Aktres, buwis-buhay sa paglambitin… OGIE, AMINADONG NANALO SA MAGPASIKAT DAHIL KAY KIM

ni Vinia Vivar @Frankly Speaking | Oct. 28, 2024

Photo: Team Ogie Kimmy Magpasikat - It's Showtime

Para kina Ogie Alcasid, Lassy and MC, si Kim Chiu ang lucky charm nila kaya nanalo sila sa Magpasikat 2024 ng It’s Showtime (IS).

Ang Fourtastic Combo nga na sina Ogie, Kim, Lassy at MC ang hinirang na champion sa Magpasikat 2024.

Kitang-kita nga ang saya sa apat nang makapanayam ng ABS-CBN after the show last Saturday. Natanong nga sila kung sino ang kanilang lucky charm at walang kagatul-gatol na sagot nina Ogie, Lassy at MC ay si Kim daw.

Pero hirit pa ni Ogie, “At si Pau (Paulo Avelino).”

Natawa naman si Kim sa sinabi ni Ogie.

“Nasama kami sa mga mahuhusay,” sey ni Lassy.

“Nakakatakot (ang) stunts pero sobrang nakakatawa ang team na ‘to kaya nakakawala ng pagod. Tamang timpla kami. Kaya itong moment na ‘to sobrang sarap sa pakiramdam,” sabi naman ni Kim na nakakabilib naman talaga ang buwis-buhay na paglalambitin.

Ayon pa sa aktres ay hindi nga raw nila inaasahang mananalo sila at tanggap na nilang talo sila. Aniya pa, ang grupo raw nila ang may pinakamaigsing oras ng preparasyon. 

“Hashtag acceptance na kami, eh,” sey ni Kimmy.

“Basta nagawa namin nang maayos ang production namin,” dagdag niya.

Ayon kay Ogie, bonus na lang daw ang panalo nila dahil ang mas importante ay naiparating nila ang mensaheng nais nilang sabihin sa manonood.

Ang tema ng Fourtastic Combo ay “Tigil, Hinga, Kalma” at ipinakita nila ang kahalagahan ng pagpapahinga at pagkalma sa gitna ng mga mabigat na pinagdaraanan.

“Nabasa ko (ang mga) comments na naintindihan nila (ang) gusto naming sabihin more than anything else. Nakuha nila,” sey ni Ogie.

---

PERSONAL na nakiramay si Senator Ramon “Bong” Revilla, Jr. sa mga kababayang namatayan at sinalanta ng Bagyong Kristine nang magtungo ito sa Naga at iba't ibang bayan sa Camarines Sur. 

Ayon kay Sen. Bong, nakikidalamhati siya sa masakit at matinding pagsubok na sinapit ng mga kababayan sa Naga. 

“Mula po sa ‘kin, kasama na ang aking pamilya, ay gusto ko pong ipaabot sa inyo ang aming mahigpit na pagyakap! Hindi po kayo nag-iisa sa mga panahon na ‘to. Kasama n’yo kaming titindig para sa inyong muling pagbangon,” ani Revilla. 

Sa buong Bicol Region, aabot sa 28 katao ang namatay habang 78 lugar ang isinailalim sa state of calamity. 

Hinimok ni Sen. Bong ang mga kababayan na sa kabila ng trahedya, huwag mawalan ng pag-asa at sama-samang bumangon. 

“Napakahirap po ng pinagdaanan ng bawat isa. Sobrang nakakahabag ng puso ang sinapit ng ating mga kababayan. Nakakalungkot. Sa totoo lang po, hindi ko lubos maisip ang tindi at hirap na nararanasan ngayon. Ang sakit isipin ang sinapit ng ating mga kababayan,” pahayag ng senador. 

Personal na nag-abot si Sen. Bong ng tulong sa mga kababayang nasalanta ng bagyo. Namahagi siya ng mga tubig, relief packs at iba pang pagkain para sa mga kababayan.

Natagalan aniya ang pagdadala ng tulong dahil marami pang kalsada at tulay ang nasıra at hindi madaanan dahil sa hagupit ni Kristine. 

“Basta tatandaan n’yo po, hindi tayo dapat mawalan ng pag-asa. Tuloy po ang buhay at hindi po kayo mag-iisa sa pagbangon at muling pagsisimula,” saad ng aktor-pulitiko.

Kinuhang guest sa show… OGIE, IPINAG-SHOPPING ANG BINI SA USA

ni Vinia Vivar @Frankly Speaking | Oct. 27, 2024

Photo: BINI PH - Roldan Castro, FB / Circulated

Ang bongga naman ni Ogie Alcasid dahil ipinag-shopping niya ang BINI sa Los Angeles kamakailan.

