Ilang IATF member, aprub... Face shield no more – Malacañang

ni Lolet Abania | November 2, 2021

Ipinahayag ng Malacañang na ilan sa mga miyembro ng Inter-Agency Task Force (IATF) ang pabor sa ditching o pagpapatigil ng mandatory na pagsususot ng face shield kapag nasa labas dahil anila bumababa na ang bilang ng COVID-19 cases.

“I can confirm that since the number of COVID-19 cases are going down, the IATF is discussing kung ipagpapatuloy pa ang pagsusuot ng face shield,” Presidential Spokesperson Harry Roque.

“Marami ang nagsasabi sa IATF na itigil na ang pagsusuot ng face shield,” dagdag ni Roque.

Gayunman, ayon kay Roque, hindi pa nakakapagdesisyon ang IATF kung ang face shield ay aalisin na.

“While many are supportive of doing away with face shield, there is no decision yet. We should still wear a face shield,” sabi pa ni Roque.

Subalit para kay Dr. Edsel Salvaña ng UP Manila-National Institute of Health (NIH), ang pagsusuot ng face shield ay mayroong benepisyo.

“COVID-19 virus can also enter through our eyes, and it protects the eyes,” sabi ni Salvaña. “The risk of getting COVID-19 is going down, but we have to make sure that everyone is vaccinated before we remove the face shield,” dagdag ni Salvaña.

Matatandaang unang sinabi ni Pangulong Rodrigo Duterte ang tungkol sa pagpapagaan ng mandato sa face shield bago binawi rin niya ito dahil aniya sa pagkumbinsi sa kanya ng mga eksperto.

Inamin ng Pangulo na nagkaroon siya ng pagkakamali nang sabihin nitong ang pagsusuot ng face shield ay hindi na kailangan para makaiwas sa COVID-19 transmission.

Aniya, ang pagtaas ng bilang ng COVID-19 cases ay sanhi ng mas nakahahawang Delta variant, kaya nagbago ang kanyang isipan sa pag-aalis ng face shield.

“Noong dumating itong variant na Delta, natakot ako. ‘Yun, mali ko ‘yun,” saad ng Pangulo.

Una na ring binanggit ni Roque na ang face shield requirements ay mananatili maliban kung ang World Health Organization (WHO) ay ituturing na hindi na ito kailangan.

Subalit noong Setyembre, sinabi ni Pangulong Duterte na ang pagsusuot ng face shield ay kailangan na lamang kapag ang indibidwal ay nasa 3Cs – close, crowded, close-contact.

Matagal na ring pinagdedebatehan ang tungkol sa mandato ng gobyerno na pagsusuot ng face shield, kung saan ilang bansa rin sa buong mundo ay mayroong katulad na mandate, dahil na rin marahil sa dagdag na gastos ito para sa mga ordinaryong mamamayan.

P-Duterte: “No more face shields outside"

ni Jasmin Joy Evangelista | September 23, 2021

Hindi na required ang pagsusuot ng face shield sa pampublikong lugar, ayon kay Pangulong Rodrigo Duterte.

Required na lang ito sa closed, crowded, at close-contact areas gaya sa ospital.

“No more face shields outside... Ang face shield, gamitin mo lang sa 3Cs: closed facility, hospital, basta magkadikit-dikit, crowded room, tapos close-contact. So diyan, applicable pa rin ang face shield," ani Duterte sa kanyang second public address sa linggong ito.

"Other than that, I have ordered kung ganoon lang naman, sabi ko then I will order that we accept the recommendation nitong executive department," dagdag niya.

Ang mga guidelines ukol dito ay ipinag-uutos ni Pangulong Duterte na isapubliko sa lalong madaling panahon.

Matatandaang naging malaking usapin ang pagsusuot ng face shield sa pampublikong lugar, lalo’t isa umano ito sa karagdagabg gastos ng mga Pilipino sa panahon ng pandemya.

'Di pa raw safe… Face shield, kailangan pa rin — Nograles

ni Lolet Abania | June 17, 2021

Kinakailangan pa rin ang pagsusuot ng face shield sa ibabaw ng face mask sa gitna ng patuloy na laban sa pandemya ng COVID-19, ayon kay Cabinet Secretary Karlo Nograles ngayong Huwebes.

Ito ang naging tugon ni Nograles matapos ang pahayag ni Department of Health (DOH) Undersecretary Leopoldo Vega kahapon, hinggil sa hindi na kailangang isuot ang face shield sa ibabaw ng face mask kung nasa labas. “We will run this through the IATF meeting later,” ani Nograles sa interview sa CNN Philippines.

Ang Inter-Agency Task Force (IATF) ay nagsisilbing policy-making body ng gobyerno sa pagtugon sa COVID-19 pandemic.

“Face shields are still required,” diin ni Nograles.

Sinabi naman ni Senate President Vicente Sotto III na pumayag si Pangulong Rodrigo Duterte na ang face shields ay dapat na lamang gamitin sa mga ospital.

“Last night, the President agreed that face shields should only be used in hospitals. Allowed us to remove ours! Attn DOH!” ani Sotto sa Twitter ngayon ding Huwebes.

Gayunman, wala pang kumpirmasyon ang Malacañang tungkol sa pahayag ni Sotto.

Nauna rito, si Presidential Spokesperson Harry Roque, na nagsisilbing tagapagsalita para sa IATF ay nananatili sa kanyang pahayag na ang pagsusuot ng face shield sa ibabaw ng face mask ay nakapagdaragdag ng proteksiyon laban sa COVID-19.

Ang naging pahayag ni Vega ang nag-udyok din kay DOH Undersecretary Maria Rosario Vergeire para banggitin ang Joint Memorandum Circular 2021-0001, kung saan nakasaad sa memo na “face shields are required to be worn in enclosed public spaces, schools, workplaces, commercial establishments, public transport and terminals, and places of worship.”

Subalit sa pareho ring memo, nakasaad na ang face shields ay kailangang isuot sa “other public spaces wherein 1 meter physical distancing is not possible and there is gathering of more than 10 people at the same venue at the same time” tulad ng sitwasyon sa mga palengke.

Samantala, ipinahayag ni DOH Secretary Francisco Duque III na iaapela niya kay Pangulong Duterte ang naging desisyon umano nito na i-require na lamang ang paggamit ng face shields sa mga ospital.

Giit ni Duque, hindi pa napapanahon para balewalain ang paggamit ng face shields sa dahilang ang pagbabakuna ng gobyerno ng COVID-19 vaccine sa mga mamamayan ay nananatiling mababa.

“Any layer of protection is better than less protection,” ani Duque.

Kinumpirma naman nina Senators Joel Villanueva at Juan Miguel Zubiri ang naging pag-uusap nina Pangulong Duterte at Sotto nitong Miyerkules ng gabi, subalit ito anila ay isa lamang “off the cut” at hindi opisyal na talakayan.