Health Tips: Mga pagkaing mabilis magpahilom ng sugat

ni Mabel G. Vieron @Life & Style | May 30, 2023

Ang sugat ay ang karaniwang problema na maaaring makaapekto sa ating kalusugan. Mahalaga na alagaan natin ito at sundin ang payo ng doktor upang maiwasan ang komplikasyon.

Bukod sa mga gamot, alam niyo bang mayroon ding ilang pagkain na maaaring makatulong upang mabilis na humilom ang mga sugat, impeksyon, at iba pang sakit?

Narito ang ilan sa kanila:

∙ VITAMIN C. Ito ay makukuha sa mga prutas tulad ng kalamansi, dalandan, suha, bayabas, at strawberries. Maaari rin itong makita sa mga gulay tulad ng repolyo, broccoli, at kamote. Puwede mo ring gawing salad ang bayabas at kamote na may kasamang yogurt o keso.

∙ PROTEIN. Ito ay isang mahalagang nutrisyon na kailangan upang mapabilis ang paggaling ng mga sugat. Nakukuha ito sa mga karne tulad ng manok, baboy, baka, at isda. Maaari rin itong makita sa itlog, gatas, keso, yogurt, tofu, beans, at nuts. Puwede mong lutuin ang manok o baboy na may kasamang bawang at sibuyas para sa isang masarap na ulam na mayaman sa protina.

∙ ZINC. Ang zinc ay nakakatulong upang mapalakas ang ating immune system. Nakukuha ito sa mga seafood tulad ng tahong, hipon, alimango, at talaba. Ang iba pang mga pinagkukunan ng zinc ay ang mga butil tulad ng oatmeal, quinoa, at brown rice.

∙ HONEY. Ito ay isang natural na sweetener na may antimicrobial properties. Ito ay nakakapatay ng ilang uri ng bacteria na maaaring maging sanhi ng impeksyon sa sugat. Ang honey ay maaari ring magbigay ng nutrients sa sugat upang mapabilis ang paggaling nito. Maaari itong ipahid ng direkta sa sugat o ihalo sa tubig at tsaa upang inumin. Puwede mo rin itong ipahid sa iyong sugat bago mo ito takpan ng bandage para sa karagdagang proteksyon.

∙ GARLIC. Ito ay may antibacterial, antifungal, at anti-inflammatory properties. Makakatulong ito upang mapababa ang ating blood pressure at cholesterol levels. Maaari itong kainin ng hilaw o lutuin kasama ang iba pang mga pagkain upang mapakinabangan ang mga benepisyo nito.

Ilan lamang ito sa mga maaaring makatulong upang mas mapadali gumaling ang ating mga sugat, impeksyon, at iba pang sakit. Ngunit hindi sapat ang mga ito para malunasan ang lahat ng mga problema sa ating kalusugan.

Kailangan pa rin natin kumonsulta sa doktor lalo na’t kung mayroon tayong malubhang kondisyon. Kailangan nating sundin ang tamang paraan ng pag-aalaga sa sugat tulad ng paghuhugas gamit ang malinis na tubig at sabon, pagtatakip gamit ang malinis na bandage, pagpapalit nito araw-araw. Sa pamamagitan nito, mas mapabilis natin ang proseso ng paghilom at mas maiiwasan natin ang mga komplikasyon.

Kaya mga beshie, alagaan pa rin natin ang ating katawan, upang wala tayong pagsisihan sa huli. Okie?

Milyun-milyong pamilya, gutom.. Food stamp sa walang makain — P-BBM

ni Mylene Alfonso | May 23, 2023

Nais ni Pangulong Ferdinand "Bongbong" Marcos, Jr., na magtatag ng isang nationwide food stamp program sa ilalim ng kanyang administrasyon sa pakikipagtulungan sa Asian Development Bank (ADB).

Ayon kay Marcos, ito ay kabilang sa mga paksang tinalakay niya kay ADB President Masatsugu Asakawa at iba pang matataas na opisyal ng ADB.

Ani Marcos, ang naturang programa ay unang iminungkahi ng Department of Social Welfare and Development (DSWD) na kabilang sa nakahanay na proyekto ng gobyerno na lubos na makatutulong sa publiko.

Una nang inilutang ni DSWD Secretary Rex Gatchalian ang ideya noong unang bahagi ng taon, bilang tugon sa survey ng Social Weather Stations (SWS) kung saan tatlong milyong pamilyang Pilipino ang nakararanas ng gutom.

Layunin ng programa na mabigyan ng mga coupons ang mga pamilya at indibidwal na mababa lamang ang kita, na magagamit nila sa pag-avail ng mga pagkain.

Tinalakay din ni Marcos sa ADB ang pakikipagtulungan nito sa Civil Service Commission hinggil sa digital technology at iba pang “large-scale” projects.

"Now the scope of the ODA (official development assistance) that we get through ADB has now increased and we are now talking about agriculture, re-skilling and retraining, and climate change and its mitigation and adaptation,” wika ng Pangulo.

Ilang lugar sa US, taggutom dahil balot ng yelo

ni Lolet Abania | February 19, 2021

Bukod sa COVID-19 virus, mas mahirap ang nararanasan ng maraming mamamayan ngayon sa United States dahil sa epektong dulot ng snowstorm.

Ayon sa ulat, nabatid na sa Chicago, Illinois, karamihan sa mga residente roon ang dumaranas ng kakulangan sa pagkain.

Hindi sila makalabas ng bahay dahil sa sobrang lamig habang puno ng mga yelo ang paligid.

Naglabas din ng pahayag si Texas Agriculture Commissioner Sid Miller para sa lahat ng residente sa matinding epekto ng winter storm sa agrikultura ng estado at maging sa suplay ng pagkain sa lugar.

“I’m issuing a red alert regarding agriculture and our food supply chain here in the state of Texas,” ani Miller sa isang statement.

“I’m getting calls from farmers and ranchers across the state reporting that the interruptions in electricity and natural gas are having a devastating effect on their operations,” sabi ni Miller.

Gayundin, maraming lugar sa Texas ang walang kuryente, nagkukulang na ang suplay ng produktong petrolyo at nauubusan na rin ng pagkukunan ng malinis na tubig, kung saan isinailalim na ang lugar sa emergency crisis.

“Grocery stores are already unable to get shipments of dairy products. Store shelves are already empty. We’re looking at a food supply chain problem like we’ve never seen before, even with COVID-19,” saad ni Miller.

Samantala, itinigil pansamantala ang COVID-19 vaccine rollout sa ilang bahagi ng Amerika dahil sa kalamidad. Ilang residente rin ang pinili na magtungo na muna sa mga estado na hindi gaanong apektado ng snowstorm.