Ibinuking ng writer ng show sa socmed… XIAN, NAPAKAHIRAP KATRABAHO

ni Vinia Vivar @Frankly Speaking | May 10, 2024

File photo: Xian Lim

Usap-usapan ngayon sa online world ang hindi magandang komento ng GMA Network writer na si Brylle Tabora kay Xian Lim.

Nag-react kasi ang naturang writer sa post ng Esquire Magazine kung saan nga ay nagkaroon ng exclusive interview si Xian at inamin ang relasyon nila ni Iris Lee.

Makikita sa post ng Esquire ang quotation ni Xian na “When I love, I go all out.”

Sa comment section ay makikita ang reaksiyon ni Brylle at dito ay sinabi niyang napakahirap daw katrabaho ni Xian at ginawa raw miserable ang buhay niya.

“What a friggin joke, and he's also super difficult to work with. Made our lives as TV writers miserable,” ang matapang na statement ni Brylle.

Si Brylle ang writer ng Hearts on Ice, isang drama series na pinagbidahan ni Xian na inere last year sa GMA-7.

Anyway, bukas ang aming kolum para sa pahayag ni Xian sa isyung ito.

Para raw sa mga anak… CLAUDINE, AYAW MAGDYOWA HANGGA’T ‘DI PA ANNULLED KAY RAYMART

ni Vinia Vivar @Frankly Speaking | May 9, 2024

File photo: Claudine Barretto

Ayon kay Claudine Barretto ay zero pa rin ang kanyang love life simula nang maghiwalay sila ng asawang si Raymart Santiago at hindi raw siya nag-e-entertain ng mga suitors.

“Wala pa ring laman ang puso ko kundi mga anak ko,” sey ng aktres nang matanong tungkol sa estado ng puso niya sa mediacon ng pelikula niyang Sinag.

Sa mata ng Diyos at sa mga tao na rin ay may asawa pa rin daw siya since hindi pa nga annulled ang kasal nila ni Raymart.

“Sa ilang years kong hiwalay, kasal pa rin ako,” sey niya.

Bagama’t may mga nali-link daw sa kanya, aniya ay walang katotohanan lahat ‘yun.

“Hindi ako nag-a-accept ng suitors ngayon. Although may mga tsismis, pero wala namang proof na meron. Sarado ang puso ko ngayon hanggang ma-annulled,” aniya.

Isa pa ngang rason kung bakit ayaw pa niyang magkaroon ng karelasyon sa ngayon ay dahil sa kanyang mga anak.

“Ayokong makita ng mga anak ko na may ibang lalaki na umaaligid or magkaroon ako ng ibang relasyon until matapos ang annulment namin ni Raymart,” pahayag ng aktres.

At kahit ano pa man daw ang nangyari sa kanilang relasyon ni Raymart, labas naman dito ang mga bata kaya mahal na mahal pa rin ng kanyang mga anak ang kanilang ama.

“They love their dad very much,” sambit ni Claudine sa relasyon ng mga anak kay Raymart.

“Kung anuman ang problem namin ni Raymart, sa amin na lang 'yun. As they grow old, alam na nila kung ano ang nangyayari.

“I explain to them that there are things I have to fight for and this is para sa inyo. Hanggang du’n lang ang explanation ko. ‘Yung mga details, wala na,” saad ng aktres.

Samantala, aktibung-aktibo ulit si Claudine sa kanyang movie career dahil matapos magbida sa pelikulang Loyalista: The Untold Story of Imelda Papin, sisimulan naman niya ngayon ang Sinag, kung saan ay kasama niya ang kanyang anak na si Quia Aryanna.

Ayon kay Claudine, tinanggap niya ang Sinag dahil sobrang nagustuhan daw niya ang script. May pagka-fantasy ang movie kung saan ay gaganap siya bilang diwata, but at the same time ay tatalakay din sa iba’t ibang issues na napapanahon.

Sey ni Direk Elaine Crisostomo about the film, “It will be women empowerment, LGBTQ equality, meron tayong PWD awareness, so halos lahat ng awareness, bullying, meron din po tayo, so all-in-one po ang pelikula.”

Magsisimula na ang shooting ng Sinag ngayong May 28.

Pinakamalaking karma raw niya hanggang ngayon… CLAUDINE, SINISISI ANG SARILI SA PAGKAMATAY NI RICO

ni Vinia Vivar @Frankly Speaking | May 6, 2024

File photo: Claudine Barretto

Mahigit dalawang dekada na buhat nang pumanaw ang dating matinee idol na si Rico Yan pero hanggang ngayon, ay sariwang-sariwa pa rin sa alaala ni Claudine Barretto ang mga nangyari na parang kahapon lamang ito naganap. 

Sa panayam ni Ogie Diaz kay Claudine sa latest vlog niya ay ikinuwento ng aktres ang mga pangyayari sa kanilang relasyon ni Rico hanggang sa pumanaw ito nu’ng March 29, 2002.

