Mga tsismis sa karelasyon, ‘di dapat paniwalaan ng Dog para ‘di masira ang samahan

ni Maestro Honorio Ong - @Forecast | July 06, 2021

Ipagpatuloy natin ang pag-aanalisa sa pangunahing ugali at magiging kapalaran ng animal sign na Dog o Aso ngayong Year of the Metal Ox.

Kung ikaw ay isinilang noong taong 1946, 1958, 1970, 1982, 1994, 2006, 2018 at 2030, ikaw ay naiimpluwensiyahan ng animal sign na Dog o Aso.

Kailangang pag-ingatan ng Aso ang kanyang kalusugan, ganundin ang ilang malalapit at mga mahal niya sa buhay. Sa pag-iingat o prevention, mas magiging ligtas at malusog ang buong pamilya.

Bukod sa aspetong pangkabuhayan, magiging positibo rin ang takbo ng career at propesyon sa buong taon, kung saan may mga recognition o pagkilala na matatanggap at maaari ring sa taong ito, tataas ang graph ng kinikita at maaari ring magkaroon ng dagdag na pagkakakitaan sa iba’t ibang larangang iyong pinagkakaabalahan sa kasalukuyan.

Kaya naman kung naghahangad ka na paunlarin pa ang iyong career at pakikisalamuha sa lipunan, ito ang tamang sandali o panahon upang lalo mong dagdagan ang iyong achievement, ganundin ang pakikilahok sa career, propesyon at larangan ng politika.

Sa nasabing mga gawain, career, politika, negosyo, pagkakakitaan, tunay na hindi ka lang uunlad, bagkus, ang lahat ng gawaing ito ay magdudulot din sa iyo ng maligayang karanasan sa buong taon.

Gayunman, sa aspetong pampinansiyal at pagkakakitaan, sa kalagitnaan ng taon, unti-unting aangat ang kita at kasabay nito, dahan-dahan na ring aasenso ang kabuhayan ng pamilya.

Dagdag pa rito, kung hindi gaanong nagtagumpay ang mga pinasok mong proyekto noong 2020, tiyak namang bago matapos ang 2021, isa-isa nang matutupad ang mga napurnadang gawain. Kaya naman tinitiyak na higit na maraming achievement at pagpapala kang matatanggap bago matapos ang Year of the Metal Ox.

Hindi lang mga dati nang layunin at proyekto ang matutupad, bagkus, may pangako ring bago matapos ang 2021, darating din ang iba’t ibang oportunidad ng pagkakakitaan at sa larangan ng damdamin, mga oportunidad na maaari kang makapagrelaks, pansamantalang makalimot sa mga problema at mga karanasang labis o tunay sa iyong magpapaligaya ay dagdag na regalo rin sa iyong karanasan.

Sa pag-ibig at sa pakikipagrelasyon, bagama’t may mga pagseselos at paghihinala na magaganap, lalo na sa kalagitanaan ng taong ito, hindi mo naman dapat palakihin pa at paniwalaan ang mga tsismis na wala namang basehan. Sa halip, ituon mo pa rin ang tiwala at pagmamahal sa iyong kapareha, kaysa magdusa pa ang inyong iniingatang relasyon at ang pagiging buo ng inyong pamilya.

Sa panahong naghihinala kayo sa isa’t isa, subukan mong pasyalang muli ang mga lugar na una n’yong pinuntahan habang binubuo n’yo ang matibay na relasyon, na may pangakong habang namamasyal, ang pag-uusapan lamang ay ang mga nakakikilig na nakaraan kaysa ituon ang isip sa pagseselos, paghihinala at mga walang basehang pagbibintang sa kasalukuyan.

Minsan, hindi magandang tumingin at uliratin pa ang kasalukuyan kung ito ay makagugulo lamang sa relasyon. Sa halip, mas dapat pagtuunan kung paano kayo umpisang nagmahalan at kung paano n’yo binuo ang nakakikilig at masayang relasyon ngayon.

Sa mga single, ngayong Year of the Metal Ox, sobrang laki ng tsansa na matagpuan mo na ang lalaki o babae na magbibigay sa iyo ng maligaya at nakakikilig na relasyon. Gayunman, ‘wag kang masyadong umasa na ang papasuking ugnayan ay magtatagal o magiging panghabambuhay, sa halip, ang isipin mo lang ay ang kasalukuyan. Tandaang dahil maligaya kayo sa kasalukuyan, ituring na ngayon ay may katumbas na ligayang walang hanggan.

