Warehouse sa Laguna, nasusunog

ni Mary Gutierrez Almirañez | February 9, 2021

Nananatili sa ika-apat na alarma at mag-aanim na oras nang nasusunog ang bodega ng pagawaan ng pinto sa Southville 3A San Antonio San Pedro City, Laguna.

Ayon kay Jun Sumek Ang, fire marshal ng San Pedro City Bureau of Fire Protection (BFP), hindi nila maideklarang kontrolado na ang sunog dahil malaki pa rin ang apoy sa ilang bahagi ng warehouse ng D’ Summit Lumber Corporation.

Gayunman, nakasisiguro ang BFP na hindi na kakalat pa ang apoy lalo’t ang likuran ng bodega ay isang residential area.

Malaking hamon sa mga bumbero ang kakulangan sa supply ng tubig dahil may kalayuan ang pinagkukunan nito. Idagdag pa ang matarik na daan papasok sa nasusunog na bodega.

Sa tindi ng apoy kanina ay bumigay na ang bubungang bahagi ng warehouse. Sa ngayon ay patuloy ang pagbomba ng tubig ng mga bombero.

15 patay, 11 sugatan sa sunog sa Ukraine

ni Ronalyn Seminiano Reonico | January 22, 2021

Patay ang 15 katao at 11 ang sugatan matapos masunog ang nursing home sa eastern Ukrainian town sa Kharkiv noong Huwebes nang hapon, ayon sa state emergency service.

Nagsimula umano ang sunog sa ikalawang palapag ng two-storey building kung saan 33 katao ang nasa loob. Mabilis namang ipinag-utos ni Ukraine's President Volodymyr Zelenskiy sa interior minister na imbestigahan ang naturang insidente.

Samantala, ayon sa isinagawang criminal investigation ng awtoridad, "careless handling of electric heating devices" ang itinuturong sanhi ng sunog.