Azkals, masisilayan uli sa FIFA friendly sa RMSC

ni Anthony E. Servinio @Sports | June 1, 2023

Mapapanood muli ang Philippine Men’s Football National Team sa harap ng kanilang mga kababayan matapos itakda ng Philippine Football Federation (PFF) ang dalawang FIFA Friendly ngayong Hunyo sa Rizal Memorial Stadium. Haharapin ng Azkals ang hamon ng mga bisita Nepal sa Hunyo 15 at Chinese-Taipei sa Hunyo 19.

Paborito ang Azkals sa bisa ng kanilang mas mataas na FIFA Ranking na ika-136 kumpara sa Chinese-Taipei na ika-156 at Nepal na ika-174. Subalit nanatiling bilog ang bola.

Sa pitong tapatan buhat noong 2010, pantay ang Pilipinas at Chinese-Taipei na parehong may tig-dalawang panalo at tatlong tabla. Ang huli nilang pagkikita ay nagresulta sa 3-0 tagumpay ng Chinese-Taipei noong Disyembre 3, 2017 sa CTFA International Tournament.

Mula 2011 ay nagtala ng apat na magkasunod na tagumpay ang Azkals sa Nepal. Naputol lang ito ng isang 0-0 tabla sa huli nilang pagkikita noong Nobyembre 14, 2017 sa qualifier para sa 2019 AFC Asian Cup.

Mahalaga ang mga larong ito sa paghahanda ng Azkals para sa pinagsabay na qualifier para sa 2026 FIFA World Cup at 2027 AFC Asian Cup sa Nobyembre. Maaaring magkaroon ng iba pang mga Friendly sa Setyembre at Oktubre.

Samantala, sasabak ang Under-23 Azkals sa ASEAN Football Federation Under-23 Championship ngayong Agosto 17 hanggang 26 sa Thailand. Nabunot ang mga Pinoy sa Grupo C kasama ang Vietnam at Laos.

Puno ang kalendaryo at maglalaro din sila sa 2024 AFC Under-23 Asian Cup qualifier sa Setyembre 6 hanggang 12 sa Thailand muli. Lalabanan nila sa Grupo H ang Bangladesh, Malaysia at host Thailand na unang hakbang din patungo sa Paris 2024 Olympics.

Pinay booters, lalarga sa AFC U-17 Asian Cup Q'fiers

ni Anthony E. Servinio @Sports | April 22, 2023

Laro ngayong Sabado – GFA Training Center, Harmon 5:00 p.m. Guam vs. Pilipinas

Bubuksan ng Philippine Women’s Football National Team ang kampanya sa 2024 AFC Under-17 Women’s Asian Cup Qualifiers Round 1 laban sa host Guam ngayong Sabado. Sisipa ang aksiyon sa 5:00 ng hapon, oras sa Pilipinas sa Guam Football Association (GFA) Training Center sa Harmon.

Matapos ng Guam ay haharapin ng Filipinas ang Lebanon sa Miyerkules (Abril 26) sa parehong palaruan at oras. Tatlo lang ang bansa sa Grupo G at tanging ang numero uno ang tutuloy sa Round Two sa Setyembre na tutukoy sa apat na tutuloy sa torneo sa Abril 2024 at samahan ang mga naunang nakapasok na defending champion Japan, Hilagang Korea, Tsina at host Indonesia.

Ang unang tatlo sa Indonesia ay maglalaro sa 2024 FIFA Women’s Under-17 Women’s World Cup na hinahanapan pa ng host. Ang torneo ay para sa mga manlalaro na ipinanganak simula Enero 1, 2007.

Samantala, maaaring malalaman na kung sino ang magiging kampeon ng 2023 Philippines Football League (PFL) hatid ng Qatar Airways sa higanteng salpukan ng Kaya FC Iloilo at Dynamic Herb Cebu FC ngayong Linggo (Abril 23) sa Cebu. Noong isang araw ay naubos na ang tiket ng inaabangang laro na sisipa sa 3:30 p.m.

Hawak ng Kaya ang liderato na may 45 puntos mula sa 15 panalo at tatlong talo habang pangalawa ang Cebu na may 43 puntos galing 13 panalo, apat na tabla at isang talo. Ito ang ika-apat at huling paghaharap ng mga higante ng PFL at ang kampeon ang may pinakamaraming puntos matapos ang apat na round.

Women's Football, sisipa laban sa China sa AFC q'fying

ni Anthony E. Servinio @Sports | March 7, 2023

Laro sa Miyerkules – Laos National Stadium, Vientiane

5:00 PM Pilipinas vs. Tsina

Sisikapin ng Philippine Women’s Football National Team na makapasok sa 2024 AFC Under-20 Women’s Asian Cup sa pagsipa ng qualifiers ngayong Miyerkules (Marso 8) sa National Stadium sa Vientiane, Laos. Malaking hamon ang haharapin agad ng Filipinas sa katauhan ng Tsina simula 5:00 ng hapon, oras sa Pilipinas.

Susunod ang mga laro kontra host Laos sa Biyernes at Hong Kong sa LInggo. Maglalaro ang apat na bansa ng single round robin at ang numero uno lang ang tutuloy sa Round 2 sa Hunyo.

Naglabas ang Philippine Football Federation ng listahan ng 23 manlalaro sa pangunguna ng tatlong beterana ng Senior Filipinas na sina forward Isabella Flanigan, defender Chantelle Maniti at goalkeeper Kaiya Jota. Ang iba pa ay inakyat mula sa Under-18 o natuklas sa masinsinan na tryout na ginanap sa California, Cebu, Davao at Carmona, Cavite noong Enero sa gabay ni Coach Nahuel Arrarte.

Sasamahan si Flanigan sa atake nina Jodi Mae Banzon, Jada Louise Bicierro, Elaine Pimentel, Ariana Salvador at Chayse Ying. Binubuo ang midfield nina Jonalyn Lucban, Jade Anne Jalique, Sabrina Isabel Go, Tamara Elly Lisser, Natalie Rae Oca, Sabine Alexi Ramos at Isabella Pasion.

Si Jota ang napipisil na numero unong goalkeeper at tutulungan siya nina Jessa Mae Lehayan at Alexis Louise Tan. Maliban kay Maniti, ang iba pang defender ay sina Rae Mikella Tolentino, Kylie Ann Yap, Julia Gabrielle Benitez, Robyn Eara Dizon, Journey Hawkins at Arian Isabella Markey.

Samantala, nagtala ng 5-0 panalo ang Kaya FC Iloilo laban sa Maharlika FC Manila sa 2023 Philippines Football League (PFL) hatid ng Qatar Airways noong Sabado sa Rizal Memorial Stadium.