Pagkasunog ng ferry boat sa Basilan, may mananagot

ni Mylene Alfonso | April 10, 2023

Nais ni House Speaker Martin Romualdez na may managot sa pagkasunog ng barkong MV Lady Mary Joy 3, na naging dahilan ng pagkamatay ng 31 katao at 2 pa ang nawawala sa karagatang ng Baluk-baluk Island sa Basilan kamakailan.

Kinalampag din ang Maritime Industry Authority (MARINA) at Philippine Coast Guard (PCG) na alamin ang puno't dulo ng pagkasunog ng barko.

Dapat umanong natuto na ang MARINA at PCG mula sa mga nakaraang trahedya sa sasakyang pandagat, lalo na dahil sa overloading.

Ani Romualdez, mismong si Mayor Arsina Kahing-Nanoh ng Hadji Muhtamad, Basilan ang nagsabi na nahirapan ang mga otoridad sa rescue operation dahil sa inaccuracy ng passenger manifesto.

Binanggit din na kung pagbabatayan ang bilang ng mga naligtas at bilang ng nasawi, hindi ito tugma sa record ng PCG.

Aniya, dapat na may managot sa insidente at pahintuin na muna ang paglalayag ng iba pang barko ng naturang shipping line.

P700K tulong ng gobyerno sa mga biktima ng nasunog na ferry boat

ni BRT | April 3, 2023

Umabot sa mahigit P700,000 na tulong ang ipinamahagi ng gobyerno sa mga pasahero ng barko na nasunog sa bahagi ng Baluk-Baluk Island sa Basilan.

Ito ang iniulat ni Department of National Defense officer-in-charge Senior Undersecretary Carlito Galvez, Jr. kay Pangulong Ferdinand Marcos, Jr.

Ang pinansiyal na tulong na ibinigay sa mga biktima ay umaabot sa P640,000 habang mahigit P71,000 naman ang mga non-food items na ipinamigay ng Department of Social Welfare and Development kasama ang provincial government ng Basilan.

Ferry boat sa Indonesia, nagliyab, 275 pasahero nagtalunan sa tubig

ni Lolet Abania | May 30, 2021

Isang 43-anyos na lalaking pasahero ang hinahanap ng search-and-rescue teams matapos masagip ang iba pang sakay ng isang malaking ferry nang ito ay magliyab sa Indonesia kagabi.

Ang ferry na KM Karya Indah ay patungo ng Sanana, isang malayong pantalan sa bahagi ng hilagang-silangan sa Indonesia, nang bigla na lang mag-apoy.

Ilang minuto pa lang itong nakakaalis mula sa pantalan, sumiklab ang ferry habang ang mga pasaherong sakay nito ay nagtalunan sa dagat para makaligtas sa sunog.

Wala namang naitalang nasawi sa insidente. “There were 275 people on board, 274 had been evacuated safely," ani Muhammad Arafah, ang head ng local search-and-rescue team, sa Kompas TV, isang news network sa lugar ngayong Linggo.

“One person, a 43-year-old man, is still being searched for,” dagdag ni Arafah, kung saan tinatayang 35 sa mga pasahero ay mga bata.

Maraming rescuers ang patuloy na naglilibot sa lugar para hanapin ang pasaherong nawawala. Sa inilabas na mga larawan ng search-and-rescue agency, kitang-kita na ang malaking ferry boat ay nabalot ng makapal at napakaitim na usok, habang nasagip naman ang mga pasahero na nakasuot ng life jackets na nakasakay na sa balsa.

Mahigit isang dosenang crew members naman ang nakadetine at sinisiyasat ng mga local police upang alamin sa mga ito ang naging dahilan ng sunog.

Karaniwan na ang mga aksidente sa karagatan ng Indonesia dahil sa mahinang safety standards na kanilang ipinatutupad. Gayunman, ang mga passenger ferries ang madalas na gamiting transportasyon ng mga residente dahil sa isang arkipelago na may 17,000 islands ang nasabing bansa.