Final list ng kandidato sa 2022 elections, posibleng sa mid-December pa mailabas — Comelec

ni Jasmin Joy Evangelista | November 12, 2021

Posibleng sa kalagitnaan ng buwan ng Disyembre na mailalabas ng COMELEC ang pinal na listahan ng mga tatakbo para sa 2022 national at local elections dahil na rin sa mga nakabinbin pang reklamo gaya ng kanselasyon ng mga certificate of candidacy (CoC) sa ilang mga kandidato.

Ayon kay Comelec Spokesperson James Jimenez, nasa 91 ang mga petisyon na tatalakayin ng komisyon bago ang final printing ng mga balota sa Disyembre.

Aniya, ang mga petisyon ay kinabibilangan ng mga tatakbo sa pagka-pangulo, bise presidente, senators at partylist representatives.

Samantala, kahit marami raw ang maghahain ng kanilang withdrawal o magsa-substitute ay hindi na papalawigin pa ng Comelec ang itinakdang deadline sa Lunes.

Mananatiling bukas ang mga tanggapan ng Comelec kahit Sabado pero sarado sa Linggo at muling magbubukas sa Lunes o ang mismong deadline para sa withdrawal ng kandidatura.

Sara nag-withdraw sa 2022 elections... Baste, tatakbong mayor ng Davao City

ni Lolet Abania | November 9, 2021

Nag-withdraw na si Davao City Mayor Sara Duterte-Carpio sa kanyang reelection bid para sa 2022 elections ngayong Martes.

Sa isang post sa Facebook, ayon kay Mayor Sara, papalitan siya ng kanyang kapatid na si incumbent Vice Mayor Sebastian “Baste” Duterte, habang ang abogadong si Melchor Quitain ang tatakbong vice mayor.

“Ngayong hapon wini-withdraw ko ang aking kandidatura sa pagka-Mayor ng Davao City. Si VM Baste ang papalit sa akin. Si Atty. Melchor Quitain ang nominado namin sa pagka-Bise Alkalde. Ito lamang po muna. Maraming salamat po,” ani anak ni Pangulong Rodrigo Duterte.

Una nang nag-withdraw si Baste Duterte ngayong umaga sa kanya ring reelection bid.

Ilang grupo at personalidad na ang nagtutulak kay Sara na tumakbo sa pagka-pangulo sa susunod na eleksyon. Subalit, tinanggihan ito ni Sara at pinayuhan din silang huwag nang gumawa ng caravan para sa kanya.

Sa ilalim ng umiiral na elections rules, ang isang kandidato ay maaaring mapalitan sa panahon ng substitution period basta ang papalitan nito ay nasa pareho ring political party na kandidatong ipapalit.

Para sa 2022 elections, ang substitution period ay hanggang Nobyembre 15, 2021.

Matapos ang extension… Dagdag 400K sa botante

ni Jasmin Joy Evangelista | November 1, 2021

Mula sa target na 300K ay umabot pa hanggang 400K ang mga humabol na nagparehistro sa pinalawig na Comelec voter’s registration.

Ayon sa Comelec, marami ang humabol na babae at mga kabataan.

“We think it was generally successful. Masyadong maraming dumating at talagang dinagsa tayo," ani Comelec Spokesperson James Jimenez.

May field office na agad nagsara dahil nawalan ng kuryente, tulad sa Marawi, pero ayon kay Jimenez, hindi na magkakaroon ng panibagong extension.

Bagaman nag-extend ay masusunod pa rin daw ang Comelec schedule para sa halalan dahil nakapag-adjust sila.

“Kasi lahat naman ng schedule, may slack time nang kaunti para unforeseen circumstantes. Basically ngayon kinain na lahat 'yon so talagang medyo kritikal na ngayon," ani Jimenez.

Naglabas na rin ang Comelec ng tentative list ng mga kandidato para sa 2022 elections at may hanggang Nobyembre 8 para magsumite ng request of correction kung may error sa mga nakalistang pangalan.