Alamin: Animal signs na swak sa personalidad ng isinilang sa Year of the Pig

ni Maestro Honorio Ong - @Forecast | May 7, 2022

Ipagpatuloy natin ang pag-aanalisa sa pangunahing ugali, katangian at kapalaran ng animal sign na Pig, Boar o Baboy ngayong Year of the Water Tiger.

Kung ikaw ay isinilang noong taong 1947, 1959, 1971, 1983, 1995, 2007 at 2019, ikaw ay mapabibilang sa animal sign na Boar, Pig o Baboy.

Dahil likas na matulungin at mapagmahal sa kanilang kapwa, sadya namang lapitin ng suwerte at magagandang kapalaran ang mga isinilang sa Taon ng Baboy. Para sa kanila, kung ano ang nasa puso mo, gawin mo, dahil ang nasa pusong ito ng mga Baboy ay ang likas na pagiging mabuti. Kaya naman sa huli, bumubuti at lalong nagiging buwenas ang kanilang kapalaran.

Dagdag pa rito, batid ng mga Baboy na ang natural na batas ng kalikasan ang magbibigay sa kanila ng suwerte at magandang kapalaran, hanggang patuloy silang naglilingkod sa kanilang kapwa at gumagawa ng kabutihan.

Tulad ng Baka, ang mga Baboy ay nagsisikap at nagtitiyaga, ngunit ang kaibahan nila, ginagawa ito ng mga Baboy nang may arte, lambing at saya dahil ang pagiging malambing at masayahin ay isa sa mga pangunahin nilang katangian.

Kaya naman ang mga Baboy ay hindi basta dinadatnan ng lungkot at kamalasan dahil tulad ng nasabi na, anuman ang dumating sa kanilang bahay, itinuturing nila itong may maganda at mabuting kauuwian dahil batid ng mga Baboy na sadyang malakas sila sa nasa itaas. Kaya anuman ang sapitin nila, sa huli, sila ay kusang pinapatnubayan at binibigyan ng suwerte at magagandang kapalaran ng langit.

Sa pag-ibig, romansa at pakikipagrelasyon, ang mga Baboy ay nahihirapang magtago ng kanilang damdamin o emosyon. Kaya kapag nakursunadahan ka ng Baboy, malamang na sinadya man o hindi, makikita mo agad ang kanilang pagkalinga, lambing at pagmamahal sa iyo. Bukod sa malambing at mapagmahal, tunay ang mga Baboy ay mahusay ding kapareha sa romansa. At dahil hindi niya maitago ang damdamin at pagnanasa, kadalasan ay nauuwi sa kabiguan at pagkadismaya ang unang pag-ibig ng mga Baboy. Subalit tulad ng nasabi na, higit na nagiging maligaya at very satisfied ang Baboy sa ikalawang pag-ibig o pakikipagrelasyon kung ikukumpara sa una.

Samantala, ka-compatible naman ng Baboy ang mahinhin at tahimik na Tupa o Kambing at ang sopistikadong Kuneho. Mauunawaan ng Kambing ang itinatagong damdamin ng Baboy. Habang masasarapan naman ang Kambing sa malambing at mapagkalingang Baboy.

Pagpupursigihan namang ayusin at lalo pang pakikinisin ng Kuneho ang medyo magaspang at padaskol na ugali ng Baboy, habang tuturuan ng Baboy ang Kuneho upang lumakas ang loob at palaging maging positibo ang kanyang mga pananaw sa buhay.

Bukod sa Kuneho at Kambing o Tupa, ka-compatible rin ng Baboy ang Tigre.

Habang ang relasyong Baboy sa Baboy ay maaari namang sa umpisa lang magiging masaya at sa bandang huli ay posibleng mauwi rin sa panlalamig at pagkasawa sa isa’t isa.

