SSS, nagbigay ng P1.82-B sickness benefits noong 2020

ni Fely Ng - @Bulgarific | March 21, 2021

Hello, Bulgarians! Inihayag kamakailan ng Social Security System (SSS) na nakapagtala ito ng P1.82 bilyon na sickness benefit noong nakaraang taon. Bumaba ito ng 38.6% kumpara sa naibigay noong 2019 at umabot naman sa 269,604 miyembro ang nakinabang ng nasabing benepisyo.

Iniugnay ni SSS President Chief Executive Officer Aurora C. Ignacio sa ipinatupad na community quarantine sa buong bansa ang pagbaba ng transaksiyon sa mga branches lalo na ang pagsumite ng mga dokumento para sa iba’t ibang benepisyo.

“Kung ating ikukumpara, ang naibigay na sickness benefit noong 2016 ay umabot sa P2.17 bilyon at noong 2017 naman ay umabot ito sa P2.42 bilyon. Mas lalo pang tumaas ito noong 2018 na umabot sa P2.65 bilyon at P2.97 bilyon naman noong 2019. Inaasahan namin na tataas ito ngayong 2021 dahil unti-unti nang niluluwagan ng gobyerno ang community quarantine guidelines at pinapayagan na muli ang mas maraming tao na makalabas sa kanilang mga tahanan,” sabi ni Ignacio.

Ayon sa datos, taun-taon din na tumataas ang bilang ng mga miyembro na nakikinabang sa SSS sickness benefits. Noong 2016, 388,623 miyembro ang nabigyan ng nasabing benepisyo; umakyat ito sa 419,563 noong 2017; 428,296 miyembro noong 2018 at umabot naman sa 458,851 miyembro noong 2019.

Ang sickness benefit ay daily cash allowance na ibinibigay sa mga kuwalipikadong miyembro na na-confine sa bahay o ospital na hindi bababa sa apat na araw, kasama ang araw upang gumaling sa pagkakasakit o injury. Aabot sa 120 araw kada taon ang maaaring makuha ng miyembro at maaari itong palawigin pa ng 120 araw sa susunod na taon para sa parehong pagkakasakit o injury. Samantala, ang anumang sakit o injury na hihigit sa 240 araw ay maaaring i-file ng disability benefits.

Noong Hulyo 2020, ipinatupad ang pagpapasa ng employers ng kanilang Social Security (SS) Sickness Benefit Reimbursement Applications (SBRAs) gamit ang website ng SSS. Makikita ito sa My.SSS web portal sa www.sss.gov.ph.

Pinapayagan nito ang employers ng mas madaling pagsumite ng kanilang sickness benefit reimbursement claims ng hindi kinakailangan pang maghintay ng kopya nang naaprubahang sickness notification at pagpasa nito sa tanggapan ng SSS matapos na maibigay ang paunang bayad sa kanilang empleyado.

Ayon kay Ignacio, ang prosesong ito ay kaugnay sa ginagawang digital transformation ng SSS na mas naaayon dulot ng health at safety protocols na ipinatutupad ng gobyerno upang mapigilan ang pagkalat ng COVID-19 virus.

“Maliban sa mabilis na proseso ng sickness benefit reimbursements, nakatutulong din ito na mabawasan ang face-to-face interaction sa ating mga branches upang matulungan ang gobyerno sa pagpigil sa pagkalat ng virus,” dagdag ni Ignacio.

Bumaba rin ang sickness benefit sa ilalim ng Employees’ Compensation (EC) Fund noong 2020 sa P186.41 milyon na pinakinabangan ng 22,757 miyembro.

Umabot ng 100.44 milyon ang naibigay na EC sickness benefit noong 2016 sa 25,201 miyembro, habang P121.29 milyon naman para sa 30,325 miyembro noong 2017, P140.13 milyon para sa 31,662 miyembro noong 2018, at P257.01 milyon para sa 34,860 miyembro noong 2019.

Base sa talaan noong 2020, mayroong 38.8 milyong miyembro ang SSS kung saan 41.7% o 16.18 milyon lamang dito ang regular na nagbabayad na mga miyembro.

Para sa karagdagang impormasyon, bisitahin lamang ang SSS Facebook at YouTube page “Philippine Social Security System,” Instagram “mysssph,” Twitter “PHLSSS,” o sumali sa SSS Viber Community “MYSSSPH Updates.”

---

Para sa anumang impormasyon, opinyon, isyu o maging imbitasyon, mag-e-mail sa bulgarific@gmail.com o sumulat kay Ms. Bulgarific at ipadala sa Bulgar Bldg., 538 Quezon Avenue, Quezon City.

