Pfizer COVID vaccine, for sale na next year — FDA

ni Lolet Abania | August 26, 2021

Inianunsiyo ng Food and Drug Administration (FDA) ngayong Huwebes na posibleng ang mga COVID-19 vaccines ay maging commercially available na sa Pilipinas sa susunod na taon matapos ang full approval sa Pfizer jabs ng United States.

“Possibly early 2022,” ang naging tugon ni FDA Chief Eric Domingo nang tanungin sa isang interview kung kailan magiging commercially available sa publiko ang mga COVID-19 vaccines.

Nitong linggo lang ipinagkaloob ng US FDA ang full approval para sa Pfizer vaccine, kung saan ito ang kauna-unahang COVID-19 shot na nakatanggap ng ganoong approval.

Gayunman, sa Pilipinas, ang full approval ng Pfizer vaccine ay nakadepende sa isusumite ng American drugmaker na aplikasyon para sa certificate of product registration o market authorization.

“Wala pa,” ani Domingo nang tanungin naman kung ang FDA ay nakatanggap na ng anuman mula sa Pfizer na interesado sila na makakuha rin ng full approval mula sa gobyerno.

“But we already sent them the requirements and process for COVID-19 vaccine registration,” sabi ni Domingo.

Matatandaang noong Mayo, sinabi ni Domingo na ang application para sa full approval nito ay pinakamaaga na maaari nilang mai-file nang mga huling buwan ng 2021.

“Maaari na po siyang ibenta hindi lamang sa gobyerno katulad ngayon, kundi [pati] sa mga ospital, sa mga clinic, sa mga pharmacy, maaari na rin pong i-distribute ‘yan,” saad ni Domingo noon sa isa ring interview.

Ayon pa sa FDA chief, posibleng simulan na ng Pfizer na humingi ng full approval ng kanilang COVID-19 vaccine sa iba pang mga bansa.

“So ‘yun pong mga EUA natin, after one year ‘yan, mag-e-expire na po lahat ‘yan at ang maaari na lamang gamitin ay mga fully approved product,” paliwanag pa ni Domingo.

60 nabakunahan ng 2 doses ng Sinovac, nagka-COVID pa rin

ni Lolet Abania | June 30, 2021

Nasa 60 indibidwal ang naitalang tinamaan ng COVID-19 matapos makumpleto ang kanilang second dose ng Sinovac vaccine, subalit lahat sila ay mild cases lamang habang wala namang nasawi.

Ayon kay Food and Drug Administration (FDA) Chief Eric Domingo, base sa report mula sa Adverse Effect unit of vaccines, sa nasabing bilang, 27 sa kanila ang tinamaan ng COVID-19 wala pang 14 araw matapos mabakunahan ng second dose ng Sinovac vaccine, habang 33 indibidwal ang nagkasakit nito dalawang linggo makaraang maturukan ng naturang bakuna.

“These are all mild cases and the infection was drastically reduced [compared with those who got COVID-19 after getting first dose],” ani Domingo sa Laging Handa public forum ngayong Miyerkules.

Samantala, 5 katao na nakakumpleto naman ng doses ng AstraZeneca vaccine ang na-infect ng COVID-19 wala pang dalawang linggo nang mabakunahan ng dalawang doses. Isa naman ang nagkasakit ng COVID-19 matapos ang 14 araw na maturukan ng second dose ng AstraZeneca vaccine.

Gayundin, isa ang nagkaroon ng COVID-19 wala pang dalawang linggo matapos makatanggap ng second dose ng Sputnik V vaccine, habang isa naman ay nagkasakit nito dalawang linggo makaraang mabigyan ng second dose ng Pfizer shot.

Matatandaang sinabi ng Department of Health (DOH) na kinokonsidera na ang isang indibidwal ay fully vaccinated na dalawang linggo matapos na matanggap ang second dose ng bakuna kontra-COVID-19.

Gayunman, ang mga indibidwal na fully vaccinated ay kinakailangan pa ring magsuot ng face mask, face shield at isinasagawa ang social distancing habang hindi pa naaabot ang herd immunity ng bansa.

Paliwanag naman ni Domingo na kahit may 60 indibidwal na tinamaan ng mild COVID-19 matapos makumpleto ang Sinovac vaccine shots, hindi ibig sabihin na ang Chinese vaccine ay mas mababa ang kalidad kaysa sa ibang brand ng bakuna.

“It cannot be compared since the bulk of the supply that were first delivered were Sinovac,” sabi ni Domingo.

Ivermectin, puwede nang gamitin sa tao — FDA

ni Lolet Abania | May 7, 2021

Inaprubahan ng Food and Drug Administration (FDA) ang isang aplikasyon ng lokal na kumpanya na i-register ang Ivermectin bilang isang anti-nematode na maaari nang gamitin sa tao pangontra-bulate.

Unang nakilala ang Ivermectin bilang gamot sa hayop.

“Lloyd Laboratories applied for a CPR (certificate of product registration) for locally manufactured ivermectin as an anti-nematode drug,” ani FDA Chief Eric Domingo.

“It was granted after they submitted data to support [the] quality and stability of the product,” sabi pa ni Domingo.

Ang CPR ay isang market authorization kung saan ang isang gamot ay pinapayagang komersiyal na ibenta.

Matatandaang binanggit ni Domingo na dalawang kumpanya ang nag-apply ng CPR para sa Ivermectin.

Naging kontrobersiyal ang naturang anti-parasitic drug matapos na ilang grupo at maging mga mambabatas ay nagsasabing maaari itong gamitin para mapigilan o makagamot sa COVID-19.

Gayunman, binigyang-linaw ng FDA at Department of Health na ang kasalukuyang ebidensiya ay hindi pa rin sumusuporta para sa paggamit ng Ivermectin bilang isang COVID-19 treatment.

Ang World Health Organization, US FDA, European Medicines Agency at ang Ivermectin manufacturer na Merck ay hindi rin inirerekomenda ang paggamit ng naturang gamot sa mga COVID-19 patients.

Isang clinical trial para sa Ivermectin ang isasagawa ngayong taon upang pag-aralan ang epekto nito sa COVID-19 patients.