Nawawala, pinaimbestigahan ni Sen. Lito… AZENITH, LULONG DAW SA CASINO, IPINA-REHAB NG 4 NA ANAK

ni Vinia Vivar @Frankly Speaking | November 29, 2023

Nag-alala rin si Sen. Lito Lapid sa balitang nawawala ang kaibigan niyang veteran actress na si Azenith Briones kaya pinaimbestigahan din daw niya kung ano ang nangyari.

“Pumunta ‘yung kapatid niya sa ‘kin, hinahanap si Azenith. Eh, sabi ko, ‘Ano ba'ng problema?’

Eh, sabi niya, ipina-rehab daw ng mga anak, ‘yung 4 na anak niya, dahil nalulong daw sa casino. Ewan kung totoo,” kuwento ni Sen. Lito sa ginanap na early Christmas lunch with the entertainment press kahapon.

“Pinaimbestigahan na namin ‘yan, kasi, hindi kami puwedeng pumasok dahil pamilya, problema ng pamilya ito, eh. Kasi ‘yung apat na anak, parang pumirma sila. Pinaimbestigahan ko na rin. Ipare-rehab ‘yung nanay nila. Siyempre, wala akong magagawa ru’n."

Basta ang inalam daw niya ay kung buhay ba talaga at kinumpirma naman daw ng doktor sa rehab na nandoon si Azenith.

“Buhay naman, nandu'n. Cinertify naman ng doktor na nandu'n siya,” sabi ng action star-pulitiko.

Samantala, tulad din sa FPJ’s Ang Probinsyano kung saan ay muling tumaas nang bonggang-bongga ang kanyang popularidad, pinag-uusapan din ngayon si LL sa FPJ’s Batang Quiapo bilang si Supremo.

Isa siya sa malalaki ang kontribusyon sa FPJBQ lalo na nga sa mga matitinding action scenes.

At his age, kayang-kaya pa ni Sen. Lito ang mga buwis-buhay na action scenes and take note, siya talaga ang gumagawa ng stunts niya at ayaw niyang magpa-double.

“Alam kasi ng tao, stuntman ako, kahit noong nag-uumpisa ako sa Jess Lapid Story, hindi tayo nagpapa-double,” sey niya.

Pero aminado naman siyang maingat na rin siya sa paggawa ng mga death-defying stunts dahil hindi na siya bumabata.

“Medyo umiilag na rin ako, siyempre, may-edad na rin, eh. Ang sinasabi nila, baka ma-Eddie Garcia ako, huwag naman sana. At ‘yun nga, nag-iingat na rin ako, baka ang iniisip ko, kaya ko, ‘yun pala, ang katawan ko, hindi na. 'Yun ang ikinakakaba ko,” sey ni Supremo.

Good thing, sa tinagal-tagal daw niya sa paggawa ng stunts ay wala pa naman siyang nagiging bali sa katawan.

“Sa tagal-tagal ko sa pelikula, ang dami ko nang kababalaghan na ginawa, mga stunt, mga ganito, hinahampas sa mesa, pero wala pa akong bali hanggang ngayon. Sana, huwag naman,” pahayag ni LL.

KC, WISH NA MABUO ANG FAMILY NILA NINA SHARON AT GABBY

ni Vinia Vivar @Frankly Speaking | October 26, 2023

Ang daming napaiyak sa post ni KC Concepcion sa kanyang Instagram page na childhood photos niya with her parents, Sharon Cuneta and Gabby Concepion, at isang liham niya sa kanyang ina written when she was a child.

Sa naturang liham kasi ay sinasabi niya na sana raw ay mabuo na ang kanilang pamilya.

“Dear Mommy, I hope I can go with you now. I love you so much. I will write you always again okay, sana Papa stays with us so we will be a complete family like what you said in your letter I love you so much talaga okay,” ang nilalaman ng sulat ni KC kay Sharon noong bata pa siya.

Touched ang mga netizens at ramdam na ramdam nila ang sinseridad sa hiling ng isang batang musmos na makumpleto ang kanyang pamilya.

Komento ni Ruffa Gutierrez, “Soooo touching.”

Sey naman ng isang netizen, “I hope Papa will stay with us so we will be a complete family like what you said in your letter. Ang.... sakit.”

Komento ng isa pa, “Naiyak ako dito. You’re so loved by many Ms. @kristinaconcepcion"

Reaksiyon ng isa pang follower, “Happy and sad. KC, hindi na bata pero 'yung wish & longing niya is 'yung makitang buo ang family.”

Sa caption ni KC ay nagpahayag ng excitement ang dalaga na finally ay matutupad na rin ang hiling niya na mabuo sila kahit sa concert man lang.

Bukas (Friday, October 27) na gaganapin ang Dear Heart reunion concert ng mga magulang niya sa SM Mall of Asia Arena.