Magandang Balitang Hatid ng Meralco Ngayong Buwan ng Marso

ni Fely Ng - @Bulgarific | March 18, 2021

Magandang araw, Bulgarians! Ngayong panahon ng pandemya, marami ang lubhang naapektuhan. Mayroong mga nawalan ng hanapbuhay bunsod ng mga negosyong kung hindi nagsara ay nagbawas ng empleyado. Bunsod nito ay marami ang namroblema sa panggastos sa araw-araw. Sa ganitong uri ng panahon ng krisis, anumang pagbaba sa presyo ng produkto at serbisyo ay maituturing na napakagandang balita para sa mga konsyumer.

Kamakailan ay inanunsyo ng Meralco ang muling pagbaba ng presyo ng kuryente para sa buwan ng Marso. Ito ay bumaba ng P0.36 kada kilowatthour (kWh). Mula sa presyong P8.68 kada kWh noong Pebrero, ito ay bumaba sa P8.32 kada kWh ngayong Marso. Bunsod ng pababang paggalaw ng presyo ng kuryente, ang mga residensyal na konsyumer na kumonsumo ng 200 kWh ngayong buwan ay makararanas ng bawas singil na nagkakahalagang P72.

Sa ikalawang sunod na pagkakataon ay bumaba ang presyo ng kuryente ng Meralco. Tinatayang umabot na sa P0.43 kada kWh ang kabuuang halaga ng ibinababa ng presyo ng kuryente ngayong taong 2021. Ayon pa sa Meralco, ang presyo ngayong buwan ang naitalang pinakamababang presyo ng kuryente mula Agosto 2017.

Sa katunayan, ang Meralco ay isa sa may pinakamababang presyo ng kuryente sa bansa. Ayon sa ulat ng Sun Star Cebu, ang Meralco ay nasa ika-77 na ranggo pagdating sa usapin ng presyo ng kuryente sa bansa sa halagang P7.85 kada kWh. Ito ay nangangahulugan na mayroong 76 na iba pang kooperatiba at distribyutor na mas mataas ang presyo kumpara sa Meralco. Ang presyo ng kuryente sa Davao naman ay mas mataas lamang ng bahagya sa presyo ng Meralco sa halagang P7.86 kada kWh. Ang Davao ang nasa ika-76 na ranggo.

Ayon sa datos ng Energy Regulatory Commission (ERC), nangunguna ang Camiguin Electric Cooperative sa listahan ng presyo ng koryente sa bansa sa halagang P13.47 kada kWh. Ikalawang may pinakamataas na presyo ng kuryente sa bansa ay ang Pampanga Electric Service Cooperative sa halagang P13.33 kada kWh. Sinusundan naman ito sa ikatlong pwesto ng Lubang Electric Cooperative sa halagang P12 kada kWh.

Sa tuluy-tuloy na pagbaba ng presyo ng Meralco, maaari pa itong bumaba sa listahan ng presyo ng kuryente sa bansa. Sa paliwanag ng Meralco, ang pagbaba ng presyo ng generation charge ang pangunahing dahilan ng pagbaba ng kabuuang halaga ng presyo ng koryente nito.

Ayon kay Meralco First Vice President and Regulatory Management Head Atty. Jose Ronald V. Valles sa isang ginanap na press briefing kamakailan, nagkakahalagang P7.96 kada kWh ang karaniwang presyo ng kuryente ng Meralco. Nang ikumpara sa presyo ng kuryente noong taong 2019, napag-alamang mas mababa ng 10% ang presyo ng kuryente noong taong 2020 sa halagang P8.87 kada kWh.

Bunsod ng mahigpit na pagpapatupad ng Enhanced Community Quarantine (ECQ) noong unang bahagi ng taong 2020, maraming mga negosyo ang napilitang pansamantalang huminto sa operasyon. Upang makatulong sa mga konsyumer, ginamit ng Meralco ang probisyon ng Force Majeure sa mga power supply agreement (PSA) nito. Bilang resulta ay bumaba ang fixed charge na siningil ng mga supplier ng koryente na siyang nagpababa sa generation charge.

Ang paggamit na ito ng probisyon ng Force Majeure, kasabay ng pagbaba ng presyo ng koryente mula sa Wholesale Electricity Spot Market (WESM), paglakas ng presyo ng piso kontra dolyar, pagbaba sa presyo ng gasolina, at maging ang pananalanta ng mga bagyo sa bansa, ay naging dahilan din sa pagbaba ng presyo ng generation charge.

Tinatayang umabot sa kabuaang halagang P14 Bilyon ang naitipid ng mga customer ng Meralco bunsod ng pagbaba ng presyo ng generation charge.

