Mga ilegal na imigranteng Pinoy sa US, dapat nang umuwi sa bansa

ni Angela Fernando @News | Nov. 8, 2024

Photo: Philippine Ambassador to the us Jose Manuel Romualdez - OWWA / PCO

Pinayuhan na ni Philippine Ambassador to the US Jose Manuel Romualdez, bago pa man manalo si Donald Trump sa pagkapangulo sa naganap na eleksyon kamakailan sa United States (US), ang tinatayang 250K hanggang 300K na ilegal na imigranteng Pinoy sa nasabing bansa na boluntaryong umuwi upang maiwasan ang posibilidad na mapasali sa blacklist.

“Some of them have already filed and so therefore they are here in limbo, meaning to say they are waiting for their papers to pass through. My advice to many of our fellowmen who are actually still here but cannot get any kind of status, my advice is for them not to wait to be deported,” saad ni Romualdez sa Foreign Correspondents Association of the Philippines (FOCAP) nitong Biyernes.

Ayon pa kay Romualdez, magiging isang pangunahing operasyon ang deportasyon at malaki ang posibilidad na maipatupad ni Trump ang bagong batas sa imigrasyon dahil kontrolado ng mga Republican ang parehong House at Senate.

Binigyang-diin din ni Romualdez na ang mga ilegal na imigrante ang maaaring isa sa mga dahilan kung bakit mas pinili ng karamihan sa mga Filipino-American si Trump kaysa kay Vice President Kamala Harris sa nagdaang eleksyon.

Biden, binati si Trump sa pagkapanalo sa eleksyon

ni Eli San Miguel @World News | Nov. 7, 2024

Photo: Joe Biden at Donald Trump - The White House / Nic Antaya, Getty Images

Tumawag si U.S. President Joe Biden nitong Miyerkules upang batiin si Donald Trump sa kanyang pagkapanalo sa eleksyon.

Inanyayahan niya rin si Trump na makipagkita sa White House, at inanunsiyo na magbibigay siya ng mensahe sa bansa sa Huwebes.

Sa isang pahayag, sinabi ng White House na nangako si Biden, matapos ang pagkapanalo ni Trump laban kay Vice President Kamala Harris, na sisiguraduhing maayos ang paglilipat ng kapangyarihan at binigyang-diin ang kahalagahan ng pagkakaisa ng bansa.

Dagdag pa rito, nakipag-usap din si Biden kay Harris.

Trump, Harris, nakuha na ang mga unang pagkapanalo statewide

ni Eli San Miguel @Overseas News | Nov. 6, 2024

Photo: Kamala Harris at Donald Trump - Kamil Krzaczynski-AFP / Alex Brandon-AP

Nanalo na ang Republican na si Donald Trump sa walong estado sa halalan sa pagkapangulo ng United States nitong Martes, habang nakuha naman ni Democrat Kamala Harris ang tatlong estado at Washington, DC, ayon sa Edison Research.

Gayunpaman, nananatiling hindi tiyak ang resulta ng laban, dahil posibleng abutin ng ilang oras o araw bago matapos ang pagbibilang sa mga pangunahing battleground states.

Inaasahan ang maagang resulta, na nakatutok sa pitong swing states: Georgia, North Carolina, Pennsylvania, Arizona, Michigan, Nevada, at Wisconsin, kung saan ipinakita ng mga survey na dikit ang laban ng mga kandidato.

Pagsapit ng 8 p.m. ET, sarado na ang mga botohan sa 25 estado.

May 90 electoral votes na si Trump matapos manalo sa Kentucky, Indiana, West Virginia, Alabama, Florida, Oklahoma, Missouri, at Tennessee, habang si Harris ay may 27 mula sa Vermont, Maryland, Massachusetts, at Washington, DC.

Kailangan ng isang kandidato ng 270 electoral votes upang manalo sa pagkapangulo.