Nadala sa Dengvaxia… Red Cross, game sa Ivermectin trial 'pag aprub na ng FDA

ni Ronalyn Seminiano Reonico | May 7, 2021

Handang magsagawa ng clinical trials ng Ivermectin sa mga isolation facilities ang Philippine Red Cross (PRC) kung pangangasiwaan ito ng pamahalaan, ayon kay Senator Richard Gordon.

Pahayag ni Gordon sa teleradyo interview, “Hindi naman nakamamatay ang Ivermectin, wala pa akong nalaman na namatay.

“Ang naririnig ko, hati-hati ang mga doctor. Ako, ang pakay ko bilang Red Cross, hindi ako gagalaw na walang testing.”

Aniya pa, “Ngayon kung mag-a-Ivermectin tayo, ang gobyerno ang magsasabi kung puwede o hindi dahil sila ang talagang dapat dahil kung magbigay tayo niyan, masisisi.”

Nabanggit din ni Gordon ang nangyari sa kontrobersiyal na Dengvaxia kung saan marami ang namatay sa mga naturukan.

Saad pa ni Gordon, “‘Yung Dengvaxia, minadali ng gobyerno. Marami ang nagalit dahil minadaling pilit.

“Ang nangyari, may namatay kaagad. Meron palang sakit na iba, namatay. At marami nang namatay ulit, eh, di nasisi ‘yung… Ako, hindi ko sinisi ang Dengvaxia, ang sinisi ko, ‘yung nagmamadali tayo at dahil kung hindi mo ite-testing, buhay ng tao ang nakataya riyan. Kaya hihintayin ko ang result.”

Kamakailan ay sinabi ni Department of Science and Technology-Philippine Council for Health Research and Development (DOST-PCHRD) Executive Director Dr. Jaime C. Montoya na pinag-aaralan na ng pamahalaan na gamitin ang mga PRC facilities sa pagsasagawa ng clinical trials.

Saad ni Gordon, “Ngayon ino-offer-an kami ng DOST. Gobyerno na ‘yan. Na kung puwede, 'yung mga nasa isolation namin, subukan ang trials ng Ivermectin.

“Papayag lamang ako niyan ‘pag sinabi ng gobyerno na ‘Ah, sige, pumayag ka.’ At papayag lang ako niyan kung papayag ang tao… dapat informed. So far, hindi pa ako pumapayag. Sa tingin ko, eh, kani-kanyang biyahe ‘yan. Kung gusto mong maniwala ru’n sa gamot… nasa iyo ‘yun, pero dapat, maganda ring matulungan ang gobyerno dahil masyadong malakas ang debate.”

Aniya pa, “Sabi ko, I will consider it first. Papayag lang ako 'pag sinabi ng FDA, ng let’s say mga informed scientists, ‘Sige i-test mo, walang makakasama diyan’ at kung papayag ang tao.

"I will wait for advise… 'Pag science ang kailangan, I always marry the science with the prospective cure. I cannot decide because ang scientist ang nakakaalam. Maraming laboratoryong kailangan, maraming karunungan ang kailangan d'yan na hindi malalaman ng isang abogadong katulad ko.”

Sinopharm nu'ng una... Sinovac, next na ituturok kay P-Du30

ni Mary Gutierrez Almirañez | May 6, 2021

Iginiit ng mga eksperto na posibleng Sinovac ang iturok na second dose na bakuna kontra COVID-19 kay Pangulong Rodrigo Duterte kung sakaling hindi maaprubahan ng Food and Drug Administration (FDA) ang Sinopharm na unang itinurok sa kanya.

Paliwanag pa ni Dr. Rontgene Solante ng San Lazaro Hospital's Adult Infectious Diseases and Tropical Medicine, "Puwede niyang ipahabol ang Sinopharm for authorization, but Sinopharm has to submit the data. Kung hindi naman puwede ang Sinopharm, puwede naman ang kahawig na bakuna, 'yung Sinovac."

Dagdag pa niya, “As long as hindi pa 'yan approved for emergency use authorization, dapat hindi ibabakuna."

Samantala, iginiit naman ni Pangulong Duterte na sarili niyang desisyon ang pagpapabakuna ng Sinopharm, kahit hindi pa iyon aprubado ng FDA.

"Iyong itinurok sa akin... It's the decision of my doctor. And all things said, this is my life," giit pa ng Pangulo.

Sa ngayon ay pinag-aaralan na rin sa ibang bansa ang paghahalo ng mga bakuna kontra COVID-19 dahil sa limitadong suplay.

P22 M para sa clinical trials ng Ivermectin, kasado na

ni Mary Gutierrez Almirañez | May 6, 2021

Pinaghahandaan na ng Department of Science and Technology (DOST) ang clinical trials ng Ivermectin kontra COVID-19 sa darating na Hunyo at inaasahang magtatapos sa January 2022, kung saan nagkakahalaga ng P22 milyon ang nakalaang pondo na manggagaling sa Department of Health (DOH), ayon kay DOST Secretary Fortunato dela Peña.

Aniya pa, pangungunahan ni Dr. Aileen Wang ng UP-PGH Department of Medicine ang panel na magsasagawa ng trials sa loob ng 8 months.

Kabilang sa mga sasailalim sa clinical trials ay ang mahigit 1,200 asymptomatic at non-severe COVID-19 patients na mga Pinoy na may edad 18 pataas. Dagdag pa ni dela Peña, nakikipagtulungan din ang DOST kay Senator Richard Gordon at sa Philippine Red Cross (PRC) para sa mga pasilidad na pagdarausan ng trials.

Sa ngayon ay 5 ospital na ang pinahihintulutan upang ipainom ang Ivermectin sa pasyenteng may COVID-19, buhat nu’ng maaprubahan ng Food and Drug Administration (FDA) ang isinumite nilang compassionate special permit (CSP).

Kaugnay nito, inianunsiyo rin ni dela Peña ang timetable ng iba pang isinasagawang clinical trials sa mga hinihinalang gamot kontra COVID-19, kabilang ang mga sumusunod:

• tawa-tawa (11 months)

• lagundi (July 13, 2020 - May 12, 2021; 11 months)

• virgin coconut oil for hospitalized COVID-19 patients (June 1, 2020 to May 31, 2021; 12 months)

• VCO for suspect and probable COVID-19 cases (May 1, 2020 - June 31, 2021; 14 months or more)

• melatonin (September 7, 2020 - June 6, 2021; 9 months)

• convalescent plasma (July 1, 2020 - June 30, 2021; 12 months)