Bago o lumang kandidato, basta may konsensiya, pasok!

@Editorial | October 09, 2021

Mahaba-haba ang listahan ng mga gustong kumandidatong pangulo, bise-presidente, senador at partylist representatives.

Bagama’t kahapon ang itinakdang huling araw ng paghahain ng certificate of candidacy (CoC), wala pa umanong maituturing na opisyal na listahan na sasabak sa Halalan 2022.

Ayon sa Commission on Elections (Comelec), hanggang Nobyembre 15 pa magkakaalaman, dahil may pagkakataon pa para sa substitution o pagpapalit ng kandidato.

Pagkatapos ng Nobyembre 15, hindi na papayagan ang substitution maliban na lamang kung namatay o naging incapacitated ang kakandidato o ang tinatawag na involuntary substitution.

Ang pupuwede lamang na pumalit ay ka-apelyido ng namatay o incapacitated ang ipapalit dahil nakaimprenta na sa balota.

Ang tanong, sa dami ng mga nag-aambisyon, ilan kaya o sino kaya sa kanila ang karapat-dapat sa tiwala ng taumbayan?

Kapansin-pansin ang mga bagong mukha pero tila mas marami pa rin ang luma. Silang mga dati nang nahalal o kaya’y itinalaga sa gobyerno.

May mga masasabing subok na sa paglilingkod at meron ding baguhan talaga at wala pang karanasan sa serbisyo-publiko.

Ang unang dalawang tanong, ano ang mga nagawa nila habang nasa puwesto? Ano kaya ang magagawa nila ‘pag nanalo?

Ang mga susunod na tanong, kung wala silang nagawang mabuti noon, bakit pa nangangarap ngayon? Kung walang alam pero nakikipagsapalaran, ano’ng mangyayari sa gobyerno?

Bakit ba laging nasa taumbayan ang bigat ng pagpili?

Hindi ba puwedeng kayo mismong mga kandidato ang sumuri sa inyong mga sarili kung kayo ba ay talagang karapat-dapat na maging lider at kinatawan ng mamamayan?

Alam n’yo sa inyong sarili kung ano ang inyong kakayahan at tunay na layunin sa pagpasok ng pulitika. Isang bagay lang ang inyong kailangan — konsensiya.

Matatamis na salita ng mga kandidato, makabusog sana sa mahihirap

@Editorial | October 08, 2021

Nagpasaklolo na ang mga jeepney drivers sa non-stop na dagdag-presyo sa petrolyo.

Naiisip na ng ilan sa kanila na maitaas sa P12 ang minimum na pasahe mula sa P9.

Anila, ang P9 pasahe sa ngayon ay uubra lamang kung ang presyo ng diesel ay nasa P40 lamang kada litro pero, umaabot na sa P46 ang halaga ng bawat litro ngayon.

Bagama’t hirap na, hindi pa umano nila itutulak ang dagdag-pasahe dahil nauunawaan naman nila ang hirap din na pinagdaraanan ng mga commuters.

Ang nais sana ay mabigyan sila ng gobyerno ng subsidiya sa langis para ‘di mapilitang mag-fare hike. Ganundin ang mapakiusapan umano sana ng gobyerno ang mga kumpanya ng langis na magbigay ng diskuwento dahil ito umano ang pinakamabilis na paraan sa ngayon.

Ayon naman sa Department of Energy, pinag-aaralan na makapagbigay nga ng subsidiya sa sektor ng pampublikong transportasyon. Batid umano ng ahensiya na talagang hataw ang presyo ng langis.

Kaya kailangan talaga natin ng matinding diskarte kung paano haharapin ang araw-araw na pamumuhay sa gitna ng pandemya.

Sa ngayon, sobrang abala na ang marami para sa Halalan 2022. Naririnig na naman natin ang matatamis na salita na sana naman ay nakakabusog din. Ganundin ang mga pangako na ‘wag naman sanang mapako.

Nakakapagod na rin ang pulitika na makulay pero, tila nababahiran ng kasamaan ‘pag mga pulitikong ‘di karapat-dapat ang napupuwesto.

Kaya sa mga botante, galingan ang pagkilatis, huwag magpadala sa anumang pangako o kung anu-anong inaabot. Gamitan natin ng talino at konsensiya an gating pagboto.

Gobyerno, galaw-galaw sa pinupuslit na imported na gulay

@Editorial | October 05, 2021

Kahon-kahon ng mga imported na carrots, broccoli, at iba pang gulay tulad ng bawang, sibuyas, at luya ang nasabat ng Bureau of Customs.

Pawang mga imported, walang permit at ibinebenta sa mga palengke.

Aabot umano sa P4.7 milyon ang halaga ng mga nakumpiskang imported na gulay.

Sobra-sobrang importasyon ng mga gulay ang pumapatay sa kabuhay ng mga lokal na maggugulay.

Kaya dapat lang na ituloy ang imbestigasyon at operasyon laban sa mga nagpupuslit ng imported na gulay. Malinaw na sila lang ang nakikinabang at harap-harapan ang kanilang pananabotahe sa ating ekonomiya.

Bumabaha ng imported na gulay, habang nabubulok naman ang mga lokal. Tone-tonelada ang itinatapon na lang, ibinenta nang palugi o ibinalik na lang sa kanilang mga taniman dahil sa hindi man lang ito binibigyang-pansin.

Sana, sa madaling panahon ay matukoy na kung sino ang mga importer at ang mga taga-gobyerno na sangkot sa pananamantalang ito. Tiyak na meron, dahil hindi naman maglalakas-loob na gumawa ng kalokohan ang mga ito kung hindi protektado ng mga bulok sa gobyerno.

Halos barya na lang ang kinikita ng ating mga magsasaka, susulutin pa.

Nasa gitna tayo ng pandemya at pilit lumalaban ang mga local farmers para sa pamilya, huwag sanang hayaan na tuluyan silang mawalan ng pag-asa.

Marami sa kanila ang baon na sa utang at halos wala ng maituturing na pag-aari dahil ubos na sa pang-araw-araw na gastusin.

Anumang gawain na ilegal at nakaaapekto sa kapakanan ng taumbayan, dapat ginagawan agad ng aksiyon.

Ito ang hamon sa mga nasa gobyerno, lalo na sa mga ahensiyang may hawak sa usaping ito, galaw-galaw, ‘wag patulug-tulog sa pansitan.