Puwede ring makasama ng Baboy ang Daga, Baka, Dragon, Kabayo, Tandang at Aso, dahil ang pagiging excess o paglalabis sa maraming bagay ng isang Baboy ay kayang disiplinahin at limitahan ng nasabing mga animal signs.

Itutuloy

Isinilang sa Year of the Dog, dapat maging showy para sumaya ang love life

ni Maestro Honorio Ong - @Forecast | April 23, 2022

Sa pagpapatuloy ng Forecast 2022, tatalakayin natin ang pangunahing ugali, katangian at kapalaran ng animal sign na Dog o Aso ngayong Year of the Water Tiger.

Kung ikaw ay isinilang noong 1946, 1958, 1970, 1982, 1994, 2006 at 2018, ikaw ay mapabibilang sa animal sign na Dog o Aso.

Sa career at hanapbuhay, bagay sa Aso ang propesyong may kaugnayan sa lawyer, labor leader, union organizers, social worker at iba pang mga gawaing may kaugnayan sa lipunan. Dahil ang mga ito ay ikatatagumpay at ikaliligaya ng Aso ‘pag ang mga ito ay kanyang inaaturga. At dahil sa taglay na pagiging mabuti at palaging inuuna ang moralidad, ang mga Aso ay sinasabi ring pangunahing kandidato sa pagiging bayani, martir at santo o santa.

Sa pakikipagrelasyon at pakikisalamuha sa pamilya, gustong-gusto ng Aso ang pagiging independent o malaya, kaya kadalasan ay hindi mo siya matatagpuang nasa bahay lamang, sa halip, ang nais niya ay maglakbay nang maglakbay at mamasyal sa magaganda at kaakit-akit na lugar, lalo na ang mga lugar na malapit sa kalikasan.

Samantala, kapag umiibig ang Aso, siya ay sobrang magmahal na minsan ay nagiging dahilan upang siya ay mabulag sa pag-ibig, magpakamartir o magpakabayani, alang-alang sa kanyang mga minamahal. Kumbaga, pagdating sa pag-ibig, ang Aso ay madalas maloko sa kanyang object of desire.

Dagdag pa rito, bagama’t sobra kung magmahal, hindi naman siya masyadong demonstrative, kumbaga, hindi siya showy, kaya minsan, ang pag-ibig niya ay hindi gaanong pinahahalagahan ng taong kanyang minamahal. Ngunit kung magiging showy o “demonstrative” siya sa larangan ng pag-ibig, sex at ugnayan, walang pagdududa na sa pakikipagrelasyon, mas madali niyang makakamit ang panghabambuhay na sarap at ligaya.

Sa pag-ibig, hindi siya mandaraya. Kung gaano nagiging tapat at totoo ang kanyang karelasyon, higit pa ru’n ang igaganti niyang pagmamahal sa kanyang kasuyo.

Bagay na bagay naman sa Aso ang Tigre at Kabayo dahil ang ganitong relasyon ay tiyak na magiging maligaya at panghabambuhay dahil pare-pareho silang tapat at masarap magmahal.

Bukod sa Tigre at Kabayo, tugma rin sa Aso ang mabait na Daga, ang matalinong Ahas, at ang tusong Unggoy, ang mahilig na Baboy at ang kapwa niya malihim na Aso, kung saan ang ganitong relasyon ay babalutin naman ng walang kahulilip na lambingan at sila rin ay itatala bilang masaya at okey na magkakasama.

Habang ang madalas namang matagpuang habambuhay na nagmamahalan at itinatala ang relasyon na walang iwanan ay ang Aso at Kuneho, kung saan lihim at matagal na palang hinahangaan ng Kuneho ang Aso na noon niya pa pangarap makasama. Habang ang Aso naman ay hangang-hanga rin sa pagiging tahimik, mapagpakumbaba at kapareho niyang matalino at palaging nangangarap na Kuneho.

