Ivermectin, puwede nang gamitin sa tao — FDA

ni Lolet Abania | May 7, 2021

Inaprubahan ng Food and Drug Administration (FDA) ang isang aplikasyon ng lokal na kumpanya na i-register ang Ivermectin bilang isang anti-nematode na maaari nang gamitin sa tao pangontra-bulate.

Unang nakilala ang Ivermectin bilang gamot sa hayop.

“Lloyd Laboratories applied for a CPR (certificate of product registration) for locally manufactured ivermectin as an anti-nematode drug,” ani FDA Chief Eric Domingo.

“It was granted after they submitted data to support [the] quality and stability of the product,” sabi pa ni Domingo.

Ang CPR ay isang market authorization kung saan ang isang gamot ay pinapayagang komersiyal na ibenta.

Matatandaang binanggit ni Domingo na dalawang kumpanya ang nag-apply ng CPR para sa Ivermectin.

Naging kontrobersiyal ang naturang anti-parasitic drug matapos na ilang grupo at maging mga mambabatas ay nagsasabing maaari itong gamitin para mapigilan o makagamot sa COVID-19.

Gayunman, binigyang-linaw ng FDA at Department of Health na ang kasalukuyang ebidensiya ay hindi pa rin sumusuporta para sa paggamit ng Ivermectin bilang isang COVID-19 treatment.

Ang World Health Organization, US FDA, European Medicines Agency at ang Ivermectin manufacturer na Merck ay hindi rin inirerekomenda ang paggamit ng naturang gamot sa mga COVID-19 patients.

Isang clinical trial para sa Ivermectin ang isasagawa ngayong taon upang pag-aralan ang epekto nito sa COVID-19 patients.

Nadala sa Dengvaxia… Red Cross, game sa Ivermectin trial 'pag aprub na ng FDA

ni Ronalyn Seminiano Reonico | May 7, 2021

Handang magsagawa ng clinical trials ng Ivermectin sa mga isolation facilities ang Philippine Red Cross (PRC) kung pangangasiwaan ito ng pamahalaan, ayon kay Senator Richard Gordon.

Pahayag ni Gordon sa teleradyo interview, “Hindi naman nakamamatay ang Ivermectin, wala pa akong nalaman na namatay.

“Ang naririnig ko, hati-hati ang mga doctor. Ako, ang pakay ko bilang Red Cross, hindi ako gagalaw na walang testing.”

Aniya pa, “Ngayon kung mag-a-Ivermectin tayo, ang gobyerno ang magsasabi kung puwede o hindi dahil sila ang talagang dapat dahil kung magbigay tayo niyan, masisisi.”

Nabanggit din ni Gordon ang nangyari sa kontrobersiyal na Dengvaxia kung saan marami ang namatay sa mga naturukan.

Saad pa ni Gordon, “‘Yung Dengvaxia, minadali ng gobyerno. Marami ang nagalit dahil minadaling pilit.

“Ang nangyari, may namatay kaagad. Meron palang sakit na iba, namatay. At marami nang namatay ulit, eh, di nasisi ‘yung… Ako, hindi ko sinisi ang Dengvaxia, ang sinisi ko, ‘yung nagmamadali tayo at dahil kung hindi mo ite-testing, buhay ng tao ang nakataya riyan. Kaya hihintayin ko ang result.”

Kamakailan ay sinabi ni Department of Science and Technology-Philippine Council for Health Research and Development (DOST-PCHRD) Executive Director Dr. Jaime C. Montoya na pinag-aaralan na ng pamahalaan na gamitin ang mga PRC facilities sa pagsasagawa ng clinical trials.

Saad ni Gordon, “Ngayon ino-offer-an kami ng DOST. Gobyerno na ‘yan. Na kung puwede, 'yung mga nasa isolation namin, subukan ang trials ng Ivermectin.

“Papayag lamang ako niyan ‘pag sinabi ng gobyerno na ‘Ah, sige, pumayag ka.’ At papayag lang ako niyan kung papayag ang tao… dapat informed. So far, hindi pa ako pumapayag. Sa tingin ko, eh, kani-kanyang biyahe ‘yan. Kung gusto mong maniwala ru’n sa gamot… nasa iyo ‘yun, pero dapat, maganda ring matulungan ang gobyerno dahil masyadong malakas ang debate.”

Aniya pa, “Sabi ko, I will consider it first. Papayag lang ako 'pag sinabi ng FDA, ng let’s say mga informed scientists, ‘Sige i-test mo, walang makakasama diyan’ at kung papayag ang tao.

"I will wait for advise… 'Pag science ang kailangan, I always marry the science with the prospective cure. I cannot decide because ang scientist ang nakakaalam. Maraming laboratoryong kailangan, maraming karunungan ang kailangan d'yan na hindi malalaman ng isang abogadong katulad ko.”

Moderna COVID-19 vaccine, aprub na sa 'Pinas

ni Mary Gutierrez Almirañez | May 5, 2021

Inaprubahan na ng Food and Drug Administration (FDA) ang emergency use authorization (EUA) para sa bakunang Moderna kontra COVID-19 ng US pharmaceutical firm, ayon sa kumpirmasyon ni FDA General Director Eric Domingo ngayong umaga, Mayo 5.

Nilinaw ni Domingo sa ginanap na Kapihan sa Manila Bay forum na inabot nang mahigit 9 na araw ang pag-e-evaluate nila sa mga isinumiteng dokumento ng Moderna bago naaprubahan ang EUA application nito.

Matatandaan namang sinabi ni Vaccine Czar Secretary Carlito Galvez Jr. na tinatayang 13 million doses ng Moderna ang binili ng pamahalaan at karagdagang 7 million doses nito ang binili ng private sectors na inaasahang ide-deliver sa bansa ngayong taon.

Nauna na ring nagpaabot ng liham si Senator Manny Paquiao kay US President Joseph Biden upang hilingin na pabilisin nito ang pagdating ng 20 million doses ng Moderna COVID-19 vaccines sa ‘Pinas.

Sa ngayon ay Sputnik V, AstraZeneca, Sinovac, Pfizer at Moderna pa lamang ang mga bakuna kontra COVID-19 na aprubado ng FDA ang EUA.