Diwata, muntik halikan ni Coco

ni Angela Fernando @News | April 29, 2024

Inspirational ang naging atake ng guesting ni Deo Balbuena o mas kilala bilang si Diwata ng Diwata Pares Overload sa YouTube channel ni Toni Gonzaga na "Toni Talks."

Ibinahagi ni Diwata kay Toni na only boy pala siya at supposed to be "Jr." ng kanyang ama kaya lagi raw itong galit sa kanya n'un dahil alam na babae rin siya.

Marami mang pagsubok ang dumating sa buhay ng ngayon ay social media personality na, hindi niya ito hinayaang pigilin siya sa pag-abot ng kanyang pangarap.

Sa katunayan, parte na si Diwata ng Batang Quiapo at may shoot na weekly.

Dahil daw bago sa kanya ang mga shooting, nanginginig siya kapag nakakasama niya ang mga kilalang artista katulad nina Coco Martin at Ivana Alawi.

Sey ni Diwata, muntik niya na raw maka-kissing scene si Coco dahil inalok siya nitong hahalikan siya dahil kinakabahan siya sa gitna ng shoot.

Benta naman sa mga netizens ang ibinahaging kuwento ni Diwata dahil bukod sa na-motivate sila sa buhay, natawa pa sila dahil sa mga kuwelang hirit nito.

JEFF MOSES, NILINAW ANG RELASYON KAY JILLIAN

ni Eli San Miguel - Trainee @Entertainment | April 10, 2024

Nilinaw na ni Jeff Moses ang kasalukuyan niyang relasyon sa aktres na si Jillian Ward.

Sa episode ng "Fast Talk with Boy Abunda" noong Martes, sinabi ng Sparkle artist na hindi niya nililigawan ang kanyang co-star dahil matalik na magkaibigan lamang sila.

“Wala pa po ako sa ganoong mindset, and I know, same with Jill, pero hinahayaan ko lang,” anang aktor.

“Hindi naman natin alam kung ano'ng mangyayari bukas, ganyan. So parang kumbaga chill lang. Chill lang ako,” dagdag niya.

Sinabi ni Jeff na kasalukuyan siyang nakatuon sa kanyang sarili, kaya hindi pa niya alam kung manliligaw siya kay Jillian balang-araw.

“Hindi ko rin masabi, eh, kasi ngayon talaga, parang nagpo-focus ako sa sarili ko, siyempre na nandito ako sa industriya, a very competitive na business,” aniya.

“So ayun po, nagpo-focus ako sa work, sa career ko, and for sure, si Jill, sa nakikita ko, 'yun din 'yung priority niya. Work, family, ganyan. So parang ako, hindi ko iniisip muna 'yun,” dagdag ng aktor.

Magkasama sina Jillian at Jeff sa sikat na GMA Afternoon Prime series na "Abot-Kamay na Pangarap."

Inihayag ni Jillian noong nakaraang taon na sila ni Jeff ay "sobrang close."

Noong Pebrero, sinorpresa naman ni Jeff si Jillian ng regalo para sa Valentine's Day.

‘Selos’ ni Shaira Moro, ibabalik na sa streaming platforms

ni Eli San Miguel - Trainee @News | April 9, 2024

Inaasahan ang pagbabalik sa mga streaming platforms ng viral song ni Shaira Moro na "Selos."

Si Shaira Abdullah Alimudin a.k.a Shaira Moro ay sumikat sa pamamagitan ng Tiktok dahil sa kanyang mga kanta na "Selos" at "Forever Single" na naging viral at ngayo’y binansagan na siya bilang Queen of Bangsamoro Pop.

Sa isang video sa Facebook nitong Martes, ibinahagi niya na nagkaroon sila ng mapayapang negosasyon sa kampo ng Australian singer-songwriter na si Lenka, na nagresulta sa positibong progreso.

“Sa katunayan, naging mahinahon at mapayapa ang pag-uusap namin ng kampo ni Lenka at nauwi ito sa pagkakaroon ng kasunduan hinggil sa pamamaraan na muling paglabas ng kanta sa mga online streaming platforms,” pahayag ni Shaira.

“At ngayon nga, nais kong ihayag sa inyong lahat na malapit na po namin ibalik sa mga streaming platforms ang kantang ‘Selos’ kasabay na din po ng ibang kanta ng aming produksyon,” dagdag niya.

Nagbigay rin siya ng mensahe kay Lenka.

“I want to express my deepest gratitude to you and to your team for allowing me this opportunity. Thank you for the smoothest transaction that we had with your team. It was truly an honor to have been communicating with international companies such as yours,” ani Shaira.

Itinuturing ang "Selos" na isang viral hit sa internet, na pansamantalang inalis mula sa mga streaming platforms noong Marso dahil sa isyu ng copyright infringement. Sinabi naman ni Lenka na ang kanyang kampo ay kumuha na ng legal na aksyon laban kay Shaira dahil sa paggamit ng melody ng kanyang kanta na "Trouble is a Friend."

Kinumpirma ng AHS Channel na ang melody ng kanta ay talagang mula sa "Trouble is a Friend" at ngayo'y tinatrabaho nila upang gawing "official cover."

Gayunpaman, nagpapasalamat pa rin si Shaira sa pagiging sikat ng "Selos" at sa mga oportunidad na binuksan nito para sa kanya.