Lalaking natutulog sa sidewalk, pinagbabaril

ni Jasmin Joy Evangelista | September 20, 2021

Patay ang isang lalaking pinagbabaril sa sidewalk sa EDSA sa Pasay nitong Linggo ng gabi.

Kinilala ang biktima sa alyas na Raymond.

Nakahandusay ang katawan ng biktima sa bangketa sa ibaba ng MRT Taft station sa kanto ng EDSA at Zamora Street.

May mga tama ng bala sa ulo at katawan si alyas Raymond nang puntahan ng awtoridad.

Ayon sa isang saksi, tila lasing umano ang biktima at natulog sa bangketa nang may tumigil na motorsiklo sa tabi nito. Pinagbabaril umano ng sakay ng motorsiklo ang lalaki at agad na tumakas.

Inaalam pa ng pulisya ang motibo sa pamamaril at kung sino ang salarin.

Traffic sa EDSA, nalutas na — P-Duterte

ni Lolet Abania | June 9, 2021

Ipinagmalaki ni Pangulong Rodrigo Duterte na ang problema at nararanasang matinding trapiko sa EDSA ay nalutas na. “Ang traffic sa EDSA maluwag na,” ani Pangulong Duterte sa isang interview ni Pastor Apollo Quiboloy sa SMNI News kagabi.

“But early on sa administration ko, it was a crisis. So, ang mga advise nina Tugade, ‘yung mga bright boys ko, sabi nila, manghiram tayo ng pera. We can maybe adopt an MRT or somewhere paakyat. Pero basta we need money,” saad ng Pangulo.

“Ito ngayon, sa taas, kita mo, ito na lang ang ibinuhos ko, ‘yung mga grant-grant, doon ko ibinuhos ‘yung pera. Ngayon, maluwag na ‘yung traffic ng Maynila. Talagang if you go to Cubao, airport, it’s about 15 minutes,” dagdag niya.

Ang pagkumpleto sa kabuuang 18-kilometer stretch ng Metro Manila Skyway Stage 3 project, kung saan nag-uugnay sa northern at southern portion ng Metro Manila, ang siyang nagpaluwag sa daloy ng trapiko sa EDSA at nagdulot ng kabawasan sa oras ng pagbibiyahe ng mga motorista sa loob ng end points nito mula sa nagsisiksikang populasyon sa metropolis.

Matatandaang inaprubahan ang proyekto noong September, 2013 sa ilalim ng administrasyon ni dating Pangulong Aquino III. Inianunsiyo naman ng conglomerate San Miguel Corp., ang private developer ng proyekto, ang completion nito noong October, 2020, habang opisyal na binuksan ang skyway nitong January, 2021.

Ayon sa Metropolitan Manila Development Authority (MMDA), matapos na buksan ang Metro Manila Skyway Stage 3, ang daloy ng trapiko sa kahabaan ng EDSA ay naging maayos na.

8 sugatan sa salpukan ng ambulansiya at bus sa EDSA

ni Ronalyn Seminiano Reonico | June 5, 2021

Walo ang sugatan matapos magsalpukan ang bus at ambulansiya sa EDSA Shaw tunnel noong Biyernes nang gabi.

Ayon kay Metropolitan Manila Development Authority (MMDA) Traffic Chief Bong Nebrija, isinugod sa Mandaluyong City Medical Center ang walong sugatan sa insidente.

Aniya, pumasok sa bus lane ang ambulansiya na saktong pagdating naman ng bus.

Saad ni Nebrija, “Papasok siya to get in the busway para mapabilis din siya, ma-traffic. May paparating na bus. Ewan ko kung nakita niya, sabi niya, nakita niya, pero apparently, hindi niya iniwasan.”

Nang bumangga umano ang bus sa ambulansiya ay tumaob ito.

Aniya, “Natanggal po ‘yung portion ng center island natin and so many barriers have been knocked down again, ano? At tumaob pa ‘yung ambulansiya.”

Nilinaw din ni Nebrija na priority pa rin ang mga bus sa bus lane.

Pahayag ni Nebrija, “Ang sinasabi ko, even though they could use it, they are not the priority. Ang priority pa rin is ‘yung bus. So if they want to use it and there’s a bus coming in, they need to give way to the bus.

“Eh, lalung-lalo na itong ambulansiyang ito, wala namang laman. Ang kine-claim niya, may pi-pickup-in siyang pasyente. I do not know what’s the level of emergency nu’ng pi-pickup-in niya.”

Samantala, sugatan sa insidente ang driver ng bus, konduktor at anim na mga sakay nitong pasahero.

Patuloy pa ring isinasagawa ang imbestigasyon sa insidente.