Dagdag na bus routes para sa Libreng Sakay, pinag-aaralan ng DOTr

ni Lolet Abania | July 4, 2022

Nire-review ngayon ng Department of Transportation (DOTr) ang posibilidad ng pagkakaroon ng free bus rides sa mas maraming ruta sa ilalim ng kanilang Libreng Sakay program.

Sa isang interview kay DOTr Undersecretary Cesar Chavez ngayong Lunes, ipinunto nito na ang budget ng DOTr ay magiging sapat lang para sa umiiral nang mga ruta ng libreng sakay.

“Nire-review ‘yan ngayon sapagkat ‘yung budget na nakalaan, of course through congressional approval at nu’ng nakaraang administrasyon, ay sasapat lang at hindi kasama ‘yung ibang ruta na hinihiling nila ngayon,” paliwanag ni Chavez.

Ayon kay Chavez, makikipagpulong na si DOTr Secretary Jaime Bautista sa mga head ng mga kaugnay na ahensiya upang talakayin ang naturang usapin.

Noong Biyernes, inaprubahan ni Pangulong Ferdinand “Bongbong” Marcos Jr. ang extension ng free EDSA Carousel bus rides hanggang Disyembre 2022, kung saan magtatapos sana sa Hulyo 30, 2022.

Aprubado rin kay Pangulong Marcos, ang libre sakay para sa mga estudyante na gagamit naman ng MRT3, LRT2, at Philippine National Railways (PNR) kapag nag-resume na ang in-person classes sa Agosto.

Binanggit din ni Chavez sa interview na hindi naman kakayanin ang free rides para sa lahat sa mga tren dahil aniya, ang MRT3 ay nagkaroon lamang ng P82 million revenue collection nitong Enero subalit umabot ang kanilang gastos sa P722 milyon para sa libreng sakay.

Gayundin, ayon kay Chavez, hindi rin sila makapagbigay ng free rides sa LRT1 sa dahilang ito ay nasa ilalim ng isang concession agreement sa Light Rail Manila Corporation at ang gobyerno ay walang control sa kanilang operation at revenue.

EDSA-Kamuning flyover, isasara mula Hunyo 25 — MMDA

ni Lolet Abania | June 21, 2022

Isasara ang southbound portion ng EDSA-Kamuning flyover sa Quezon City sa loob ng 30 araw para sa isasagawang repairs nito simula Sabado, Hunyo 25, ayon sa Metropolitan Manila Development Authority (MMDA) ngayong Martes.

Sinabi ng MMDA na epektibo ang pagsasara ng flyover southbound simula alas-6:00 ng umaga ng Hunyo 25. “Ito pong buong southbound ng EDSA-Kamuning flyover ay isasara for 30 days. ‘Yan ang hiniling ng DPWH [Department of Public Works and Highways],” pahayag ni MMDA chair Atty. Romando Artes.

Ayon kay Artes, nasuri na ng DPWH ang bahagi ng flyover na may mga crack at sinabi nilang ang 30-meter stretch ng flyover ay kinakailangang i-repair.

“Nang buksan po nila ang mga may crack na portion nitong tulay ay nakita nila na kailangan pong kumpunihin ‘yung 30-meter stretch nitong buong tulay,” saad ni Artes.

“Mano-mano po ang pagbakbak ng semento dahil hindi po puwedeng gamitan ng heavy equipment dahil baka maapektuhan po ‘yung dalawang lanes pa na nasa tabi,” paliwanag ni Artes kung bakit ang pagsasara nito ay tatagal ng 30 araw.

Gayunman, sinabi ni Artes na ang 30 araw ay sagad na panahon para sa pagre-repair ng flyover, kasama na rito ang 7-araw na curing time para sa semento. Aniya, lahat ng sasakyan na patungong southbound ay kailangang gamitin ang service road na nasa ibaba ng flyover.

Pinapayuhan naman ang mga motorista na dumaan na lamang sa Mabuhay lanes bilang kanilang alternate routes. Gayundin, ani Artes, ang EDSA carousel buses ay kailangan ding dumaan sa service road, subalit matapos ang flyover, maaari na nilang gamitin ulit ang leftmost lane na nakalaan sa kanilang linya.

Ayon pa sa MMDA chief, nasa tinatayang 140,000 sasakyan ang gumagamit ng EDSA-Kamuning flyover araw-araw. Matatandaan na nakitaan ng mga crack at butas ang EDSA-Timog Avenue flyover southbound lane noong nakaraang linggo kaya kanila itong bahagyang isinara.

Mga light vehicles lamang at ang EDSA carousel buses ang pinayagan na gumamit ng flyover ng southbound lane nitong Lunes.

EDSA Timog flyover, sarado sa trapiko

ni Lolet Abania | June 17, 2022

Tuluyang isinara ang EDSA-Timog Avenue flyover southbound lane sa Quezon City sa trapiko ngayong Biyernes ng madaling-araw dahil sa nakitang mga crack at butas sa istraktura ng tulay.

Sa ulat, may namataang butas sa bahagi ng EDSA-Timog ng flyover. Ang flyover ay bahagyang isinara lamang nitong Huwebes ng gabi, habang ang butas ay tinapalan ng mga tauhan ng Department of Public Works and Highways (DPWH).

Bandang alas-5:00 ng madaling-araw ngayong Biyernes, ang buong kahabaan ng flyover ay isinara na dahil na rin sa pangamba hinggil sa katatagan ng naturang istraktura.

Ayon sa report, ang busway ay nananatiling bukas sa trapiko. Nagresulta naman ang pagsasara nito ng matinding traffic congestion sa lugar, kung saan walang anunsiyong inilabas bago pa ang closure order. Nitong Huwebes, isang advisory ang inisyu na mayroong mga nakitang crack at butas sa istraktura.

Gayunman, ang flyover bago pa ang pagsasara nito ay kasalukuyang sumasailalim sa repair works, kung saan nagsimula ito sa lugar na malapit sa Police Station 10.

Sa isang interview kay Engr. Christian Lirios ng Department of Public Works and Highways-National Capital Region (DPWH-NCR) Second Engineering District, sinabi nitong nagkaroon na ng assessment ang ahensiya sa nabanggit na flyover.

“Actually, we have a project dito. Major rehabilitation ng EDSA-Timog Avenue flyover,” ani Lirios. “Nagre-retrofit kami ng girders. Luma na ang Kamuning flyover,” dagdag ni Lirios.

Aniya pa, wala namang dapat ipag-alala ang mga motorista dahil ang kinakailangang repair works ay nasimulan na.

Matatapos ang repair nito, bukas, Hunyo 18, dahil sa extent ng trabaho na dapat gawin sa isang lane ng flyover. Isinasagawa na rin ang retrofitting sa ilalim ng flyover.