Accounting sa mga pulis na may kamag-anak na kandidato sa 2022 elections, iniutos ni PNP Chief Eleaz

ni Jasmin Joy Evangelista | October 5, 2021

Inatasan ni PNP Chief Gen. Guillermo Eleazar na magsagawa ng accounting sa lahat ng police personnel na may mga kamag-anak na tatakbo sa nalalapit na 2022 elections.

Ayon kay Eleazar, pag-aaralan nila ang paglipat sa mga personnel sa ibang assignment o ibang lugar kung saan wala silang kamag-anak na kakandidato.

Ito ay upang maiwasan ang mga reklamo tungkol sa mga pulis na nangangampanya umano para sa kanilang kamag-anak na sakop sa kanilang area of responsibility, tulad ng natanggap nilang hinaing noong nakaraang eleksiyon.

Giit ni PNP Chief, ayaw na nitong maulit na may mga reklamo na may kinikilingang pulitiko ang ilan sa kanilang mga tauhan.

Muling binigyang-diin ni Eleazar na ang PNP ay mananatiling apolitical.

Mayor Isko, naghain na ng COC sa pagka-pangulo

ni Jasmin Joy Evangelista | October 4, 2021

Nag-file na ng kanyang certificate of candidacy (CoC) si Manila Mayor Isko Moreno para sa pagtakbo bilang pangulo sa darating na halalan.

Kasama ni Moreno ang kanyang running mate na si Dr. Willie Ong na tatakbong bise presidente.

Sa labas ng Sofitel hotel ay naghihintay naman ang mga supporters ng alkalde.

“Mga kababayan, tanggapin ninyo ang aplikasyon ko,” ani Domagoso na siyang standard bearer ng Aksiyon Demokratiko.

“Ako po ay magiging kaisa ninyo, kaisa ninyo upang mapigilan ang pagkakahati-hati natin bilang mamamayan. We are too divisive and indecisive… Today will be part of history and I hope it’s destiny,” aniya.

Nasa area rin ang senatorial bet na si Samira Gutoc para ipakita ang suporta sa alkalde.

Senatorial candidate Samira Gutoc, ipinaalam kay VP Leni ang paglipat ng partido

ni Jasmin Joy Evangelista | October 4, 2021

Ipinaalam daw ng senatorial candidate na si Samira Gutoc sa dating kaalyadong si VP Leni na siya ay lilipat ng partido.

Si Gutoc ay opisyal nang naghain ng certificate of candidacy sa ilalim ng partidong Aksyon Demokratiko.

Aniya, pinadalhan niya ng sulat si Robredo upang ipaalam ang paglipat sa partido ni Manila Mayor Isko Moreno.

“I wrote to VP Leni if I could meet her at least maybe get a guidance on political, but I respected her, siya po ay talagang manager ng operations kasi ka-partner niya ako sa Ako Bakwit so more deeply kami magkapatid or inaanak sa humanitarian operations so huwag naman sana masamain ng publiko na nagtraydor si Sam, no,” ani Gutoc.

Hindi rin umano siya pinigilan ng pangalawang pangulo sa kanyang desisyon.

“VP Leni understood, she didn’t dissuade me. I reached out na ito po yung offer ng Aksyon Demokratiko. Hindi naman po ako dinissuade ni Ma’am VP,” aniya.

Nawa raw ay hindi sumama ang loob sa kanya ng dati na niyang supporters.

“I’m the same woman who fights and who fought for you na talagang pinanggalingan ay giyera and I will continue to speak about kahirapan at kagutuman,” paliwanag ni Gutoc.

Dagdag pa ni Gutoc, ipinagdadasal niya si Robredo sa pagdedesisyon nito kung tatakbo o hindi sa pagkapangulo.