Guidelines sa batas vs. mga pasaway sa safety protocols, inilabas

ni Ronalyn Seminiano Reonico | June 1, 2021

Nilagdaan na nina Justice Secretary Menardo Guevarra at Interior Secretary Eduardo Año ngayong Martes ang guidelines para sa mga tagapagpatupad ng batas atbp. ahensiya ng pamahalaan kaugnay sa paghawak ng mga kasong paglabag sa health protocols.

Saad pa ni Año, “The joint memorandum circular (JMC) likewise clarifies our agencies' roles in handling quarantine-related violations beginning from arrest, investigation, detainment, then to filing of charges, legal processing to dismissal of case, punishment, until the eventual release of the person.”

Idiniin naman ni Guevarra na ang naturang guidelines ay para sa mga law enforcers at sa mga opisyal ng Department of the Interior and Local Government (DILG) at National Prosecution Service of the Department of Justice (DOJ).

Aniya pa ay kailangang nakabase rin sa mga ordinansang ipinatutupad ng mga lokal na pamahalaan ang actions of authorities.

Saad pa ni Guevarra, “Law enforcement agents, and this goes also to our local government officials, they should be very familiar with ordinance prevailing or in effect in their place because that is the legal framework of what they can do and cannot do."

Mga mayor, kakasuhan sa paglabag sa social gathering

ni Lolet Abania | May 8, 2021

Posibleng masampahan ng kaso ang mga lokal na opisyal ng gobyerno dahil sa pagkabigo ng mga ito na ipagbawal ang mga mass gatherings sa kanilang lugar, ayon sa Department of Interior and Local Government (DILG).

Sa isang statement ng DILG, ibinabala nito na ang pagkabigo ng mga local officials na ipatupad ang mga health protocols ay maaaring humantong sa tinatawag na administrative sanction o criminal charge for dereliction of duty sa ilalim ng Revised Penal Code.

“Maaaring administrative complaint or criminal case ang isampa laban sa pabayang LCEs (local chief executives). Hindi po gusto ng DILG na dumating sa puntong gawin ito, kaya sana ipatupad nang maayos ng LGUs (local government units) ang polisiya sa mass gatherings ayon sa quarantine classification sa kanilang lugar,” ani DILG Secretary Eduardo Año.

Batay sa guidelines ng Inter-Agency Task Force Against COVID-19 noong April 15, ang pagtitipon sa labas ng mga tahanan at pagtitipon sa loob ng tirahan ay ipinagbabawal sa mga lugar na nasa ilalim ng enhanced community quarantine (ECQ), modified ECQ (MECQ), at general community quarantine (GCQ).

Gayunman, ang mga gatherings ay pinapayagan ng hanggang 50 porsiyento ng seating o venue capacity lamang sa mga lugar na nasa modified GCQ (MGCQ), habang ang mga gatherings para sa itinatakdang government services at tinatawag na authorized humanitarian activities ay pinapayagan sa lahat ng lugar sa ilalim ng ECQ, MECQ, GCQ, at MGCQ.

Ipinagbabawal naman ang religious gatherings sa ilalim ng ECQ, habang pinapayagan ito sa MECQ para sa 10 hanggang 30 porsiyento ng seating capacity, depende rin sa regulasyong ipinatutupad ng lokal na pamahalaan.

Sa lugar na nasa GCQ, pinapayagan ito ng hanggang 30 hanggang 50 porsiyento habang sa MGCQ, pinapayagan ito ng hanggang 50 porsiyento ng seating capacity.

Ang mga necrological services o burol at libing ng namatay na hindi sa COVID-19 ay pinapayagan subalit limitado ito para sa mga miyembro ng pamilya sa lugar sa ilalim ng ECQ at MECQ, habang sa GCQ, pinapayagan ng 30 hanggang 50 percent capacity at sa MGCQ naman ay pinapayagan ng 50 percent ng venue capacity.

Ipinagbabawal pa rin sa mga lugar na nasa ECQ, MECQ at GCQ ang movie screenings, concerts, sporting events, entertainment activities, at work conferences, habang sa lugar na nasa MGCQ, pinapayagan ito ng hanggang 50 percent ng seating capacity subalit dapat na sumusunod sa ventilation standards.

Hinimok naman ni Año ang publiko na maghain ng kanilang reklamo laban sa mga tiwaling local officials sa DILG Regional Offices o sa DILG Emergency Operations Center at dilgeoc.complaint@gmail.com o tumawag sa (02) 8876-3454 local 881 to 884.

COVID-19 protocols, ‘pag nalabag… Community pantries, stop! — DILG

ni Ronalyn Seminiano Reonico | April 27, 2021

Nagbabala ang Department of the Interior and Local Government (DILG) sa posibleng pagpapatigil sa mga community pantries kapag nalabag ang mga ipinatutupad na health protocols sa bansa.

Pahayag ni Interior Secretary Eduardo Año, “Kung maba-violate [ang health protocols], ito ay ground para ma-stop natin ang community pantry, kasi ito’y puwedeng maging sanhi ng [COVID-19] surge."

Paalala rin ni Año sa mga organizers ng community pantries, makipag-ugnayan sa barangay na nakasasakop sa kanilang proyekto upang malimitahan ang risks ng pagkalat ng Coronavirus.

Saad pa ni Año, "Maglalabas kami ng advisory at memo sa mga [local government units] kung paano iha-handle nang mabuti ang mga community pantries na naging inisyatibo ng mga private sector at private individuals.”

Ayon kay Año, malaki ang papel ng pakikipag-ugnayan ng mga organizers ng community pantry sa mga LGUs dahil masisiguro ang seguridad at kaayusan kapag dumagsa ang mga tao.

Saad pa ni Año, “Sa coordination na ‘yan, ang LGU ay magiging malaki ang papel niyan. Kasi unang-una, siya rin ang puwedeng mag-determine kung saan ‘yung venue na gaganapin ‘yung distribution.

“At pagbibigay din ng security, peace at order kasi kapag dumagsa na ang mga beneficiaries, I don’t think kaya ng organizer na i-maintain ‘yung crowd.”