Dahil dito, sa panahong kayo ay magkasama, hindi na dapat isipin ang nakaraan at darating. Sa halip, isa lang ang dapat pagtuunan ng pansin, ito ay ang ibigay ang the best at pinakamasarap na romansa at pagmamahal ngayon bago tuluyang masimot ang patak ng maliliit na buhangin sa orasang kristal.

Itutuloy

Alamin: Animal signs na ka-compatible ng Dog

ni Maestro Honorio Ong - @Forecast | July 03, 2021

Ipagpatuloy natin ang pag-aanalisa sa pangunahing ugali at magiging kapalaran ng animal sign na Dog o Aso ngayong Year of the Metal Ox.

Kung ikaw ay isinilang noong taong 1946, 1958, 1970, 1982, 1994, 2006, 2018 at 2030, ikaw ay naiimpluwensiyahan ng animal sign na Dog o Aso.

Sa career at propesyon, ang isang Aso ay tiyak na magiging magaling na lawyer, labor leaders, union organizers, social workers at tugma rin sa kanya ang public service at pagiging manager. Ang mga negosyong may kaugnayan sa arts o sining, ganundin sa lahat ng uri ng kaartehan, kagandahan, pabango, makukulay na mga bagay, musika at pagsasayaw, painting at paglililok ay tugma rin sa isang Aso.

Dahil may likas na karisma at mapang-akit, ang negosyong pag-aalok at daldal nang daldal ay sigurado namang magpapayaman din sa isang Aso. Habang kinukuwentuhan at dinadaldal niya ang mga kliyente at mamimili, lalong lalago at uunlad nang mabilis ang anumang uri ng kalakal na kanyang hahawakan.

Sa pag-ibig at pakikipagrelasyon, sinasabing malakas ang sex appeal ng Aso at kapag siya ay may gusto, bagama’t sa umpisa ay susubukan niyang itago ang kanyang damdamin, pero hindi niya mapipigil, ito ay huhulagpos din. Para sa isang Aso, ang paghanga at pagkahaling ay hindi niya magawang ilihim, kaya kusa niya itong nae-express sa iba’t ibang artistic at loveable na paraan. Dahil dito, bukod sa tapat at totoo umibig, ang Aso rin ay napaka-expressive pagdating sa sex at love. Kaya naman masasabing sobrang tamis at masarap kung siya ay magmahal.

Dagdag pa rito, hangad din ng Aso na maging malaya sa pagdedesisyon, lalo na sa aspetong pandamdamin. Kaya kung sa larangan ng pag-ibig ay pakikialaman at didiktahan mo siya, malulungkot ang isang Aso. Sa umpisa ay mapapasunod mo siya at gusto ng mga nakatataas sa kanya, pero ang totoo, sa umpisa lang ‘yun dahil sa bandang huli, iiral ang ugali niya na naghahangad na makalaya. Kaya ang iniutos at pinagawa sa kanya, lalo na sa pag-ibig at career nang hindi naman niya talaga gusto ay tiyak na susuwayin din niya. Pagkatapos nito, sa mali o tama, basta’t alam niyang nagmamahal siya at doon siya masaya, ‘yun ang gagawin at tatahakin niyang direksiyon. Dahil dito, kadalasan ay napagkakamalan ang Aso na matitigas ang ulo at may matinding paninindigan sa isang bagay na ginusto nila, na akala nilang ‘yun ang tama, pero minsan ay hindi naman.

Sa larangan ng compatibility, compatible ang Aso sa Kabayo, ganundin sa Tigre, sapagkat silang tatlo ay pare-parehong tapat at may matataas na pangarap para sa ibang tao at adhikaing ipinaglalaban. Okey ding makasama ng Aso ang Daga, Ahas, Unggoy at Baboy, sapagkat madali ring makakabuo ng isang makabuluhan at masayang relasyon sa isa’t isa ang nasabing animal signs. Ngunit ang higit sa lahat at nakagugulat, Kuneho ang tunay at higit na ka-compatible ng isang Aso, kung saan inaasahang makabubuo sila ng maligaya at panghabambuhay na relasyon. Sapagkat hindi lang ipinahahalata, sobrang laki ng paghanga at sampalataya ng Kuneho sa Aso. Habang magagawa niya na ipaisip sa Aso na mas masarap ang simpleng buhay pamilya kaysa sa pakikipaglaban at pagpapakita ng idolohiya sa lipunan, mapu-frustrate ang Aso na ituwid at itama ang pagkakamali ng mundo. Kasabay naman nito, darating sa buhay niya ang simple at tahimik na Kuneho upang akayin siya sa pribado at masayang simpleng buhay sa piling ng kanilang mga anak at itataong pamilya.

