Animal signs na swak sa katangian ng Year of the Monkey

ni Maestro Honorio Ong @Forecast | March 11, 2023

Ipagpatuloy natin ang pagtalakay sa mga katangian at magiging kapalaran ng animal sign na Monkey o Unggoy ngayong Year of the Water Rabbit.

Ang Unggoy o Monkey ay silang mga isinilang noong taong 1932, 1944, 1956, 1968, 1980, 1992, 2004, 2016, at 2028.

Sa pag-ibig, kung ikaw ay wala pang karelasyon, mahihitik ang ligaya at masarap na pakikipagrelasyon sa buhay ng Unggoy ngayong Year of the Water Rabbit. Darating nang bigla ang iba’t ibang kulay ng romansa, ngunit sa sandaling ito ay hindi mo iningatan, tulad ng mumunting hamog sa gilid ng dahon tuwing umaga, may posibilidad na bigla rin itong mawala.

Tandaan ang kasabihang, “Bago maglaho at mabura, dapat lang na saidin nang lubos ang sarap at ligaya.”

Sa mga magkasintahan o dati nang may karelasyon, sinasabing may mga tampuhan at hindi pagkakaunawaang maaaring maganap, ngunit anumang problema, paghihiwalay o samaan man ng loob ang mangyari, ang lahat ng ito ay mag-iiwan ng positibong aral sa buhay ng isang Unggoy, upang lalong mapaunlad ang kanyang personalidad na tutulong o magdadala sa kanya upang sa susunod niyang relasyon ay makamit na niya ang maligaya at panghabambuhay na pag-ibig at romansa.

Sa kabilang banda, anuman ang mga kumplikadong bagay na maganap sa buhay pag-ibig ng Unggoy sa taong ito, isa lang ang tiyak, sabi nga sa wikang banyaga, “One lost, ten found” na nangangahulugang bigla mang mawala ang ilang relasyon, marami naman itong magiging kapalit na pansamantalang ikaliligaya ng isang Unggoy na totoo naman dahil ‘yun din ang hanap niya sa buhay — ang hindi magpatali sa isang kasuyo o sa isang karelasyon. Sa halip, nanaisin ng Unggoy na dumanas ng iba’t ibang lasa ng pag-ibig at pakikinabang, partikular ngayong Year of the Water Rabbit na talaga namang mangyayari.

Ngunit kung ikaw naman ay Unggoy na may asawa at masayang pamilya, sinasabing ngayong taon, lalong titibay at sasarap ang inyong pagmamahalan, na magiging daan upang lalong umunlad at sumagana ang kabuhayan ng inyong pamilya.

Sa pag-ibig, pag-aasawa at maging sa romansa, tugma naman sa Unggoy ang Daga na mahilig sumuri at mag-analisa ng mga problema. Ang relasyong Unggoy at Daga ay may malaking posibilidad na umunlad at yumaman dahil kapwa sila magiging mahusay sa paggawa ng pera at sa pagpapalago ng kabuhayan.

Kaakit-akit naman sa isang Dragon ang katusuhan na ipinapamalas ng Unggoy, habang ang Unggoy naman ay handang magpaubaya sa pagiging dominante ng Dragon, kaya sila ay kapwa makakabuo ng masarap at kaaya-ayang relasyon. Madali ring masasakyan ang ugali ng Unggoy ng maramdaming Kuneho, uto-utong Tupa o kambing, pagala-galang Aso, matalinong Kabayo, at masipag na Baka. Sa madaling salita, ang lahat ng nasabing animal signs ay sadyang katugma rin ng Unggoy.

Sa taong ito, kusang iigting ang magandang kapalaran at susuwertehin sa lahat ng aspeto ng buhay ang Unggoy mula sa ika-5 ng Abril hanggang sa ika-4 ng Mayo, mula sa ika-5 ng Mayo hanggang sa ika-10 ng Hunyo, mula sa ika-5 ng Hulyo hanggang sa ika-5 ng Setyembre at mula sa ika-26 ng Nobyembre hanggang sa ika-25 ng Disyembre.

Itutuloy

Suporta ng mga mahal sa buhay, kakailanganin ng unggoy ‘pag nasangkot sa mga intriga ngayong 2023

ni Maestro Honorio Ong @Forecast | March 9, 2023

Ipagpatuloy natin ang pagtalakay sa mga katangian at magiging kapalaran ng animal sign na Monkey o Unggoy ngayong Year of the Water Rabbit.

Ang Unggoy o Monkey ay silang mga isinilang noong taong 1932, 1944, 1956, 1968, 1980, 1992, 2004, 2016, at 2028.

Sa aspetong pagpapamilya, may babala na may panganib na makaligtaan ng Unggoy ang mga bagay na may kaugnayan sa pamilya at relasyon. Kung mangyayari ‘yun, magkakaroon ng bahagyang problema sa nasabing larangan ang Unggoy.

Kaya kung ikaw ay Unggoy, anumang proyekto ang iyong pagkaabalahan, maaaring sa lipunan, negosyo, paglalakbay o saan ka man mapadpad, upang mapanatiling buo at matatag ang pamilya at pakikipagrelasyon sa iyong minamahal, mas mainam kung lagi mo silang alalahanin at bigyang-halaga sa bawat sandali ng iyong buhay ngayong 2023.

