa Region 11; General Santos City, Sultan Kudarat, Sarangani, Cotabato, at South Cotabato sa Region 12; at Lanao Del Sur, at Cotabato City sa Bangsamoro Autonomous Region in Muslim Mindanao (BARMM).

Ang iba pang lugar sa bansa ay isasailalim naman sa modified GCQ, ayon kay P-Duterte.

Samantala, pinalawig din ang travel restrictions na ipinapatupad sa mga pasahero na manggagaling sa India, Pakistan, Bangladesh, Sri Lanka, Nepal, United Arab Emirates at Oman hanggang sa katapusan ng Hunyo.

Gym, super spreader ng COVID, bawal pa rin

ni Ronalyn Seminiano Reonico | June 1, 2021

Ipinagbabawal pa rin ng pamahalaan ang operasyon ng mga gyms sa mga lugar na nasa ilalim ng general community quarantine (GCQ) ‘with heightened restrictions’ kabilang na ang NCR Plus na binubuo ng Metro Manila at mga karatig na lugar, hanggang sa June 15, ayon sa Palasyo.

Ayon kay Presidential Spokesperson Harry Roque, dahil indoor na kadalasan ay air-conditioned, mas posible ang pagkakahawahan ng COVID-19 sa mga gyms.

Saad ni Roque, “Gyms are not allowed until June 15 because it is a matter of it at risk of being a super spreader event due to its nature of activities done indoors, [people] sweating and activities done in close contact.

“This is based on World Health Organization (WHO) and Department of Health (DOH) guidelines that gyms must remain closed for the time being alongside indoor amusement centers, arcades and internet cafes where it is difficult to observe social distancing.

“Pababain muna natin ang mga kaso ng COVID-19.”