Itutuloy

Year of the Dog na isinilang sa gabi, agresibo kumpara sa ipinanganak ng umaga

ni Maestro Honorio Ong - @Forecast | June 22, 2021

Sa nakaraang mga araw ay tinalakay natin ang pangunahing ugali at sadlakang kapalaran ng animal sign na Tandang o Rooster ngayong Year of the Metal Ox.

Sa pagkakataong ito, ang mga ugali at kapalaran naman ng animal sign na Dog o Aso ang ating tatalakayin.

Kung ikaw ay isinilang noong taong 1946, 1958, 1970, 1982, 1994, 2006, 2018 at 2030, ikaw ay naiimpluwensiyahan ng animal sign na Dog o Aso.

Ang Dog ay siya ring zodiac sign na Libra sa Western Astrology na may ruling planet na Venus.

Likas na magiging mapalad ang Dog mula alas-7:00 hanggang alas-9:00 ng gabi, habang ang mapalad naman niyang direksiyon ay ang kanluran (west) at hilagang-kanluran (northwest).

Sinasabing higit na matapang, buo ang loob at agresibo ang Dog na isinilang sa gabi kung ikukumpara sa kapatid niyang Aso na isinilang sa araw.

Kung pagiging patas at makatarungan ang usapan, nangunguna rito ang Aso. Kung sila lang ang mamumuno, tiyak na paiiralin nila ang hustisya at katarungan dahil para sa Aso, ayaw na ayaw niyang makakita ng inaargabyado, inaapi at pinagkakaitan ng katarungan. Kaya naman sa propesyon, bagay na bagay sa kanya ang pagiging judge, abogado o politiko kung saan siguradong mapapairal niya ang patas at walang kinikilingang pamamahala.

Bukod sa tinitiyak na paiiralin ang hustisya, kilala rin ang Aso sa pagiging tapat, prangka at may malalim na kaisipan. Para sa isang Aso, hindi puwede ang simpleng solusyon dahil ang pinakamagandang solusyon sa anumang problema ay ito ay nilulutas nang may puso, damdamin at pag-aaruga at pagmamahal talaga sa mga taong namumroblema.

Kilala rin ang isang Aso sa kabaitan at simpatya sa kanyang kapwa, lalo na sa mga inaapi ng tadhana at lipunan. Kapag ganito na ang sitwasyon, makikitang may isang nagmamalasakit talaga sa kapakanan ng mga inaapi at pinagkaitan ng katarungan, kung saan hindi lang malasakit kundi ipinaglalaban din ng Aso ang karapatan ng mahihirap, inaapi at pinagkakaitan ng hustisya.

Kaya naman sa aspetong pulitika at pamumuno, kung sadyang bulok ang gobyerno o sistemang kinamulatan ng Aso, napu-frustrate siya sa ganu’ng sitwasyon, kaya naman gustong-gusto niya itong baguhin agad. Ngunit dahil ang bulok na sistema ng pamahalaan ay matagal nang umiiral sa bansa, pipilitin niya itong itama, baguhin at pairalin ang pagkakapantay-pantay at hustisya. Ngunit kadalasan, nabibigo ang Aso na baguhin ang sistema, kaya naman siya ay nasasadlak sa frustration at kalungkutan dahil hindi niya lubos maisip na nakikita at nararanasan ng mga tao ang mali at hindi makatarungang sistema, ngunit imbes na baguhin ay sinasakyan lamang nila ito at patuloy na pinaiiral.

Dahil dito, kadalasan ay makikitang nag-iisang nakikipaglaban ang Aso sa mga maling umiiral na sistema. Ngunit kahit nag-iisa siya ay patuloy pa rin siyang naninindigan, hanggang sa lumaon, karamihan sa mga Aso ay itinatanghal na martir, human rights leader at bayani.

Itutuloy