Sa pagtakbong senador ng TV host… ROBIN AT AI AI, OKS NA PALIT KAY WILLIE SA WOWOWIN

ni Erlinda Rapadas - @Teka Nga! | July 20, 2021

Dahil maraming natutulungan si Robin Padilla at aktibo sa kanyang charity works kahit walang kalamidad, marami ang nagsa-suggest na sana, siya na lang ang kunin ni Willie Revillame upang mag-host ng Wowowin sakaling matuloy na ang TV host sa kanyang pagtakbong senador sa 2022 elections.

Ayaw kasing bitiwan ni Revillame ang kanyang programa sa GMA na tumutulong sa mga taong nangangailangan. Ito ang dahilan kaya hindi maiwan-iwan ni Willie ang Wowowin.

Ang magiging problema lang sakaling tanggapin ni Robin na humaliling host ng Wowowin ay araw-araw ang kanyang magiging trabaho dahil live ang show. Kakayanin kaya ni Binoe ang daily show?

May nagsasabi naman na puwede rin ang Comedy Queen na si Ai Ai delas Alas ang pansamantalang mag-host ng Wowowin. Nabanggit na ito noon ni Ai Ai nang minsang maging guest co-host siya ni Willie sa Wowowin.

Willing daw siyang pumalit kay Revillame. Kayanin din kaya niya ang pagho-host araw-araw?

Abangan na lang ang mga susunod na kaganapan. Tiyak namang mismong si Willie ang mag-a-announce ng kanyang final decision.

Mister, todo-habol pa, inayawan na talaga… KYLIE, IPAPA-ANNUL NA ANG KASAL NILA NI ALJUR

ni Erlinda Rapadas - @Teka Nga! | July 19, 2021

Mukhang paninindigan na nga ni Kylie Padilla ang pagiging single mom matapos makipaghiwalay kay Aljur Abrenica.

Balitang nilalakad na ni Kylie ang proseso upang maipa-annul ang kasal nila ni Aljur pero mukhang hindi matatanggap ng aktor.

Gusto pa rin ni Aljur na ayusin ang problema nila ni Kylie at magkasama-sama pa silang muli.

Mahal na mahal ni Aljur ang dalawa nilang anak na sina Alas at Axl. Kahit puwede naman niyang mahiram ang mga anak nila ni Kylie, iba pa rin kung kumpleto silang magkakasama.

Hindi magiging madali para kay Aljur na muling makuha ang tiwala ni Kylie. Kailangang patunayan niya na nagbago na siya at magiging loyal at faithful husband na.

Ibang-iba na ngayon ang outlook sa buhay ni Kylie. Prayoridad na niya ang kanyang mga anak at hindi ang dating asawa.

Handang patunayan ni Kylie na kaya niyang mag-survive being a single mom lalo na at may career pa siyang masasandalan.

Babu na raw sa showbiz… ECHO, LALAYAS NA NG 'PINAS

ni Erlinda Rapadas - @Teka Nga! | July 17, 2021

Balitang-balita na ang gagawing pagku-quit sa showbiz ng magaling na aktor na si Jericho Rosales.

Tapos na ang kontrata niya sa Star Magic last March 2020. At sa panahon ng lockdown ay hindi na siya tumanggap ng project sa telebisyon.

May dumating na offer sa kanya upang lumabas sa isang movie project sa Los Angeles, California, USA. Isang Fil-Am ang magdidirek nito.

Wala pang ibinibigay na detalye si Jericho tungkol sa nasabing project. Basta nag-post lang siya sa social media na kailangan niyang huminga at magkaroon ng bagong kapaligiran.

Hindi rin sinabi ni Echo kung kailan siya lilipad papuntang LA. Pero, nakasama pa siya nina Coco Martin at Julia Montes na nag-shooting sa Palo, Oriental Mindoro.

Ayon naman sa malalapit na kaibigan ni Jericho, hindi for good ang gagawing pag-alis ng aktor sa 'Pinas. Katulad ni John Lloyd Cruz, kailangan lang ni Echo ng pahinga dahil dumanas siya ng depression dala ng COVID pandemic.

Nagsara pa ang kanyang mga negosyo at pati ang ABS-CBN ay nawalan ng prangkisa.