P-Du30, tatakbong senador sa 2022 elections

ni Lolet Abania | November 15, 2021

Naghain na si Pangulong Rodrigo Duterte ng kanyang certificate of candidacy na tatakbo sa pagka-senador sa 2022 elections ngayong Lunes.

Una nang kinumpirma ito ni Senador Bong Go na aniya, ihahain ni Pangulo Duterte ang kanyang COC sa headquarters ng Commission on Elections (Comelec) sa pamamagitan ng isang abogado.

Ayon kay PDP-Laban secretary-general Melvin Matibag, si P-Duterte ay tatakbo sa ilalim ng Pederalismo ng Dugong Dakilang Samahan (PDDS), substituting o papalitan ang isang Mona Liza Visorde.

Paliwanag ni Matibag, tatakbo ang Pangulo sa ilalim ng PDDS upang maiwasan ang tinatawag na “legal complications” dahil aniya sa nagaganap na sigalot sa PDP-Laban, gayundin ang rason kaya si Go ay naghain ng kanyang COC sa pagka-pangulo sa ilalim ng ibang partido.

Sa hiwalay na mensahe, sinabi ni Go na ang pagtakbo ni Pangulong Duterte senatorial race ay para mapigilan ang anumang hidwaan sa mga miyembro ng first family.

“Kung ako lang tatanungin, ayaw ko din na [vice president] ang i-file niya. Ayaw ko magkasakitan pa. Tama na ako na lang ang nasaktan. Mataas respeto ko kay Pangulo at sa kanyang pamilya,” sabi ni Go.

Roque, tatakbo sa pagka-senador sa 2022 elections

ni Lolet Abania | November 15, 2021

Naghain na si dating presidential spokesperson Harry Roque ng kanyang certificate of candidacy sa pagka-senador sa 2022 elections ngayong Lunes.

Si Roque ay tatakbo sa ilalim ng Peoples’ Reform Party (PRP), kung saan naghain ng kanyang kandidatura sa huling araw ng substitution period para sa susunod na eleksyon, subalit hindi pa malinaw kung sino ang kanyang pinalitan.

“Ito na po ang huling araw ko bilang presidential spokesperson. Nais ko maging action man sa Senado,” sabi ni Roque sa press briefing umaga ng Lunes.

Tinapos ni Roque ang kanyang huling press briefing kanina na ipinalabas ang video ni Davao City Mayor Sara Duterte habang iniendorso siya sa Senate bid para sa 2022 elections.

“Harry Roque will be our man of action in the Senate. Ibigay natin ang todo at buong suporta sa kanyang kandidatura,” sabi ni Mayor Sara na anak ni Pangulong Rodrigo Duterte.

Matatandang sinabi ni Roque na tatakbo siya sa eleksyon kung si Mayor Sara ay tatakbo rin. Sasabak naman ang alkalde sa pagka-bise presidente.

Ang Peoples’ Reform Party ay itinatag ni yumaong Senador Miriam Defensor Santiago. Si Roque ay dati nang miyembro rito simula pa noong 2018.

Duterte vs. Duterte sa VP race, hindi magdudulot ng kalituhan sa balota — Comelec

ni Jasmin Joy Evangelista | November 15, 2021

Hindi magdudulot ng pagkalito sa mga botante ang pagkakaroon ng dalawang Duterte sa VP race.

Ito ay matapos ang mga substitution o pagpapalit ng mga kumakandidato sa national post nitong Sabado.

Si Inday Sara Duterte-Carpio na dapat ay tatakbo sanang alkalde uli ay biglang pinalitan ang kandidato sa pagka-bise presidente ng Lakas-CMD na si Lyle Uy.

Umatras naman sa laban si Sen. Bato dela Rosa bilang pambato ng PDP-Laban habang umakyat sa laban sa pagka pangulo si Sen. Bong Go mula sa kanyang VP bid, pero sa ilalim ng Pederalismo ng Dugong Dakilang Samahan kapalit si Grepor Belgica.

Posible namang tumakbo sa pagka-bise presidente si Pangulong Rodrigo Duterte base sa pahayag ni Communications Secretary Martin Andanar.

Ayon sa Comelec, hindi magdudulot ng kalituhan ang pagtakbo ni Duterte kahit pa tatakbo rin bilang bise presidente ang anak nito na si Davao City Mayor Sara Duterte-Carpio.

“Wala naman pong problema dahil pre-printed naman 'yung balota natin. … Hindi naman … magco-cause ng confusion ‘yan because number 1 the first names are there and number 2 … they will be in the same column but there will be no confusion,” anila. 

Tungkol naman sa usapin sa substitution, walang limitasyon ang withdrawal-substitution basta pasok sa itinakdang petsa pero maaaring higpitan ng kaunti ang batas, batay sa Comelec.

“Dapat siguro lagyan ng konting regulasyon. Lagyan ng konting pagbabawal kasi ngayon masyadong bukas yung proseso eh,” anila. 

Handa na ang Comelec sa Lunes para sa huling araw ng substitution.