Pagsusuot ng face shield, tuloy — PNP

ni Lolet Abania | June 18, 2021

Patuloy na ipinatutupad ng Philippine National Police (PNP) ang mandato ng pagpapasuot ng face shield sa mga indibidwal na inirekomenda ng Inter-Agency Task Force for the Management of Emerging Infectious Diseases (IATF).

Sa isang statement, sinabi ni PNP Chief Police General Guillermo Eleazar na ang mahuhuli ay sisitahin lamang at ipapaalala sa kanila na nananatiling walang guidelines ang gobyerno na pinapayagan na ang publiko na hindi magsuot ng face shield habang may pandemya.

“The latest recommendation of the IATF to the President is to continue making mandatory the wearing of face shields in enclosed spaces, commercial areas, public transport, terminals and even places of worship,” ani Eleazar.

“With this, we will continue to enforce the existing policy until the President decides on the matter and the IATF amends the guidelines,” sabi pa niya.

Nagbigay na rin ng direktiba si Eleazar sa lahat ng police personnel na itigil ang pagpataw ng anumang parusa sa mga lalabag na indibidwal.

Ayon kay Eleazar, naghihintay pa ang PNP para sa issuance ng bagong guidelines base sa desisyon ni Pangulong Rodrigo Duterte.

Kahapon, kinumpirma ni Presidential Spokesperson Harry Roque ang naging pahayag ni Pangulong Duterte, na ginawa habang nakikipag-usap sa mga senador sa Malacañang nitong Miyerkules, na kailangang magsuot ng face shields sa mga ospital na lamang at kinokonsidera itong polisiya.

Gayunman, inapela naman ito ng IATF, ang policy-making body ng gobyerno sa pagtugon laban sa COVID-19, kay Pangulong Duterte.

IATF, puwedeng umapela sa "face shield sa ospital na lang" na utos ni PDu30

ni Lolet Abania | June 17, 2021

Ikinokonsiderang polisiya ang naging pahayag ni Pangulong Rodrigo Duterte na kinakailangan ang pagsusuot ng face shield sa ibabaw ng face mask sa mga ospital na lamang sa gitna ng COVID-19 pandemic, ayon sa Malacañang.

“I can confirm what Senate President [Vicente] Sotto and Senator [Joel] Villanueva said that the President did say that the wearing of face shield should only be in hospitals,” ani Presidential Spokesperson Harry Roque sa Palace briefing ngayong Huwebes.

“When the President has decided, that is the policy,” dagdag ni Roque. Gayunman, ayon kay Roque, ang Inter-Agency Task Force on Emerging Infectious Diseases (IATF-EID), ang policy-making body ng gobyerno sa pagtugon sa COVID-19 ay maaaring umapela sa Pangulo sa desisyon nito.

“The President announced a new policy but this is without prejudice to the IATF appealing the decision of the President,” sabi ng kalihim.

Una namang binanggit ni Cabinet Secretary Karlo Nograles na magdedesisyon ang IATF hinggil sa isyu sa gagawing pulong ngayong Huwebes ng hapon.

"No face shield" sa labas ng bahay, oks sa DOH

ni Lolet Abania | June 16, 2021

Maaari nang alisin ang mga face shield kung nasa labas ng bahay dahil sa mababa ang panganib ng transmission ng COVID-19 sa mga open space, ayon sa isang opisyal ng Department of Health.

Nang tanungin kung ang mga manggagawa na nagtatrabaho sa labas ay papayagan nang alisin ang kanilang mga face shields habang naka-duty, inamin ni DOH Undersecretary Leopoldo Vega na ang moisture o tubig na nabubuo sa face shields ay posibleng maka-distract sa mga workers.

“‘Yung face shields, kakailanganin naman talaga ‘yan ‘pag nasa indoor ka, nasa mall ka, or ‘pag may interaction ka face-to-face inside,” ani Vega sa Laging Handa briefing ngayong Miyerkules.

“Pero ‘pag nasa outside naman, kasi alam naman natin ang risk of transmission is very low, at lalung-lalo na kapag naglalakad ka lang sa kalye o kaya nagtatrabaho ka, kasi makaka-affect ‘yung moist nito so puwede n’yong tanggalin ‘yan,” dagdag niya.

Matatandaang umani ng kontrobersiya si Manila Mayor Isko Moreno, matapos na hilingin sa gobyerno na pag-isipan ang polisiya ng pag-oobliga ng paggamit ng face shield kapag nasa labas ng bahay.

Giit naman ni DOH Secretary Francisco Duque III, patuloy dapat na nakasuot ng face shields ang mga mamamayan dahil nananatiling mababa ang bilang ng nababakunahan ng COVID-19 vaccines. Gayundin, ang paggamit aniya ng face shield ay sinuportahan ng siyensiya.

Gayunman, hindi pa tumutugon ang DOH sa hiling na linawin ang face shield policy. Noong nakaraang taon, ayon sa DOH, nasa desisyon ng Inter-Agency Task Force on COVID-19 response (IATF) para sa piling laborers gaya ng construction workers na maaari nang alisin ang kanilang face shields. Subalit, diin ni Vega, ang face shields ay kinakailangan pa ring isuot indoors para sa “dagdag-proteksiyon” laban sa COVID-19.