Actually, kung hindi kami nagkakamali, parang ito nga ang unang pagkakataon na nagkuwento ang aktres ng mga detalye sa kanilang relasyon at sa pagkamatay ni Rico.

Kuwento ng aktres, that time ay magka-live-in sila ni Rico pero nakikipaghiwalay na raw siya talaga noong November, 2001. 

“Ang nangyari was, November, 2001, nasa Ad Congress siya. Pag-uwi niya, end of November, may nalaman ako at naghiwalay kami. Pero we were still staying under the same roof.

“And ang usapan is January, move out. He was really sorry and he was asking pa na ayaw pa niyang umalis,” pagre-recall ni Claudine.

That time ay ginagawa raw nila ang movie nilang Got To Believe, na matatandaang ipinalabas ng February 27, 2002 na naging box office hit.

“So, parang sabi ko, ‘O, sige, let’s be professional, let’s work, pero hindi na tayo magkakabalikan kasi hindi na ako magiging ‘yung Claudine na gusto mo, na Claudine na minahal mo,’” kuwento ng aktres.

Dagdag pa niya, “Ang tagal kong pinrotektahan ‘yung pangalan ni Rico, pareho kaming may mali. Hindi ko lang talaga matanggap ‘yung time na ‘yun, kung anuman ‘yung nangyari during Ad Congress.”

Dumating ang January, 2002, sinabihan daw niya si Rico na kailangan na nitong umalis sa kanyang condo pero na-delay nang na-delay hanggang sa dumating ang buwan ng Marso.

“Tapos sabi ko, ‘Wala nang balikan ‘to, ‘yun na, let’s remain friends,’” aniya.

Nag-away daw sila ng March 4 at umabot ng March 5, pero nilinaw ni Claudine na hindi totoo ang lumabas na balita that time na sinaktan siya ni Rico.

“‘Yun ang gusto kong iklaro, ever. Hindi naman s’ya perfect, hindi ako perfect. Nagsigawan kami pero hindi umabot sa nananakit, hindi siya ganyan,” kuwento ni Claudine.

Ipinagtapat ng aktres na pinagsisisihan niya ‘yung gabi na tumawag si Rico sa kanya bago ito natagpuang patay sa kuwarto sa Dos Palmas Resort sa Palawan.

“March 29 ng madaling-araw, tumatawag siya,” aniya.

“Binlock ko ‘yung number n’ya. So, parang sinabi ng sister n’ya, ‘yung last call niya was sa sister niya at sa akin, 7 phone calls ‘yun na hindi ko talaga sinagot.”

Dagdag niya, “Alam mo ngayon, naisip ko, baka ‘yun ‘yung pinakamalaking karma ko.”

Tandang-tanda pa rin ng aktres ‘yung moment na nalaman niya na wala na si Rico that morning at umiiyak niya itong ikinuwento. Nasa Subic daw sila ng kanyang family that time at ang daddy niya ang nag-break ng news sa kanya.

“Hinawakan ako ng dad ko, both my hands, sobrang tight, and then he looked straight in my face and sabi n’ya sa akin, ‘Dine, you know that Rico is in Puerto Princesa, right?’ ‘Yes,’ sabi ko. Pero gumaganu’n (kumakabog) na ‘yung heart ko. ‘This morning,’ tapos nag-crack ‘yung voice niya, ‘they found him dead,’” umiiyak niyang kuwento.

“And alam mo ‘yung parang lumiit ‘yung kuwarto, parang dumilim and then I started shouting, ‘Open the blinds, open the lights,’” pagre-recall pa ng aktres.

Napag-usapan din nila ang tungkol sa pagbabawal ng pamilya ni Rico kay Claudine na pumunta sa burol nito na ayon sa aktres ay hindi niya alam kung bakit.

“Lahat ng ito, inuulit ko lang for the timeline. Pero lahat ‘to, all is forgiven,” sey niya.

Umiiyak pang sabi ni Claudine, matagal siyang nagalit sa sarili niya at sinisisi niya rin ang sarili sa pagkamatay ni Rico.

“Sana, malaman ng tao na dala-dala ko ‘yun araw-araw. Kung nandu’n ako, baka buhay pa siya, alam mo ‘yun?” emosyonal pa rin niyang wika.

“‘Yun ‘yung pinagsisisihan ko, baka kung nandu’n ako, baka nagawan ko ng paraan. Pero hindi rin ako doktor, hindi rin ako Diyos,” aniya.

At sa mga nagsasabing ginagamit niya si Rico dahil patuloy niya itong binabanggit hanggang ngayon, ani Claudine, “No, I just want him to be remembered.”

Ito na raw ang huling beses na pagsasalita niya about Rico at hindi na niya ito ikukuwento pa sa mga susunod niyang panayam.

“He’s already in God’s hands. But he’s always gonna be in my heart,” umiiyak pa ring sabi ng aktres.