Guidelines ng Comelec sa local absentee voting, alamin

ni Jasmin Joy Evangelista | October 31, 2021

Inilabas na ng Commission on Elections ang guidelines tungkol sa local absentee voting sa 2022 elections.

Ito ang mas maagang pagboto ng mga opisyal at empleyado ng gobyerno tulad ng pulis, sundalo, mga miyembro ng media, bloggers, at freelance journalists na naka-duty sa araw ng halalan at hindi makakaboto sa kani-kanilang presinto.

Sa Marso 7, 2022, ang deadline ng paghahain ng sinumpaang application form.

Ang government workers ay magsa-submit ng application sa surveyor at ang mga head naman ng opisina ang magtatalaga ng lugar kung saan maaaring bumoto ang mga ito.

Sa local Comelec office naman ang magsa-submit ang media at boboto sa kung saan maghahain ng kanilang aplikasyon.

Mula April 27 hanggang 29 ang botohan sa local absentee voting at national positions lang ang maaaring iboto.

Isisilid ang mga napunang balota sa envelope at lalagyan ng paper seal.

Para sa mga mataas ang temperatura at magpapakita ng sintomas ng COVID-19, magkakaroon ng isolation polling place kung saan pabobotohin ang mga ito.

Hahatiran ng balota ang government workers na magpopositibo sa COVID-19 at naka-quarantine sa compound kung saan gaganapin ang local absentee voting.

Bibilangin ang mga boto sa May 9 kasabay ng bilangan ng mga bumoto sa araw ng halalan at isang buwan na overseas voting.

63M target registrants, naabot na... Last day ng voter registration, dinagsa – Comelec

ni Lolet Abania | October 30, 2021

Dagsa pa rin ng mga indibidwal na nais na humabol sa huling araw ng voter registration para sila makaboto sa 2022 national at local elections ngayong Sabado, ayon sa Commission on Elections (Comelec).

“Ngayon po’ng last day, asahan po talagang marami ang nais pang magpa-register, dagsa ang tao ngayon,” ani Comelec Director for Education and Information Department na si Elaiza Sabile-David.

Sinabi ni Sabile-David na ang target ng Comelec na bilang ng mga registrants ay kanila nang naabot.

“Ang target natin nasa 63M lang as of October 18 at hindi pa tapos ang registration at hindi pa namin nakuha ang ibang data from the field offices, nasa 63,600,000 na po tayo,” sabi ng opisyal.

Ayon kay Sabile-David, mas marami ang mga lalaki kumpara sa mga babae mula sa mga bagong nagparehistro.

“As of Oct. 18, makikitang mas marami nang kaunti lang ang mga lalaki sa babae, nasa 3,102,854 at ang sa babae naman nasa 3,059,268. Historical data, kadalasan mas marami ang babae pagdating sa registration. Hindi pa naman tapos at wala pang kumpletong datos,” saad ni Sabile-David.

Batay sa datos ng Comelec nitong Setyembre 30, nasa 374,000 ang nagparehistro sa vulnerable sectors, may 557,000 indigenous people, 10 milyong senior citizens at 23 milyong mga kabataan.

“Hindi pa po tapos ang registration niyan,” pahayag ni Sabile-David.

Aniya pa, ang ibang mga registrants ay nasasakop sa edad 31 hanggang 59-anyos.

Paniwala naman ni Sabile-David na mahihigitan pa nila ang naging turnout ng mga registrants ng nagdaang eleksyon.

“Nu’ng 2019, national and local elections din po ‘yun pero hindi siya presidential, nasa 76 percent tayo. Nu’ng 2016, dahil presidential elections po ‘yun, umabot tayo ng 82 percent. We will expect po sana na for this 2022, baka it’s more than our turnout in 2019 dahil presidential elections din po siya,” wika ng opisyal.

“Ang challenge lang dito is the pandemic na sana hindi rin maging hadlang po talaga para makakuha ng malaking turnout,” dagdag ni Sabile-David.

Gayunman, una nang sinabi ng Comelec na hindi na nila palalawigin pa ang voter registration matapos ang ginawang extension nito ng hanggang Oktubre 30.

“Maagang nagsimula ang registration. Hindi na po sana nangyayari ‘yung hindi nasasama sa cutoff kung nakapagparehistro lang sana nang mas maaga. Pero kami ay natutuwa kasi ito ay isang mensahe rin na marami pa talaga sa ating mga kababayan ang nais makilahok sa ating eleksiyon,” paliwanag pa ni Sabile-David.

Para sa 2022 May elections... Comelec, naglabas ng pansamantalang listahan ng mga kandidato

ni Lolet Abania | October 29, 2021

Naglabas na ang Commission on Elections (Comelec) ngayong Biyernes ng tentative na listahan ng mga kandidato para sa 2022 national at local elections.

Batay sa Comelec, mayroong 97 mga pangalan ng tentative o pansamantalang listahan ng mga presidential aspirants/candidates na karamihan sa kanila ay tatakbo bilang independent.

Gayundin, nakapagtala ang poll body ng 28 vice presidential at 174 senatorial aspirants. [Click here for list]

Ang Comelec ay naglabas din ng tentative na listahan ng mga tatakbo naman para sa local positions. [Click here for list]

Sa ilalim ng calendar ng Comelec para sa 2022 national at local elections, ngayong Biyernes, Oktubre 29, ang pagsisimula ng posting ng pansamantalang listahan ng mga kandidato.

Ayon sa poll body, inilabas ang tentative lists para payagan ang mga aspirants na ma-check ang kanilang mga pangalan na lalabas sa official ballot.

Ang huling araw ng paghahain ng request o koreksyon ng pangalan na dapat lumabas sa ballot ay sa Nobyembre 8, 2021.

“Aspirants whose names appear on the tentative list of candidates released by the COMELEC have until November 8 to submit their requests for correction of typographical errors in their listed names,” post ni Comelec Spokesperson James Jimenez sa Twitter.

Una nang sinabi ni Jimenez na ang Comelec ay nakatakdang i-publish ang pinal na listahan ng mga kandidato sa Disyembre.

Sinabi rin ni Jimenez na inaasahan ng poll body na matatanggal na ang mga nuisance candidates mula sa kasalukuyang listahan.