Bagamat muling bumaba ang presyo ng koryente ng Meralco ngayong Marso 2021, hinihikayat pa rin ng Meralco ang mga customer nito na ugaliin ang masinop at matalinong paggamit ng kuryente upang mas lalo pang makatipid sa bayarin. Makatutulong ito sa pagtitipid ng mga customer ngayong panahon ng pandemya lalo na’t nalalapit na ang pagpasok ng panahon ng tag-init, kung saan karaniwang tumataas ang konsumo sa kuryente ng mga customer.

---

Para sa anumang impormasyon, opinyon, isyu o maging imbitasyon, mag-e-mail sa bulgarific@gmail.com o sumulat kay Ms. Bulgarific at ipadala sa Bulgar Bldg., 538 Quezon Avenue, Quezon City.

Go Negosyo maglulunsad ng Vaccine Education forum para sa mga empleyado

ni Fely Ng - @Bulgarific | March 17, 2021

Marso 17, 2021 – Pagsagot sa pangangailangan na dagdagan ang kumpiyansa sa bakuna sa bansa, bunsod nito ang Presidential Adviser for Entrepreneurship at Go Negosyo Founder na si Joey Concepcion, ay maglulunsad ng isang forum ng bakuna upang itaguyod at turuan ang publiko sa kahalagahan ng pagbabakuna at kung bakit ligtas, mabisa, at kinakailangan ang mga bakuna sa oras na ito ng pandemya. Ang forum ay magiging live sa pamamagitan ng Zoom at sa Facebook Page ng Go Negosyo (fb.com/GoNegosyoOfficial), Marso 19, 10 AM. Upang magparehistro, pumunta sa bit.ly/BakitBakuna.

Ang mga magbabahagi ng kaalaman para sa forum ay sina Rep. Janette Garin, District Representative of Iloilo’s 1st District and Private Sector Chief Implementor of ARK-PCR Initiative, Dr. Manuel Dayrit, Former DOH Secretary and Dean at Ateneo School of Medicine and Public Health, Dr. Rontgene Solante, Head of Adult Infectious Diseases Tropical Medicine San Lazaro Hospital and DOST Vaccine Expert Panel Member, Dr. Minguita Padilla, President and CEO of Eyebank Foundation of the Philippines and Project ARK Medical Team Lead, at Dr. Gerardo Gap Legaspi, Director of Philippine General Hospital. Ang programa ay gagampanan ni Ms. Josephine Romero, A Dose of Hope Vaccine Program Lead.

“We need every Filipino’s participation in order to win this war against COVID-19. One year since we waged our war against this virus, we are close to winning as our final weapon, the vaccine, is already on our hands. We are doing our utmost in the private sector, partnering with the government, to ensure that every Filipino will get their share of the vaccine,” pahayag ni Concepcion.

Ang vaccine forum ay pinamagatang “Bakit Bakuna: Forum on Why We Need to Get Vaccinated” at magsisilbing platform upang talakayin ang mga nauugnay na isyu at katanungan tungkol sa mga bakuna, pagtugon sa pag-aalangan, at pagwawasto ng maling impormasyon tungkol sa mga bakuna. Bilang layunin ng forum na palakasin ang kumpiyansa sa bakuna, tulungan ang mga komunidad na maunawaan ang kanilang papel sa inisyatibo sa pagbabakuna sa buong bansa, at kung bakit ang pagbabakuna ay magkakaroon ng malaking epekto sa pagpapabilis ng paggaling ng ekonomiya ng Pilipinas, ang mga empleyado ay maaaring magtanong at masabi ang kanilang mga alalahanin lalo na yaong may mga pagdududa o pag-aalinlangan pa rin sa mga bakuna

“What we need right now is for every capable and able Filipino to get vaccinated—we take this vaccine not just for ourselves but also for the people around us, and for those that are not suited to be vaccinated. We need to get at least 70% of our population vaccinated to attain herd immunity. If we fail to do this, all our efforts will be wasted—we will not be able to defeat the virus, our economy will not recover, and many lives and livelihoods will be lost in the process. That’s why we are calling for everyone’s participation on this,” dagdag ni Concepcion.

Sa ngayon, higit sa 700 mga kumpanya kasama ang kanilang mga empleyado ang inaasahang lumahok sa forum. Ang unang 1,000 na kalahok ay tatanggapin sa pamamagitan ng Zoom Webinar platform habang ang iba pang mga interesadong ay maaaring sundan ang mga kaganapan nang live sa Facebook Page ng Go Negosyo.

Para sa karagdagang impormasyon o mga katanungan sa forum, makipag-ugnay sa Go Negosyo sa 8637-9347 o mag-email sa info.gonegosyo@gmail.com

---

Para sa anumang impormasyon, opinyon, isyu o maging imbitasyon, mag-e-mail sa bulgarific@gmail.com o sumulat kay Ms. Bulgarific at ipadala sa Bulgar Bldg., 538 Quezon Avenue, Quezon City.