Tulong sa backyard hog raisers

@Editorial | September 28, 2021

Sa gitna ng nararanasang pandemya, dumarami pang mga backyard hog raisers ang huminto sa kanilang operasyon dahil naman sa patuloy na pagpasok ng mga imported na karne ng baboy.

Sa dami ng mga pumapasok na imported pork ay nagreresulta ito ng pagbaba rin ng mga farm-gate prices.

Sa ngayon, umabot na umano sa P150 per kilo ang farm-gate price.

Kaugnay nito, nasa 30% ng mga backyard hog raisers ang posibleng hihinto na sa nasabing negosyo.

‘Pag nagkataon mas maraming pamilya ang lalong hindi na makababangon sa krisis. Paano na ang kabuhayan?

Matatandaang, dinagdagan ng gobyerno ang bilang ng mga pinapapasok na imported pork para matugunan ang kakulangan ng suplay matapos na dapuan ng African swine fever ang mga babuyan sa bansa.

Ang problema, umaaray naman ang ating mga local hog raisers.

Panawagan sa kinauukulan, pakinggan ang hinaing ng ating mga kababayang apektado ng pag-i-import hindi lang ng mga karne kundi ng iba pang produkto. Halos bumabaha ng mga imported products na bagsak-presyo nga, palpak naman ang kalidad. Sila lang ang kumikita, habang ang maliliit na negosyante sa bansa ang kawawa.

Huwag sanang dedmahin ang isyung ito dahil tayo rin ang kawawa sa dulo. Tangkilikin muna ang sariling atin bago iba, plis lang.

Gutom at depresyon, lumalala sa gitna ng pandemya

@Editorial | September 27, 2021

Kaliwa’t kanan na naman ang mga nagaganap na karumal-dumal na krimen.

Araw-araw may pinapatay at nangyayari pa sa mismong tahanan. Anak pinatay ng magulang, magulang kinatay ng anak. Ang sinasabing ugat, kahirapan at depresyon.

Nakapanlulumo na grabe na ang epekto ng pandemya. Kung gaano tayo kaingat na hindi mahawa sa COVID-19, tila ganu’n naman kadali na mamatay dahil sa ibang dahilan.

Sa panayam sa mga nasasangkot sa krimen, ang madalas nilang rason ay dahil nawalan ng trabaho, wala nang makain, may sakit — tuluyan nang nawalan ng pag-asa.

Dumarami rin ang mga kumakapit sa patalim. May mga nagnanakaw, nagbebenta ng ilegal na droga, pumapasok sa sindikato, at lahat na ng puwedeng raket para makapang-scam at kumita ng pera.

Kaugnay nito ay ang panawagan sa ating gobyerno na mas tutukan ang mga problema na dulot din ng nararanasang pandemya. Hindi lang bakuna o pagpapatupad ng mga panuntunan laban sa COVID-19 ang dapat pagtuunan, ganundin ang mismong kalagayan ng kaisipan ng bawat mamamayan. Batid natin na may mga programa na ukol dito, sana ay mas mapalakas pa at mas lumawak ang nararating.

Sa mga nawawalan na ng pag-asa, alalahanin natin kung bakit tayo lumalaban. Hindi tayo dapat magpatalo sa anumang pagsubok. Minsan lang tayong mabubuhay, huwag nating sayangin at lalong ‘wag sukuan.

Buwis-buhay sa pagpaparehistro para makaboto, stop!

@Editorial | September 26, 2021

Sa nagpapatuloy na voters registration, tiniyak ng pamunuan ng Philippine National Police (PNP) na ginagawa ng mga awtoridad ang lahat para mapanatili ang kapayapaan, kaayusan at higit sa lahat, ang kaligtasan ng bawat isa.

Palaging nasusunod ang mga health protocols laban sa COVID-19 at iba pang sakit.

Ngayong ilang araw na lamang bago ang deadline para sa pagpaparehistro, na itinakda ng Commission on Elections (Comelec) sa Setyembre 30, inaasahang daragsa pa ang mga tao.

Kaya kailangan ng mas matinding pagbabantay na nasusunod ang physical distancing na posibleng maging dahilan ng super spreader event.

Mahalaga ang pagboto at siyempre, ganundin ang ating buhay, huwag natin hayaang malagay ito sa alanganin. Hindi dapat maging pabaya, palaging sumunod at huwag makalimot na nasa paligid lang ang virus.

Umaasa pa rin tayong hindi naman grabe ang pagdagsa ng mga tao sa mga huling araw ng pagpaparehistro. Palibhasa nasanay kasi ang iba sa last minute. Kung palagi tayong ganito, kahit gaano pa kahaba ang panahon na ilalaan sa anumang bagay, kahit pa mag-extend ay wala na talagang magbabago, palaging matatapos sa gulo.

Kung tumulad tayo sa iba na noon pa ay inasikaso na ang pagpaparehistro, eh, hindi hindi na kailangang makipagsapalaran sa mahabang pila o magbuwis-buhay para makaboto.

Ito sana ang isa sa mga ugali na dapat nating mabago. Kung may pagkakataong gawin o tapusin ang isang bagay ngayon, gawin na. Huwag nang ipagpabukas lalo na’t hindi naman natin masasabi kung ano ang hinaharap.