Pulong-balitaan ng Home Owner Partylist

ni Jeff Tumbado | December 21, 2021

IN PHOTOS: Pormal nang inilunsad sa isinagawang pulong-balitaan kahapon sa Quezon City ang bagong Homeowner Partylist na pinangungunahan ni 1st Nominee dating Housing and Urban Development Coordinating Council (HUDCC) Assistant Secretary Leira S. Buan (gitna), 2nd nominee Aizel Buenaventura at 3rd Nominee Mark Joel Morales. Ang Homeowner Partylist (numero 6 sa balota) kung sakaling makapasok sa kongreso ay nasa kabuuang 27,000 homeowners association sa bansa ang kanilang irerepresenta sa Kongreso.

P-Du30, nag-withdraw na sa pagka-senador – Comelec

ni Lolet Abania | December 14, 2021

Binawi na ni Pangulong Rodrigo Duterte ngayong Martes ang kanyang certificate of candidacy (COC) sa pagka-senador para sa 2022 elections.

Ginawa ito ni Pangulong Duterte sa parehong araw kung saan ang kanyang long-time aide na si Senador Christopher “Bong” Go ay mag-withdraw ng kanyang COC sa pagka-pangulo.

“The President has filed his withdrawal from the Senatorial elections,” sabi ni Comelec Spokesperson James Jimenez sa isang tweet.

Matatandaang ang political party ni Pangulo Duterte na PDP-Laban, na pinangungunahan ni Energy Secretary Alfonso Cusi ay una nang ininomina ang Punong Ehekutibo bilang vice presidential bet ng partido para sa May 2022 elections.

Subalit, ayon kay P-Duterte, siya ay magreretiro na sa pulitika matapos ang kanyang termino sa Hunyo 30, 2022.

Noong nakaraang buwan, naghain ang Pangulo ng isang substitute COC para naman sa pagka-senador.

Sa kanyang pag-file ng COC sa pagka-senador, ang Pangulo ay nag-substitute kay Liezl Visorde ng Pederalismo ng Dugong Dakilang Samahan (PDDS).

Dalawang araw bago ito, naghain si Go ng substitute COC para sa pagka-pangulo sa ilalim din ng PDDS.

Sa ngayon, wala pang pahayag mula sa kampo nina P-Duterte at Go kung kailan at saan ang mga naturang opisyal ay nanumpa bilang PDDS members.

Kahit May 2022 elections... Vaxx drive, tuloy – Dizon

ni Lolet Abania | December 14, 2021

Tuloy ang pagbabakuna kontra-COVID-19 kahit na isinasagawa ang May 2022 national and local elections, ayon kay Presidential Adviser for COVID-19 Response Vince Dizon.

“Hindi po tayo puwedeng huminto sa ating pagbabakuna. Tuluy-tuloy ‘yan kahit sa kampanya, kahit sa eleksyon, tuluy-tuloy po tayo,” ani Dizon sa Laging Handa interview ngayong Martes.

Ayon sa opisyal, titiyakin niyang ang mga kandidato para sa darating na eleksiyon ay hindi magagamit ang vaccination campaign para sa kanilang political agendas.

“Sisiguraduhin natin na hindi magagamit ang pagbabakuna sa pamumulitika. Neutral po ito at diretso tayo sa taong bayan,” sabi pa ni Dizon.

Matatandaang noong Setyembre 23, sinabi ni vaccine czar Carlito Galvez Jr. na layon ng gobyerno na makamit ang herd immunity target ng 90% bago ang May 2022 elections.

Tinatarget ng pamahalaan na tinatayang 54 milyong Pilipino ang maging fully-vaccinated hanggang sa katapusan ng 2021.

Gayundin, giit ni Dizon na nananatiling prayoridad ng gobyerno ang initial booster shots ng mga indibidwal na umabot na sa 6-buwan na requirement hanggang sa susunod na taon.

Ang second booster naman ay nakadepende sa advice ng mga eksperto.

“Ngayon, kung kailan ang susunod na booster shot, hintayin na lang natin ang advice ng ating mga eksperto at igu-guide nila tayo at ng ating mga doktor para talagang masiguro na tuloy tuloy ang proteksyon natin hindi lang sa COVID-19 kundi sa lahat ng mga variant nito,” sabi pa ni Dizon.