Music Peace Festival, Gaganapin sa Cotabato City

by Info @Brand Zone | January 17, 2023

COTABATO CITY — Tuloy na tuloy na We Are One Music Peace Festival sa Cotabato State University (CSU) Gymnasium sa darating na ika-26 ng Enero, 2023 (Huwebes). Inaasahang dadalo ang humigit-kumulang 1,000 mga mag-aaral, mga kaguruan, mga opisyal ng gobyerno, mga pinuno ng relihiyon at mga peace advocate mula sa iba’t ibang organisasyon.

Sa temang, "Peace is Here," nilalayon nito na pag-isahin ang boses ng mga kabataan at mamamayan sa Mindanao upang manawagan para sa pagtigil ng mga digmaan sa buong mundo tulad ng nangyari sa Ukraine na naging banta sa seguridad at ekonomiya ng maraming bansa kabilang na ang Pilipinas. Layon din nitong palakasin ang kampanya para sa aktibong pakikilahok ng mga mamamayan at mga pambansang pinuno para sa isang mapayapang lipunan. Kabilang sa mga guest performers ang "Suklay Diva" at "Asia's Vocal Supreme" na si Katrina Velarde, at ang “Queen of Moro Songs", Samraida. Magpe-perform din ang mga Korean singer na sina Aiden at Jin, at mga lokal na bandang The Genremen Band at The Hauz Band.

Ang General Admission ticket ay mabibili sa halagang P50. Ang lahat ng kikitain ay gagamitin para sa pagtatayo ng Peace Monument na nakatakdang pasinayanan sa CSU kinabukasan, ika-27 ng Enero.

Magbibigay ng talumpati sina CSU President Dr. Sema Dilna, City Mayor Bruce Matabalao, Chief Minister Ahod Ebrahim at CHED Commissioner Dr. Ronald L. Adamat sa simula ng programa. Isang espesyal na talumpati ang ihahatid ng isang Korean peace activist na si Chairman Lee Man-hee mula sa HWPL na nagtataguyod ng kapayapaan sa Mindanao mula noong 2014.

Ito ay inorganisa ng Kutawato Greenland Initiatives (KGI) sa pakikipagtulungan ng mga internasyonal na peace partners nito, Heavenly Culture, World Peace, Restoration of Light (HWPL), International Women's Peace Group (IWPG), International Peace Youth Group (IPYG). ), Volunteer Individuals for Peace (VIP), BARMM Government, City Government of Cotabato at SPIN Media PH.

Ang mga interesadong dumalo ay maaaring bumili ng kanilang mga tiket sa pamamagitan ng link na ito: http://bit.ly/3i8jXHc. Mabibili na rin ang mga tiket sa CSU simula sa susunod na linggo. Para sa mga katanungan, makipag-ugnayan kay Bb. Alecka (0945 390 4537).

Sa Wattah Wattah Festival ng San Juan.. Mga bumbero, nagpaulan ng tubig sa mga residente

ni Lolet Abania | June 24, 2022

Gamit ang mga fire truck, nagpaulan ng tubig ang mga bumbero sa mga residente ng San Juan City para sa kanilang Wattah Wattah Festival ngayong Biyernes.

Sa isang video, nagtatalunan at nagsasayawan sa kalsada ang mga manonood at residente ng lugar habang itinutok ng mga personnel ng Bureau of Fire Protection (BFP) ang kanilang mga fire hose at pinauulanan sila ng tubig.

Ayon kay San Juan City Mayor Francis Zamora, ang nakaugalian nilang aktibidad para sa Wattah Wattah Festival ay nakansela noong 2020 at 2021 dahil sa banta ng COVID-19 pandemic.

“After three long years, ito na po ay magaganap muli ang aming selebrasyon ng aming kapistahan na nakasanayan ng bawat isa,” ani Zamora sa isang interview ngayong Biyernes ng umaga.

Sinabi ni Zamora na pinayagan na ang mga aktibidad para sa kapistahan, kung saan ipinagdiriwang si Saint John the Baptist, sa kabila ng pandemya dahil ang lungsod ay kasalukuyang nasa Alert Level 1.

Gayunman aniya, ang pagsusuot ng face masks ay nananatiling required maliban sa mga performers. Paalala ni Zamora na ipinatutupad ang liquor ban sa lungsod mula alas-12:00 ng hatinggabi hanggang alas-3:00 ng hapon ng Biyernes.

Ipinagbabawal naman ang pagsasaboy ng maruming tubig, pagbato ng mga “water bombs” o plastic bags at mga bote na may lamang tubig, at pagbubukas ng mga pintuan ng mga sasakyang dumaraan.

Pinapayuhan ang mga motorista na humanap ng ibang mga ruta dahil ang lugar ng Pinaglabanan Shrine ay isinara na sa trapiko.

Ayon pa kay Zamora, inaasahan nilang libo-libo ang magpa-participate sa festival dahil sa libo-libo rin ang dumalo sa concert at firework show ng pista nitong Huwebes ng gabi.

11-K, dumalo sa music festival sa China

ni Ronalyn Seminiano Reonico | May 2, 2021

Libu-libong katao ang dumalo sa unang araw ng Wuhan Strawberry Music Festival sa China noong Sabado. Noong nakaraang taon, online isinagawa ang naturang festival dahil sa COVID-19 pandemic na ang unang kaso ay naitala sa Wuhan.

Sa unang araw ng 5-day May Day national holiday noong Sabado, tinatayang aabot sa 11,000 katao ang dumalo sa festival kung saan marami ang hindi nagsuot ng face masks.

Ayon sa national health authority ng China, nakapagtala ng 16 bagong kaso ng COVID-19 ang bansa noong Biyernes. Samantala, ang kabuuang bilang ng kaso ng COVID-19 sa China ay 90,671 at ang death toll ay 4,636 na karamihan ay mula sa Wuhan.

Ayon naman sa datos ng National Health Commission noong Sabado, umabot na sa 265 milion ang bilang ng mga nabakunahan kontra-COVID-19 sa China.