Kuwento ni Ogie sa mediacon niya for his upcoming concert, OgieOke 2 Reimagined kung saan ay isa sa mga guests niya ang BINI, noon pa man daw ay natutuwa siya sa nasabing girl group at masaya siya na nasaksihan niya ang pagsikat ng mga ito.

Kung paano niya napapayag ang grupo at ang Star Magic na mag-guest ito sa kanyang concert, kuwento ni Ogie, “Actually, mayroon kaming collab na gagawin. It’s entitled Sige, Galaw, Galaw. Dapat ire-record na namin nitong November, pero hindi natuloy kasi nga, bigla silang nag-concert sa Araneta. So, medyo busy sila.”

Patuloy niya, “So, nakiusap sila na kung puwede ba na next year na namin i-record ‘yung collab. Sabi ko, walang problema.”

Next scenario ay nagkita raw sila sa Los Angeles for ASAP at biniro raw niya ang mga ito ng “Gusto n’yong mag-shopping?”

Siyempre, oo lahat ang mga girls at nagsigawan pa nga. Kaya binigyan niya raw ng pang-shopping.

“Natutuwa lang kasi ako sa mga batang ‘yan and I’ve always been a supporter of them. So their success is something that I’m blessed to see, to witness. So, natuwa lang ako. Parang regalo ko lang sa kanila ‘yun,” sey ni Ogie.

“Nu’ng tinanong ko kung puwede ba silang mag-guest (sa OgieOke 2), walang kaabug-abog, ‘Of course, we’ll adjust to your schedule,’” kuwento ng OPM singer.

Napakadali nga raw kausap ng handlers at management ng BINI kaya naman sobrang thankful daw niya.

“In fairness to them, hindi sila sumingil sa ‘kin. Parang ang sabi sa ‘kin, ‘Bahala na kayo,’” aniya.

“Baka ‘yung pang-shopping (na ibinigay) ko, ‘yun na ‘yun,” biro pa ni Ogie.

“But no, of course, we allotted a talent fee for them,” sey niya.

When asked kung saan niya ipinag-shopping ang mga girls, sey ni Ogie, “I think, nag-Sephora (beauty and cosmetic shop) yata sila. Mahilig pala talaga sila sa make-up.”

Kakantahin ng BINI sa concert ni Ogie ang hit song nilang Salamin, Salamin at magdu-duet sila ng Dito Sa Puso Mo.

Ogie also revealed na magdu-duet din sila ni BINI Maloy ng bagong version ng Hanggang Ngayon.

Bukod nga sa collab nila ng BINI, ang isa pang bagong makikita sa OgieOke 2 Reimagined ay ang mga bagong arrangements ng kanyang mga hit songs.

“I’ll be singing mostly reimagined version of my songs. Marami akong ini-ready na mga bagong arrangements,” aniya.

Uulitin din daw niya ang performance niya sa Magpasikat 2024 kung saan ay tumugtog siya ng piano while singing.

---

PANAY ang pag-iikot ni Sen. Bong Revilla nitong mga nakaraang araw sa mga nasalanta ng Bagyong Kristine sa Cavite.

Kasama ang asawang si Cong. Lani Revilla at anak niyang si Agimat Partylist Representative Bryan Revilla ay naglunsad sila ng Relief Operations sa Bacoor, Cavite at makikita nga sa kanyang Facebook (FB) page ang mga tulong na naihatid na nila.

Caption niya in one of his posts, “Personal nating inihatid ang tulong sa mga kababayan natin sa Bacoor na naapektuhan ng kalamidad. 

Hindi magmimintis ang Alagang Revilla lalo na sa mga panahong tayo’y pinakakailangan ng ating mamamayan. Ibayong ingat po sa ating lahat!”

Bago ang bagyo ay masayang-masaya pa naman si Sen. Bong sa pagkakapasa ng kanyang anak na si Loudette Bautista sa 2024 Physician Licensure Examination o ang Board Exams para sa mga doktor.

Kaagad nga niyang ibinalita sa kanyang FB Live ang magandang balita the moment na natanggap nila ang resulta.

“I’m so happy for my daughter, Loudette. Talaga naman. Meron na tayong certified doctor, woohoo!” masayang wika ni Sen. Bong sa video.

“Thank you, Lord! Maraming-maraming salamat po sa lahat ng nagdasal para sa pamilya for my doktora.

“Grabe ‘yung board exam niya. Talagang. . . 2 weekends ‘yung exam, ‘yung pag-aaral niya, ‘yung pag-review ulit ng lahat ng natutunan niya bilang doktora,” sey pa ng aktor/pulitiko.

