FC Iloilo, una sa puwesto sa Alcantara Copa Cup

ni Anthony E. Servinio - @Sports | May 14, 2022

Napunta sa defending champion Kaya FC Iloilo ang numero unong puwesto matapos patikimin ng unang talo ang Dynamic Herb Cebu FC, 3-0, sa huling araw ng 2022 Copa Paulino Alcantara group stage, Huwebes sa PFF National Training Center sa Carmona, Cavite. Sa sumunod na laro, naisalba ng Stallion Laguna FC ang huling upuan sa semifinals sa bisa ng 0-0 tabla sa United City FC.

Sinimulan ni Patrick Arthur ang atake ng Kaya sa free kick sa ika-15 minuto. Dinoble ni Daizo Horikoshi ang lamang, 2-0, sa kanyang penalty kick sa ika-34 minuto matapos siyang pabagsakin malapit sa goal.

Hindi pa rin kuntento, pinapasok ni Coach Yu Hoshide si Jesse Curran sa ika-57 minuto at agad nagbago ang timpla ng laro. Dalawang minuto pa lang ang lumilipas ay nagpasahan sina Curran at Robert Lopez Mendy upang tulungan si Horikoshi na maitala ang pangalawang goal sa laro at siguraduhin ang panalo, 3-0.

Numero-uno ang Kaya na may 16 puntos buhat sa limang panalo at isang tabla habang pumangalawa ang Dynamic Herb na may 13 puntos (4-1-1). Kinailangan pang hintayin ang resulta ng pangalawang laro upang matukoy ang makakaharap ng Kaya sa semifinals ngayong Mayo 16.

Naging sapat ang 0-0 tabla para pumantay ang Stallion sa Maharlika FC Manila na parehong may apat na puntos subalit pasok ang Stallion dahil mas mataas ang kanilang goal difference na -3 kumpara sa -7 ng Maharlika. Naglaro pa rin ang Stallion na hanap ang panalo upang walang duda ang pagpasok at binomba nila ang goal ng UCFC na binantayan nang mabuti ni goalkeeper Matt Silva.

Pasok pa rin sa semis, kahit talo ang 'Pinas sa Vietnam

ni Anthony E. Servinio - @Sports | May 13, 2022

Dumanas ng mapait na pagkatalo ang Pilipinas sa host at defending champion Vietnam, 2-1, sa pagbabalik ng 31st Southeast Asian Games Women's Football Tournament, Miyerkules nang gabi sa Cam Pha Stadium ng Quang Ninh, Vietnam. Sa gitna ng hindi magandang resulta, pasok pa rin ang Filipinas sa semifinals na gaganapin sa Mayo 18.

Hindi inisip ng mga Pinay na naglalaro sila sa harap ng tinatayang 15,000 Vietnamese at umarangkada agad upang malambat ang unang goal, salamat kay kapitana Tahnai Annis sa ika-15 minuto. Eksakto ang palobong pasa ni Malea Cesar patungo kay Annis na inulo papasok ang bola.

Naging saglit lang ang pagdiriwang ng Filipinas at pinantay ni Nguyen Thi Tuyet Dung ang laban sa ika-38 minuto galing sa pasa ni Tran Thi Thuy Trang. Hindi pa tapos si Tran at lumikha siya ng sarili niyang goal sa ika-50 upang itulak sa lamang ang Vietnam at inalagaan nila ito sa nalalabing 40 minuto.

Pansamantalang nanatili sa liderato ng Grupo A ang Filipinas. Tabla sila sa Vietnam na parehong may tatlong puntos subalit lamang ang mga Pinay sa bisa ng kanilang +4 na goal difference kumpara sa +1 ng Vietnam.

Kahit anong mangyaring resulta sa nalalabing laban sa Grupo A sa pagitan ng Cambodia at Vietnam sa Sabado (Mayo 14) ay pasok na ang Filipinas sa semifinals. Ang tanong na lang ay kung magtatapos sila ng una o pangalawa upang matukoy kung sino ang haharapin nila sa dalawang tutuloy buhat sa Grupo B na kinabibilangan ng 2019 silver medalist Thailand, bronze medalist Myanmar, Laos at Singapore.

Ganado na ang U-23 Azkals, naisahan ang T. Leste sa SEAG

ni Anthony E. Servinio - @Sports | May 8, 2022

Tinambakan ng Pilipinas ang Timor Leste sa Men’s Football, 4-0, sa pagsisimula ng aksiyon sa 31st Southeast Asian Games Biyernes nang gabi mula sa Viet Tri Stadium sa Phu Tho, Vietnam. Dahil sa malaking panalo, todo-ganado na ang Azkals papasok sa mahalagang laban ngayong araw ng Lunes kontra sa host at defending champion Vietnam sa parehong palaruan, simula 8:00 ng gabi, oras sa Pilipinas.

Bitbit ang sariwang alaala ng mga hindi magandang resulta sa kanilang mga nakalipas na tapatan sa Timorese, naglaro nang agresibo ang Azkals at nagbunga ito ng maagang goal ni Christian Rontini sa ika-11 minuto. Tumanggap ng bola si Rontini mula sa free kick ni kapitan Stephan Schrock at inulo ito papasok sa goal.

Patuloy na pumukpok ang mga Filipino sa second half at dumating ang pangalawang goal, salamat kay Dennis Chung sa ika-56 minuto. Isa pang beterano na si Jovin Bedic ang nagparamdam at lalong pinalayo ang Azkals sa ika-78 minuto galing sa assist ni reserba Lance Ocampo.

Hindi pa kuntento ang Pilipinas at humirit ng pang-apat na goal si Oskari Kekkonen sa ika-81. Kahit lumalapit sa goal ay ipinasa pabalik ni Oliver Bias ang bola sa humahabol na si Kekkonen para sa malakas na sipa na hindi naharang ni goalkeeper Junildo Perreira.

Sa isa pang laro, nagwagi ang Vietnam sa 2019 silver medalist Indonesia, 3-0, sa likod ng mga goal sa second half nina Nguyen Tien Linh (55’), kapitan Do Hung Dung (74’) at Le Van Do (88’).

Pansamantalang hawak ng Pilipinas ang liderato sa Grupo A dahil mas marami silang goal kumpara sa Vietnam. Bago ang laro sa Timor Leste, mataas ang paniniwala ni Coach Norman Fegidero na may pag-asa na pumasok ang Azkals sa semifinals kung gagamiting batayan ang nakita niya sa kanilang ensayo at paano nabubuo ang samahan ng mga manlalaro.

Huling nakapasok sa semis ang Pilipinas sa semis noong 1991 SEA Games sa Rizal Memorial Stadium kung saan naglaro ang ngayon ay 52-anyos na si Fegidero.