P30K benepisyo ng empleyadong nagka-COVID, kasado na

ni Lolet Abania | May 2, 2021

Hinihintay na lamang ang pirma ni Pangulong Rodrigo Duterte para sa panukalang P30,000 benepisyo na makukuha ng manggagawang tinamaan ng COVID-19, ayon kay Department of Labor and Employment (DOLE) Secretary Silvestre Bello III.

“'Yung sakit na COVID-19 [ay magiging] compensable na ‘yan, hinihintay na lamang ang approval ng ating pangulo,” pahayag ni Bello sa isang virtual interview ngayong Sabado.

Giit ni Bello, naghain ang Employees’ Compensation Commission (ECC) ng panukalang P30,000 one-time benefit na matatanggap ng isang manggagawa na nagkasakit ng COVID-19.

“Merong resolusyon ang ECC diyan. Kapag tinamaan ka ng COVID sa trabaho mo, mayroon kang assistance na P30,000. One time lang po ‘yan,” ani Bello.

Sinabi ng kalihim, ang empleyado, kahit saan man sila nagtatrabaho – micro, small at medium enterprises – ay maaaring kumuha ng naturang benepisyo sa Social Security System (SSS).

“I have no reason to doubt that the president won’t approve it…Kaya pagdating niyan sa lamesa niya, pipirmahan agad ng presidente natin ‘yan,” sabi ni Bello.

Matatandaang noong April 28, inaprubahan ng ECC na pinamunuan ni Bello ang pagkakasama ng COVID-19 sa listahan ng mga itinuturing na occupational at work-related compensable diseases.

Nangangahulugan ito na ang isang manggagawa mula sa pribado o pampublikong sektor na tinamaan ng virus ay may karapatan na makatanggap ng kompensasyon mula sa tinatawag na Employees’ Compensation Program ng ECC.

Nakasaad sa ECC board resolution 21-04-14, ang isang na-diagnose clinically ng COVID-19 at nagkaroon ng history, signs at sintomas ng COVID-19 habang suportado ng diagnostic proof, kabilang dito ang reverse transcriptase polymerase chain reaction (RT-PCR) test ay itinuturing na compensable sa alinmang sumusunod na kondisyon:

• Kinakailangang may direktang koneksiyon sa mga offending agent o event at ang isang empleyado ay nakabase sa epidemiological criteria at occupational risk (e.g. healthcare workers, screening at contact tracing teams, etc.)

• Ang trabaho ng isang manggagawa ay nangangailangan ng palagiang face-to-face at close proximity interaction sa publiko o sa mga confirmed cases para sa healthcare workers’.

• Nakuha ang COVID-19 sa pinagtatrabahuhan.

• Nakuha ang COVID-19 dahil sa pagko-commute papasok at pauwi sa trabaho.

1 M manggagawa, tambay sa MECQ

ni Lolet Abania | April 29, 2021

Tinatayang nasa isang milyong manggagawa ang nananatiling ‘displaced’ o walang trabaho sa NCR Plus areas dahil sa pagpapatupad ng modified enhanced community quarantine (MECQ), ayon kay Department of Trade and Industry (DTI) Undersecretary Ruth Castelo.

Sa Laging Handa briefing ngayong Huwebes, sinabi ni Castelo na nabawasan na ito kumpara noong una na umabot sa 1.5 milyong displaced employees ang nai-record makaraang ang NCR Plus -- Metro Manila, Bulacan, Cavite, Rizal at Laguna – ay nasa ilalim pa ng enhanced community quarantine (ECQ).

“1.5 million employees in NCR Plus were displaced during ECQ but 500,000 of them were able to return to their jobs under MECQ,” ani Castelo.

Matatandaang isinailalim sa ECQ ang NCR Plus noong Marso 29 hanggang Abril 4 dahil sa pagsirit ng mga kaso ng COVID-19 na labis na nagpahirap sa healthcare system ng bansa.

Sa ECQ, ipinagbawal ang mga non-essential travels, gayundin ang non-essential businesses at iba pang mga serbisyo.

Nang isailalim naman sa MECQ protocol, ipinagbawal ang mga non-essential trips, subali't bahagyang pinayagan ang mga non-essential businesses at services na mag-operate, kung saan naging epektibo ito sa NCR Plus mula Abril 5 hanggang Mayo 14.

Ang mga personal care services at indoor dining sa mga restaurants ay ipinagbabawal pa rin sa MECQ.

Gayunman, hiniling na ng DTI sa gobyerno partikular sa COVID-19 task force na kung maaari ay payagan na ang mga personal care services at indoor dining sa ilalim ng MECQ na magbukas ng kanilang negosyo upang masolusyunan ang problema sa unemployment.

Ipinaliwanag pa ni Castelo na sa personal care services lamang ay mayroong 400,000 displaced workers habang 100,000 empleyado sa mga restaurants na indoor dining ay walang mga trabaho sa MECQ.

“Iyong personal care services po, barbershops and salons lang po ito. Hindi kasama ang spa and massage [services]. Kaya nga po iyon ang rekomendasyon ng DTI [na magbukas ng ibang industriya] para unti-unti, dahan-dahan na pong makabalik sa trabaho iyong one million who were displaced,” sabi ni Castelo.

Sinabi rin ni Castelo na iminungkahi ng ahensiya na payagang mag-operate ang indoor dining ng 10% capacity, at para sa personal care services naman ay payagang magbukas ng hanggang 50% subalit, dapat outdoor ang lokasyon nito.

50% empleyado sa gov’t. offices, simula Marso 22

ni Lolet Abania | March 18, 2021

Isasailalim sa mas mahigpit na restriksiyon ang lahat ng opisina ng gobyerno at mga state owned and controlled operations kung saan bibigyan lamang sila ng 30% hanggang 50% operational capacity na magsisimula sa Marso 22 hanggang Abril 4 dahil sa patuloy na pagtaas ng COVID-19 cases.

Ito ang nakasaad sa Memorandum Circular 85 na inisyu ni Executive Secretary Salvador Medialdea ngayong Biyernes, March 19, kasabay ng naitalang pinakamataas na bilang na 7,103 na bagong kaso ng COVID-19 sa isang araw simula nang magkapandemya.

Nakapaloob din sa memo na ang polisiya ay ipapatupad, “unless a higher capacity is required in agencies providing health and emergency frontline services, border control, and other critical services.”

Ayon pa sa memo, kaunti lamang ang dapat na bilang ng mga empleyado o manggagawa na papayagan o kailangang mag-report sa trabaho sa isang partikular na ahensiya ng gobyerno.

Gayundin, nakasaad sa memo na ang lahat ng ahensiya, kabilang ang bawat opisina at unit nito, ay dapat tiyakin na hindi maaantala o mahihinto ang kani-kanilang serbisyo at trabaho sakaling nagpatupad ng alternatibong work arrangements ang kanilang ahensiya at naaayon ito sa panuntunan at regulasyon ng Civil Service Commission.

Dagdag pa rito, ang head ng ahensiya ay kinakailangang magsumite ng request sa Office of the President para sa clearance sakaling i-shut down ang kanilang opisina, kabilang ang paghahain ng mga data at ang itatagal ng pagsasara nito, at kapag ang isang ahensiya ay magpapatupad ng temporary closure dahil sa patuloy na pagtaas ng COVID-19 cases.

“No closure shall be implemented until such clearance is obtained from the Office of the President,” ayon sa memo.