250 health workers ng PGH, may COVID-19

ni Lolet Abania | January 8, 2022

Nasa tinatayang 250 healthcare workers ng Philippine General Hospital (PGH) ang tinamaan na ng COVID-19, ayon sa pamunuan ng ospital ngayong Sabado.

“Kung ang gagamitin natin na base ay 1,600 o ipagpalagay mo nang 1,000, mga 250 frontliners,” ani PGH spokesperson Jonas Del Rosario sa Laging Handa public briefing.

Bilang tugon sa pagtaas ng bilang ng COVID-19 admissions, sinabi ni Del Rosario na bahagya nilang binago ang kanilang polisiya hinggil sa updated isolation at quarantine protocols na ipinatutupad ng Inter-Agency Task Force (IATF) para sa mga healthcare workers.

“Basta wala po silang symptoms, tuloy lang po ang trabaho. Kasi po hindi namin kayang i-quarantine ang napakaraming empleyado, doktor, nurses at mga support staff kasi wala na pong matitira rito sa ospital,” ani Del Rosario.

“So ngayon ang policy namin, unless maging symptomatic ka, for example ikaw ay na-expose sa isa na may COVID pero wala ka pa namang symptoms, tuloy lang ang trabaho, hindi ka magku-quarantine. ‘Yan po ang crisis response ng PGH ngayon,” paliwanag ng opisyal.

Ayon kay Del Rosario, para maprotektahan ang kanilang mga healthcare workers laban sa impeksiyon, “leveled up” na ang kanilang personal protective equipment (PPE) na may N95 masks, at nagsasagawa ang pamunuan ng daily monitoring sa kanilang kondisyon.

Nitong Biyernes, inanunsiyo ng Malacañang na inaprubahan ng IATF ang pinaigsing isolation at quarantine period para sa mga fully vaccinated na health workers na na-infect o na-expose sa COVID-19.

“Hospital infection prevention and control committees are authorized to implement shortened quarantine protocols of five days for their fully vaccinated healthcare workers consistent with health care capacity needs and individualized risk assessment,” bahagi ng nakasaad sa IATF Resolution 156.

Gayundin, batay sa IATF Resolution, ang hospital infection prevention at control committees ay maaari ring magpatupad ng shortened isolation protocols laban sa COVID-19 para sa fully vaccinated na healthcare workers kung saan nakasaad, “in extreme circumstances and upon weighing risks and benefits.”

Booster shots para sa frontliners posible bago matapos ang 2021

ni Jasmin Joy Evangelista | September 24, 2021

Posible nang simulan ang pagbibigay ng booster shots sa healthcare workers bago matapos ang 2021 o sa mga unang buwan ng 2022.

Ito ay ayon kay vaccine czar Carlito Galvez Jr. sa pagsalubong niya sa bagong batch ng Pfizer vaccine Huwebes ng gabi sa NAIA.

Pero hihintayin pa rin daw ang mga pag-aaral ng siyensiya hinggil dito.

Iginiit din niya ang kahalagahan ng pagbabakuna sa mga may edad 12 hanggang 17 dahil ginagawa na ito sa ibang bansa at mas mapapabilis din nito ang pagbabalik-eskwela ng mga estudyante.

Samantala, tuloy pa rin ang dating ng mga bakuna at patuloy na tumataas ang vaccination rate sa bansa.

Target matapos sa Disyembre... Memorial wall sa Libingan ng mga Bayani, tribute sa mga frontliners

ni Lolet Abania | August 31, 2021

Target ng gobyerno na matapos bago mag-Disyembre ang konstruksiyon ng isang memorial wall bilang pagkilala sa mga sakripisyong ginawa ng mga nasawing medical frontliners.

Ayon kay National Task Force Against COVID-19 chief implementer Secretary Carlito Galvez, Jr., matatagpuan sa Libingan ng mga Bayani sa Taguig City ang memorial wall, kung saan nakasaad ang kabayanihan ng mga doktor, nars at iba pang medical personnel.

“We will do it [for] maybe 41 days or more or less two months or even less than three months. Before December po tatapusin po namin,” ani Galvez sa Cabinet briefing ni Pangulong Rodrigo Duterte na ipinalabas ngayong Martes.

Una nang sinabi ni Galvez na nakikipag-ugnayan na siya kay Department of National Defense Secretary Delfin Lorenzana at iba pang stakeholders para sa disenyo at lokasyon ng naturang memorial.

Pinasalamatan naman ni Pangulong Duterte ang Armed Forces of the Philippines sa suportang ibinigay nila para sa proyekto.