Hirit sa Marcos administration.. Face mask mandate, ituloy pa rin — DOH

ni Lolet Abania | June 4, 2022

Iminungkahi ni Department of Health (DOH) Secretary Francisco Duque III sa papasok na administrasyong Marcos na huwag munang alisin ang ipinatutupad na face mask mandate kahit pa bumaba na ang bilang ng COVID-19 cases nang mas mababa sa 200 na naitala kamakailan.

Sa isang radio interview ngayong Sabado, sinabi ni Duque na maliban sa pagbabakuna ng tinatayang 70 milyong indibidwal laban sa COVID-19, ipapasa ng administrasyong Duterte sa susunod na administrasyon ang malawakang masking compliance ng mga Pilipino.

Batay ani Duque sa John Hopkins University, ang populasyon ng masking mandate compliance ay nasa 91% hanggang 96%.

“Huwag natin tanggalin ito muna. Premature eh,” diin ni Duque. “Let’s keep it at that. ‘Wag muna natin tanggalin ang ating mga mask lalo na nag-full capacity na ang transport sector, nag-full capacity na ang establishments,” sabi pa niya.

Giit naman ni Duque na sa kabila ng iba’t ibang super-spreader events sa katatapos na elections period at pagsulpot ng mga subvariants ng Omicron, hindi nagkaroon ng surge sa bilang ng mga daily cases ng virus.

“Nag-plateau tayo, mababa na ang mga kaso. Hopefully ay bumaba pa ito below 100 [cases] per day. Nakikita naman natin nasa less than 200 [per day] nitong mga nakaraang mga linggo,” saad ni Duque.

“Ibig sabihin niyan ‘yung masking mandate natin, pagsunod ng Pilipino sa minimum public health standards ay napakamataas,” pahayag pa niya.

Umaasa naman ni Duque na ipagpapatuloy pa rin ng susunod na administrasyon ang face mask mandate. Una nang sinabi ni Pangulong Rodrigo Duterte na ang mandatong pagsusuot ng face masks ay ili-lift o aalisin sa Pilipinas kapag natapos na ang kanyang termino.

“Ipagpatuloy na lang ng susunod na administrasyon … ‘wag tanggalin completely,” pahayag ni Duque.

Matapos paluwagin ang polisiya sa face shield… Double mask, payo ng isang doktor

ni Jasmin Joy Evangelista | September 25, 2021

Mayroong payo ang isang doktor tungkol sa paglabas ng bahay sa kabila ng bagong polisiya sa pagsusuot ng face shields.

Matatandaang inaprubahan ni Pangulong Duterte na hindi na kailangang magsuot ng face shields sa open areas.

Ito ay isusuot na lamang sa matataong lugar o mga nasa 3C category, at sa mga high risk na lugar gaya ng mga ospital.

Ayon kay Dr. Maricar Limpin, pangulo ng Philippine College of Physicians, na magandang isuot na rin ang face shield bago umalis ng bahay para hindi ito malimutang dalhin kung pupunta sa mga matataong lugar.

Mahalaga rin daw na linisin ang face shield dahil may pagkakataong puwede ring magkaroon ito ng virus.

"Importante ‘di ba pinipigilan natin yung masyadong paghahawak at kung maghahawak kayo kailangan immediately maglagay kayo ng alcohol o hand sanitizer or mas maganda maghugas ng kamay with soap and water," ani Limpin.

Kung hindi naman makakapagsuot ng face shield, inirekomenda ni Limpin na mag-double mask o gumamit ng N95 mask.

Samantala, patuloy pa rin na hinimok ng DILG ang mga tao na patuloy na magdala ng face shields tuwing lalabas ng bahay.

Nakatakdang magbalangkas ng mga panuntunan ang mga awtoridad tungkol sa mga “3C areas."

7,999 Covid cases sa isang araw... Face mask sa loob ng bahay — DOH

ni Mary Gutierrez Almirañez | March 21, 2021

Inabisuhan ng Department of Health ang publiko na magsuot ng face mask kahit sa loob ng bahay partikular na kung may kasamang vulnerable o senior citizen, matapos maitala nitong Sabado ang pinakamataas na kaso ng COVID-19 simula nang magka-pandemic sa bansa.

Batay sa inilabas na DOH advisory, kailangang manatili na lamang sa bahay kung walang importanteng gagawin sa labas katulad ng non-essential travel. Inirekomenda rin ang online mass ngayong Holy Week sa halip na lumabas ng bahay.

Kailangan ding may maayos na air circulation ang bawat tahanan. Dagdag nito, kailangang mag-report kaagad sa doktor kapag nakararanas ng sintomas ng virus.

Sa mga nakakaramdam ng mild symptoms ay sa isolation facility dapat pumunta sa halip na sa ospital sapagkat anila, nakalaan ang mga ospital para sa severe cases ng COVID-19.

Kaugnay nito, iginiit ni Professor Jomar Rabajante ng University of the Philippines Pandemic Response Team na pumalo na sa 15% ang positivity rate ng COVID-19 sa Metro Manila at may posibilidad 'yung magpatuloy hanggang sa Mayo kung magsusunud-sunod ang mataas na bilang ng mga nagpopositibo kada araw.

Aniya, "Dati, bumababa tayo ng less than 10, ngayon sobrang taas, 15%, lalo na sa NCR… Sa ngayon, siyempre ang aming mga monitoring depende kung ano ang mangyayari sa susunod na araw. Pero ngayon, given ang evidence na nakukuha nating datos, posibleng matagalan, posibleng umabot ng April or May, depende sa interventions ng government."

Giit pa niya, “Kapag may isang tao na lumabas, kapag bumalik sa bahay, posibleng makahawa ng household.” Dulot ng napakabilis na hawahan ay umabot na sa 7,999 ang nadagdag sa kaso ng COVID-19 at maging ang mga ospital ay nanganganib na ring mapuno.