Dagdag pa rito, sinasabi na kung palagi mong bibigyang-halaga ang iyong pamilya, gayundin ang mga taong nagmamahal sa iyo at minamahal mo, sila ang aalalay at magtutulak sa iyo upang lalo mong mapalago at mapaunlad ang iyong career at kabuhayan ngayong Year of the Water Rabbit.

Tunay ngang sa tulong ng mga mahal mo sa buhay, maraming recognition o pagkilala ng lipunan ang iyong matatanggap sa buong taon.

Ang isa pang maaaring maganap ngayong Year of the Water Rabbit, kaya kailangang-kailangan ng Unggoy ang suporta at alalay ng kanyang pamilya at mahal niya sa buhay ay maaari siyang mahulog at masuong sa mga kontrobersya at intriga.

Kaya sa panahong maraming lihim at lantarang naiinggit at naninira sa Unggoy, ang pamilya at mga mahal niya sa buhay ang tiyak na aalalay, dedepensa at magtatanggol sa kanya sa buong 2023.

Sa aspetong pampinansyal, sinasabing malalaki at biglaang kita ang mahahawakan ng Unggoy sa taong ito ng Water Rabbit, ang problema lamang, may tendency na malibang ang Unggoy sa maraming gawain at tagumpay na kayang matatamo.

At ang posibleng mangyari, habang siya ay nalilibang sa tagumpay, ang mga pinagkakautangan niya ay posibleng hindi na niya mapansin o mabigyan ng sapat na atensyon, kaya sa huli, makikita na lamang ng Unggoy na lumalaki ang interes o tubo ng kanyang mga utang, habang ang mga taong nakaligtaan niyang bayaran ay sunod-sunod at biglaang maniningil sa kanya.

Kaya kahit sabihin pang sumagana at umunlad ang kabuhayan ng Unggoy, kung magiging pabaya siya sa mga pinagkakautangan, sa halip na kasaganaan ay maaaring legal battle o suliraning panghukuman ang masadlakan niya ngayong 2023.

Itutuloy

Dahil sa malakas na kutob… Isinilang sa Year of the Monkey, nakakaiwas sa pagkalugi ng negosyo

ni Maestro Honorio Ong @Forecast | March 8, 2023

Ipagpatuloy natin ang pagtalakay sa mga katangian at magiging kapalaran ng animal sign na Monkey o Unggoy ngayong Year of the Water Rabbit.

Ang Unggoy o Monkey ay silang mga isinilang noong taong 1932, 1944, 1956, 1968, 1980, 1992, 2004, 2016, at 2028.

Sa 12 animal signs na ipinatawag sa palasyo ni Lord Buddha, Unggoy ang isa sa may pinakamalakas na intuition o malakas na kutob sa mga bagay na mangyayari pa lamang.

Kaya kapag pinairal ng Unggoy ang kanyang intuition, bago pa siya malagay sa panganib, tiyak na siya ay makakaligtas agad.

Ganundin sa negosyo, hindi siya basta-basta malulugi ng malaking halaga dahil kapag malapit nang malugi ang kanyang kalakal, maaamoy niya agad ito kaya tiyak na makaiiwas siya sa mabilis na pagkabangkarote ng kabuhayan.

Bukod sa talas ng intuition, sinasabi ring ang Unggoy ay sobrang praktikal, kung saan ito ang kadalasang naghahatid sa kanya sa pag-asenso ng kabuhayan at tiyak na pagyaman.

Ngayong 2023, bagama’t magkakaroon ng ups and downs sa kapalaran ng mga Unggoy, tinitiyak namang hindi magpapatuloy o pipirmi ang mga negatibong pangyayari dahil anumang pagsubok ang dumating sa buhay ng Unggoy, tiyak na poproteksyunan at ililigtas siya ng langit.

Kaya ngayong Year of the Water Rabbit, mapadpad man ang Unggoy sa dagat na may malalakas na unos at panganib, hindi siya magtatagal du’n, dahil sa payapang dalampasigan na may mabunga at masaganang ani, tiyak na siya ay dadalhin at bubuhatin ng langit.

Itinakda rin ngayong 2023 na ang Unggoy ay maraming masasagupa at masasagap na bagong aktibidades o gawain, kung saan makadarama ang Unggoy ng panibagong kasiglahan at pag-asenso.

Sa pag-ibig at pakikipagrelasyon, kung hindi naging masaya ang taong 2022, tiyak na kayang-kaya ng Unggoy na pasiglahin at pag-ibayuhin ang alab ng pagmamahalan ng kanilang kasuyo ngayong taon, na kapag hindi dumistansya, puwedeng mauwi sa hindi pinaghandaang pagkakaroon ng sanggol o ng biglaang pag-aasawa.

Sa eksaktong paglalarawan, ang kapalaran ng Unggoy ngayong 2023, kumbaga sa naglalaro ng tong-its o pusoy dos, sinasabing ilalagay ng langit ang lahat ng magagandang baraha sa kamay ng Unggoy.

Sa ganitong paraan, siya na ngayon ang binibigyang kalayaan ng tadhana na dumiskarte kung paano niya ipapanalo ang bawat baba, tapon, bunot, at salansan ng mga baraha sa hamon ng buhay sa taong ito ng Water Rabbit.

Kaya kung mahusay siyang dumiskarte, ang malaking pag-unlad, bonggang suwerte, tagumpay at kasaganaan ay masayang makakabig ng Unggoy sa buong taon.

Itutuloy