Tila hindi pa nga makapaniwala hanggang ngayon si KC na mangyayayari ito.

“Sometimes talaga, a fairytale will remain as a fairytale na lamang… Pero that’s okay! Thankful ako sa mga ‘silver lining’ natin in life,” ani KC.

“Imagine, 3 days na lang at magsasama na sila Mama and Papa in a musical celebration after so many years… May ganito pa palang puwedeng mangyari!!!‍” patuloy pa niya.

“Fairytale come true pa rin naman, 'di ba?” aniya pa.

RICCI, ILANG BESES NANG NAHULI NI ANDREA NA MAY BABAE SA CONDO, TODO-PALUSOT PA

ni Vinia Vivar @Frankly Speaking | July 1, 2023

Bagama’t nagbigay na ng kanyang panig si Ricci Rivero hinggil sa breakup nila ni Andrea Brillantes at nagpaliwanag na tungkol sa diumano’y babaeng nahuli ng aktres sa kanyang condo, hindi pa rito natatapos ang lahat dahil marami ang hindi umayon sa kanyang mga sinabi.

Sa vlog ni Ogie Diaz with Mama Loi and Dyosa Pockoh ay ini-reveal niyang madalas umanong maabutan ni Andrea ang girl sa condo at hindi lang ito isang beses na nangyari.

Matatandaang ayon sa paliwanag ni Ricci, hindi sa kanya ang girl kundi sa friend niyang isa ring basketball player.

Ani Ogie, “Ito ‘yung naabutan ni Andrea sa unit ni Ricci na nandu’n na naman ‘yung girl. Na naman. And when you say ‘na naman,’ oh, ibig sabihin, ilang beses sigurong nakita na ito ni Andrea Brillantes.”

Dagdag pa niya, may nakatsikahan daw siyang friend ni Andrea na nagsabing nakakawala raw ng respeto ang ginagawa ni Ricci.

“Ito’y according sa kaibigan ni Andrea na common friend naming dalawa. Na parang ang dalas daw kasing nangyayari na nandu’n ‘yung girl.

“Pero ipinaliwanag naman daw ni Ricci kay Andrea. At ito’y naintindihan naman daw ni Andrea na ‘yun ay bisita ng kanyang tropang player,” tsika ni Ogie.

Kinuwestiyon din nila kung bakit kailangang sa unit ni Ricci magkita ang player at girlfriend nito gayung may GF din siya na puwedeng maka-misinterpret.

Oh, ‘di kaya, sana raw ay sinasabi na beforehand ni Ricci kay Andrea para hindi na nagugulat ang aktres at naghinala ng kung anu-ano.

Diretsahang sinabi ni Ogie na ‘echoserong palaka’ lang daw si Ricci sa excuse tungkol sa girl.

Kaya naman, hinamon ni Ogie ang girl at ang basketball player friend ni Ricci na lumantad din para naman mas maging malinaw at hindi masabing ‘echos’ lang ang mga sinasabi ng ex ni Andrea.

Maraming tao kasi ang hindi naniniwala sa paliwanag ni Ricci at katakut-takot na pamba-bash pa rin ang nararanasan nito. Kaya dapat daw ay lumabas din ‘yung girl at BF niya para protektahan din si Ricci.

Well, let’s see kung kakasa sa hamon ang mga kaibigan ni Ricci.

---

STILL on Ricci-Andrea breakup, naglabas din ng kanyang opinyon ang batikang manunulat-radio and TV host na si Cristy Fermin tungkol sa issue at hindi rin niya nagustuhan ang ginawang pagsasalita ng basketbolista.

“Tama ba naman na pati ‘yung pagtulog nila sa bahay ng isa’t isa, ikuwento pa ng kalalaking tao, ‘di ba, ang daldal? Napakadaldal,” sey ni ‘Nay Cristy.

“Si Andrea nga, walang sinasabi, ‘di ba? Kababaeng tao pa. Tapos ‘yung lalaki, eh, kuda nang kuda.”

Payo ni ‘Nay Cristy kay Ricci, “Dapat may garter ang dila, alam kung ano ang nararapat sabihin sa publiko, alam kung ano ang kailangang kanila na lang.”

Samantala, pinuri rin ni ‘Nay Cristy ang tahimik na pagmu-move on ni Andrea.

Hindi raw ito nagsasalita sa issue at tila wala ngang nangyaring breakup nang makita ito na nagsasayaw at nag-e-enjoy sa concert ni Bruno Mars.

“Maaaring nandu’n ang pagtatakip sa kanyang emosyon. Ang maganda lang, mahusay magdala si Blythe, ‘di ba? Mahusay siyang magdala ng problema.

“Bakit mo nga naman masyadong iiyakan? Ba’t nga naman matatapos ang mundo mo nang dahil lang sa isang lalaki na nanakit sa 'yo?” sey ni ‘Nay Cristy.