Habang nagtatrabaho.. P10K para sa empleyadong nagka-COVID-19 — ECC

ni Lolet Abania | September 29, 2021

Ipinahayag ng Employees’ Compensation Commission (ECC) ngayong Miyerkules na ang mga manggagawa na tinamaan ng COVID-19 sa ilalim ng tinatawag na job-related circumstances ay makakatanggap ng tinatayang P10,000.

Sa isang interview kay ECC senior information officer Alvin Garcia, sinabi nitong ang naturang assistance ay hiwalay sa mga benepisyo mula sa Social Security System (SSS) at Government Service Insurance System (GSIS).

“They can receive cash assistance benefit. Sa ngayon, fixed siya na P10,000 for sickness claim, P15,000 for death claim,” ani Garcia. Ayon kay Garcia, para naman sa mga tinamaan ng COVID-19 noong nakaraang taon ay maaari pa ring maka-avail ng cash aid.

Gayunman, paliwanag ni Garcia, ang mga empleyado na nakasakop sa tinatawag na work-from-home arrangement simula ng implementasyon ng community quarantines ay hindi covered ng cash assistance ng ECC.

Sinabi naman ni Garcia na pinag-aaralan na sa ngayon ng mga medical experts ang coverage para sa work-from-home employees na nagkaroon ng COVID-19.

Ang mga requirements para sa P10,000 cash assistance ay ang mga sumusunod:

• ang accomplished forms na downloadable mula sa mga websites ng ECC, SSS, GSIS

• certificate of employment na naka-indicate ang huling petsa na nag-report sa trabaho bago ang infection ng empleyado

• swab test result

• medical certificate o quarantine clearance

• dalawang valid IDs Noong Abril, inaprubahan ng ECC ang inclusion o pagsama ng COVID-19 sa kanilang listahan ng occupational at work-related compensable diseases.

P30K benepisyo ng empleyadong nagka-COVID, kasado na

ni Lolet Abania | May 2, 2021

Hinihintay na lamang ang pirma ni Pangulong Rodrigo Duterte para sa panukalang P30,000 benepisyo na makukuha ng manggagawang tinamaan ng COVID-19, ayon kay Department of Labor and Employment (DOLE) Secretary Silvestre Bello III.

“'Yung sakit na COVID-19 [ay magiging] compensable na ‘yan, hinihintay na lamang ang approval ng ating pangulo,” pahayag ni Bello sa isang virtual interview ngayong Sabado.

Giit ni Bello, naghain ang Employees’ Compensation Commission (ECC) ng panukalang P30,000 one-time benefit na matatanggap ng isang manggagawa na nagkasakit ng COVID-19.

“Merong resolusyon ang ECC diyan. Kapag tinamaan ka ng COVID sa trabaho mo, mayroon kang assistance na P30,000. One time lang po ‘yan,” ani Bello.

Sinabi ng kalihim, ang empleyado, kahit saan man sila nagtatrabaho – micro, small at medium enterprises – ay maaaring kumuha ng naturang benepisyo sa Social Security System (SSS).

“I have no reason to doubt that the president won’t approve it…Kaya pagdating niyan sa lamesa niya, pipirmahan agad ng presidente natin ‘yan,” sabi ni Bello.

Matatandaang noong April 28, inaprubahan ng ECC na pinamunuan ni Bello ang pagkakasama ng COVID-19 sa listahan ng mga itinuturing na occupational at work-related compensable diseases.

Nangangahulugan ito na ang isang manggagawa mula sa pribado o pampublikong sektor na tinamaan ng virus ay may karapatan na makatanggap ng kompensasyon mula sa tinatawag na Employees’ Compensation Program ng ECC.

Nakasaad sa ECC board resolution 21-04-14, ang isang na-diagnose clinically ng COVID-19 at nagkaroon ng history, signs at sintomas ng COVID-19 habang suportado ng diagnostic proof, kabilang dito ang reverse transcriptase polymerase chain reaction (RT-PCR) test ay itinuturing na compensable sa alinmang sumusunod na kondisyon:

• Kinakailangang may direktang koneksiyon sa mga offending agent o event at ang isang empleyado ay nakabase sa epidemiological criteria at occupational risk (e.g. healthcare workers, screening at contact tracing teams, etc.)

• Ang trabaho ng isang manggagawa ay nangangailangan ng palagiang face-to-face at close proximity interaction sa publiko o sa mga confirmed cases para sa healthcare workers’.

• Nakuha ang COVID-19 sa pinagtatrabahuhan.

• Nakuha ang COVID-19 dahil sa pagko-commute papasok at pauwi sa trabaho.

Benepisyo ng empleyadong pumapasok habang may pandemya, isinusulong

ni Mary Gutierrez Almirañez | March 24, 2021

Nanawagan si Senator Risa Hontiveros sa Department of Labor and Employment (DOLE) at Employees Compensation Commission (ECC) upang gawing ‘occupational disease’ ang COVID-19 para mabigyan ng insurance at iba pang benepisyo ang mga empleyadong pumapasok sa trabaho, batay sa pahayag niya ngayong Miyerkules, Marso 24.

Aniya, “Workplaces and mass transportation are the new hotspots of virus transmission. Dapat nang aksiyunan ng gobyerno ang panawagan na gawing occupational disease ang COVID-19 to ensure that the workers who will contract the disease while at work or in transit will be compensated under the national policy for employment injury benefits.”

Dagdag pa niya, “Pinabalik ang manggagawa sa trabaho pero kulang na kulang ang pag-aalagang ibinibigay ng gobyerno. Huwag natin silang tratuhing parang imortal.

Hindi curfew o checkpoints ang kailangan kundi garantisadong proteksiyon sakaling mahagip o tamaan sila ng virus.” Iginiit din niya na posibleng nakukuha ng mga empleyado ang virus sa tuwing bumibiyahe sila sakay ng pampublikong transportasyon kaya dapat lamang ikonsidera ang ginagawa nilang sakripisyo upang mabigyan ng karagdagang benepisyo.

“Hindi pa huli ang lahat para ituwid ang pagkakamali. Huwag lang puro lip service ang excellent performance. Kung magpapatuloy ito, itinutulak lang ang mga manggagawa sa bingit ng walang-katapusang pangamba, sakripisyo at pagkagutom,” sabi pa niya.

Matatandaang inihain ni Sen. Hontiveros ang Senate Bill 1441 o Balik Trabahong Ligtas Act nu’ng nakaraang taon na layuning masaklaw ng PhilHealth ang mga benepisyo ng bawat empleyadong pumapasok sa trabaho sa gitna ng pandemya, kabilang ang mga contractual, contract of service, probationary at job order.