Hanggang Okt. 30, 2021.. Voter registration, extended — Comelec

ni Lolet Abania | September 29, 2021

Nagkakaisa ang naging boto ng Commission on Elections (Comelec) en banc ngayong Miyerkules hinggil sa pagpapalawig ng voter registration para sa 2022 national at local elections.

“Extension is unanimously approved,” ani Comelec Spokesperson James Jimenez sa mga reporters.

Sa post sa Twitter ni Comelec commissioner Rowena Guanzon, ang ekstensiyon ng voter registration ay mula Oktubre 11 hanggang 30, 2021, alas-8:00 ng umaga hanggang alas-5:00 ng hapon.

Una nang sinabi ni Comelec chairman Sheriff Abas na ang pagpapalawig ng voter registration ay mula Oktubre 9 hanggang 31.

Ang Oktubre 9 ay natapat na Sabado habang ang 31 naman ay isang Linggo. Paliwanag ni Guanzon, walang registrations kapag Sabado maliban sa Oktubre 30, ang huling araw ng voter registration.

Sinabi pa ng Comelec commissioner na maaari namang isagawa ang reactivation sa pamamagitan ng e-mail o personal na magpunta sa kanilang opisina. Tatanggapin naman ang mga registrants sa lahat ng mga election offices at registration sites sa mga malls.

Samantala, ayon kay Jimenez, lahat ng registrations services ay kanilang isasagawa kabilang na rito ang transfer ng voter registration at reactivation. Extended din ang overseas voter registration ng dalawang linggo, mula Oktubre 1 hanggang 14.

“Note that for overseas voting, the filing of COCs is not an issue, thus the extension starts immediately,” sabi ni Jimenez. Nabuo ang desisyon ng Comelec en banc dahil ayon kay Guanzon, “As requested by the Senate.”

“As I have voted a month ago, I voted again today to extend voter registration because of the necessity for it and to ensure access of all voters to the elections,” saad pa ni Guanzon.

Kaugnay nito, sa isang interview naman kay Abas, sinabi nitong napagdesisyunan din nila na ipagpatuloy ang voter registration matapos ang Oktubre 1 hanggang 8 na paghahain ng certificate of candidacy para sa mga nais tumakbo sa 2022 elections dahil aniya, batid nilang ang Comelec ay magiging sobrang abala sa pag-accommodate ng mga kandidato sa buong mundo na gustong pumasok sa pulitika.

Hanggang nitong Setyembre 11, sinabi ni Abas na umabot na sa 63,364,932 registered voters para sa eleksyon sa 2022. Mayroong 9 milyong karagdagang botante para sa darating na halalan.

Sa naturang bilang, 5 milyon ay mga bagong registrants, 3.2 milyon ay nai-transfer na voter registrations, at tinatayang nasa 871,000 ay reactivated registrations.

Voter registration sa mga mall, pinilahan

ni Jasmin Joy Evangelista | September 12, 2021

Pinilahan ang voter registration sa mga mall sa Metro Manila nitong Sabado.

Ito ay matapos buksan ng Commission on Elections (Comelec) ang voter registration sa mga lugar na naka-modified enhanced community quarantine, kagaya ng Metro Manila. Nitong Sabado rin sinimulan ang pagpaparehistro sa mga mall.

Makikita sa larawan ang mga magpaparehistro sa mga upuan, bilang pagsunod sa physical distancing protocols.

Ayon sa pamunuan ng Robinsons Malls, bukas ang 37 nilang malls sa buong bansa para sa voter registration ng Comelec.

Umabot na sa 5-milyon ang bagong registrants, lagpas sa inaasahang bilang na 4-milyon, ayon kay Comelec Spokesman James Jimenez.

Sa kabuuan, nasa 62 milyon na ang mga rehistradong botante sa bansa para sa susunod na halalan.

Walang brownout sa 2022 elections — DOE

ni Jasmin Joy Evangelista | September 3, 2021

Ipinahayag ni Energy Secretary Alfonso Cusi na walang dapat ikabahala ang publiko tungkol sa suplay ng kuryente sa 2022 lalo na sa panahon ng eleksiyon.

Ito ay dahil mayroon daw sapat na suplay ng kuryente para sa bansa.

"Makikita natin sa initial forecast na ito na sapat ang supply, walang yellow alert. Kita po ninyo, walang lumalampa --- bumababang green bar doon sa yellow line at wala rin pong power interruption dahil sa supply...Sa madaling salita, ginagawa po lahat natin upang masiguro na may enough supply tayo ng kuryente sa darating na halalan sa 2022 and beyond," ani Cusi nu'ng Huwebes nang gabi.

Para raw magawa ang mga ito, pinaghahandaan na ng buong energy sector ang ilang scenario na maaaring makaapekto sa energy supply, tulad ng natural gas restrictions, forced outages, maintenance adjustments ng mga planta ng kuryente, demand sa interruptible load program at iba pa.

Mayroon din umanong partnership ang gobyerno sa Japan katuwang ang pribadong sektor para sa pag-develop ng liquified natural gas facilities sa bansa.

"Ang development ng LNG mula sa partnership po ng AG&P at Osaka Gas ay maaaring magsimula ng commercial operation by second quarter of 2022.

At ang partnership naman po ng First Gen ay maaaring --- and Tokyo Gas is due for commercial operation by the third quarter of 2022," paliwanag ni Cusi.

Bukod pa rito, patuloy pa rin aniya ang pag-aaral ng DOE sa paggamit ng nuclear energy at ang potential use ng hydrogen.