Itutuloy

Year of the Rooster, sobrang bilib sa sarili at naniniwalang mas magaling kaysa sa iba

ni Maestro Honorio Ong - @Forecast | April 7, 2022

Ipagpatuloy natin ang pag-aanalisa sa pangunahing ugali, katangian at magiging kapalaran ng animal sign na Rooster o Tandang ngayong Year of the Water Tiger.

Kung ikaw ay isinilang noong 1945, 1957, 1969, 1981, 1993, 2005 at 2017, ikaw ay mapabibilang sa animal sign na Rooster o Tandang.

Dahil mahilig mamintas at pumula sa mga kahinaan at pagkakamali ng kanilang kapwa, kadalasan, hindi masaya ang Tandang na makisalamuha sa mga kaibigan o lipunang kanilang ginagalawan dahil mas nauuna nilang makita ang pagkakamali ng kanilang kapwa kaysa sa mga tama nitong nagawa.

Dahil dito, minsan ay nagiging mailap ang Tandang sa kanyang mga kaibigan at kasamahan. Isang halimbawa nito ay sa trabaho o saanmang institusyon siya kabilang. Gusto man niya o hindi, ‘ika nga ay aloof at may pagka-loner ang Tandang, at minsan ay ‘yun pa rin ang nangyayari sa panahong siya ay nakikisalamuha sa lipunan.

Ang nakatutuwa pa sa Tandang, bagama’t aloof at loner siya, patuloy niyang iniisip na siya ay matalino, magaling at sikat, kaya kapag may pinapapurihan o pinaparangalan, halimbawa sa katalinuhan, habang nasa isang sulok at ‘yung pinaparangalan ay umaakyat na sa stage, bumubulong-bulong ang Tandang sa kanyang sarili at sasabihing, “Paano kaya naparangalan si Mr. Egoy, eh samantalang mas magaling pa ako r’yan?”

Ganu’n lagi ang attitude ng Tandang sa halos lahat ng larangan ng buhay. Palagi niyang naiisip na mas magaling siya sa kanyang kapwa at akala naman niya ay totoong-totoo ito.

Samantala, kapag naman siya ang mapaparangalan o bibigyan ng recognition, ang nasa isip niya naman ay, “Kulang pa ang karangalang ito sa sobrang galing at kakayahan ko.”

Ganu’n kayabang ang Tandang, pero hindi niya ito ipinagsasabi at ipinahahalata dahil hindi naman siya maboka o makuwento dahil likas siyang aloof at inis sa lipunang kanyang ginagalawan.

At dahil sa ugali niyang ito, hindi nahahalata na sa loob ng natatago niyang katawan o unconscious self (na siya lang talaga ang nakakaalam at minsan ay hindi niya pa ito alam), talaga namang ang mga Tandang, bukod sa sobrang bilib sa kanyang kakayahan ay sobrang yabang at akala mo ngang magaling na magaling siya sa lahat ng kanyang kakilala.

Dagdag pa rito, isinilang ang mga Tandang upang ayusin ang lahat ng bagay. Kaya kapag may problema sa opisina o may mga pagtatalo sa umpukang kanyang kinabibilangan, walang duda, isang tao lamang ang may kakayahang makaayos ng lahat ng gulong ito at ito ay walang iba kundi ang Tandang. Tunay ngang ang isa sa natatagong galing at husay niya ay ayusin ang lahat ng gusot at gulo sa mahusay, mabilis at mahusay na paraan.

Dahil magaling siyang mag-ayos at mag-manage, puwedeng-puwede sa kanya na maging supervisor o manager, kung saan nagagawa niyang pakilusin at pagalingin ang mga taong kanyang nasasakupan.

At ‘yun naman talaga ang nangyayari kung ikaw ay may boss o guro na Tandang, siguradong ikaw ay magiging mahusay na empleyado at estudyante dahil sobrang mapalad ka dahil ang nangangasiwa at nagtuturo sa iyo ay napakayabang, ngunit napakahusay ding Tandang.

Itutuloy