Aniya pa ay proud na proud siya sa kanyang mga anak na babae. 

“Meron na akong abogada, meron pa akong doktora na certified na rin. So, wow! Thank you, Lord,” sey pa ng mister ni Congw. Lani.

Makikita rin sa post ni Sen. Bong ang pagdalaw niya kinabukasan sa puntod ng kanyang mga magulang para ibalita rin ang pagpasa ni Dra. Loudette. 

“Daddy and Mommy so happy in heaven. May apo na silang doktora (praying and heart emoji),” caption ni Sen. Bong.

Nabanggit din kasi ng aktor na noon pa pangarap ng kanyang amang si former Sen. Ramon Revilla na magkaroon ng anak na doktor pero hindi nga ito natupad kaya at least ay natupad ito kahit sa apo man lang. Kaya bale si Loudette ang kauna-unahang doktora sa pamilya.

Nanghingi ng donasyon sa mga netizens… MADIR AT MGA KAANAK NI BARBIE, NASALANTA NG BAGYO SA BICOL

ni Vinia Vivar @Frankly Speaking | Oct. 26, 2024

Photo: Barbie Imperial - IG

Labis ang pag-aalala ni Barbie Imperial sa kanyang ina at mga kamag-anak na nasa Legazpi, Albay na naapektuhan ng Bagyong Kristine.

“‘Yung iba kong mga auntie, sobrang binaha na ‘yung mga bahay nila,” kuwento niya sa recent interview.

Patuloy ng aktres, “‘Yung mom ko actually, nandoon. Mag-isa lang s’ya kaya medyo kinakabahan talaga ako for her kasi wala talaga s’yang kasama.”

Good thing ay safe naman daw ang kanyang ina, but at the same time ay nalulungkot siya sa sinapit ng kanyang mga kapwa Bicolano.

“Nagpapasalamat ako sa Diyos na okey ang nanay ko, pero of course, I feel bad for all my kababayan,” aniya.

Kaya naman isa si Barbie sa mga tumutulong mangalap ng donasyon para sa mga naapektuhan ng bagyo sa Bicol.

In her Facebook (FB) account ay ipinost ni Barbie ang halaga ng perang nalilikom na nila. 

“P81,896 na po ang nalikom naming pera para sa mga kababayan nating Bicolano,” anunsiyo ng aktres.

“Bibilhin (sic) po namin ito ng mga pagkain, bigas, de-lata, at iba pang mga pangangailangan. Magsisimula na po kaming mag-repack bukas para maiabot natin agad ang tulong. Maraming salamat po sa mga nag-donate. Diyos Mabalos!” anang aktres. 

---

SAMAHAN ang Next Gen Multimedia Star na si Shanaia Gomez na lutasin ang kababalaghang bumabalot sa pagitan ng mundong ibabaw at impiyerno sa iWantTFC horror original na The Gatekeeper, now streaming nang libre at on-demand sa iWantTFC.com.  

Sa kanyang kauna-unahang lead role, gagampanan ni Shanaia ang isang antiques dealer na si Cita Mendoza na makadidiskubre ng misteryosong aparador, na isinumpa palang magsilbing tulay patungo sa kadiliman — ngayong nagbabadya ring makawala ang mga kaluluwang uugnay din sa kanyang masalimuot na nakaraan.  

Mula sa direksiyon nina Matthew at Dean Rosen ng award-winning biopic na Quezon’s Game, ilang taon din ang inabot bago mabuo ang pelikula na kakaiba ang atake sa horror genre, tampok ang blend ng biblical elements sa Filipino folklore. 

Ani Direk Matthew sa naunang interview, “I’ve been working on it since 1984 and it took a lot of research. There’s a lot of stuff to get your head around through it. From the initial discovery that I had in the Holy Land of something mystical that happened 3,500 years ago. I have had to research it because it's not very commonly known.” 

Samantala, pinuri naman ng mga manonood ang kababalaghan factor ng pelikula, pati ang pagganap ni Shanaia sa kanyang very first lead role. 

Libreng mapapanood ang iWantTFC Original na TG sa iWantTFC.com at sa official app nito (available sa iOS at Android). 

Bukod sa TG, ipapalabas din nang libre ang ilang horror classics na swak sa panonood ngayong Undas, tampok ang sariling picks ni Shanaia gaya ng Feng Shui, Segundo Mano, Seklusyon, ‘Wag Kang Lilingon, The Ghost Bride, Shake, Rattle, Roll XV, atbp..

Mapapanood din ang iWantTFC sa mas malaking screen sa piling devices. Available na rin ang iWantTFC via Chromecast at Airplay.