Gov’t employees na walang ‘K’, out!

@Editorial | October 12, 2021

Bago pa tayo magpalit ng mga lider, mainam na ipagpatuloy at mas patindihin pa ang paglilinis sa gobyerno laban sa mga kurakot.

Napag-alamang simula noong Enero hanggang Setyembre, umabot na sa 567 kawani ng Bureau of Customs (BOC) ang nasapul sa anti-corruption campaign. Sa naturang bilang, tatlo ang tinanggal sa serbisyo, may 12 na sinuspinde, anim ang napagsabihan, anim ang naalis sa puwesto, bukod sa 543 na na-reshuffle dahil sa mga ilegal na aktibidad.

Bukod pa rin dito, 126 kawani ang inimbestigahan na nagresulta sa paghahain ng mga kasong administratibo.

May 57 kaso naman ang ipinadala na sa NBI at may isa na isinumite sa Ombudsman.

May 516 show-caused orders din ang inisyu sa mga kawani simula noong Enero.

At hindi lang sa BOC may mga pasaway, halos sa lahat ng ahensiya ng gobyerno ay hindi nawawala ang mga korup.

‘Yung iba, halos inabot na lang ng pagreretiro, paggawa pa rin ng kalokohan ang inaatupag.

Masyadong nasisilaw sa pera at kapangyarihan.

Hindi nila nauunawaan ang tunay na kahulugan ng pagtatrabaho sa pamahalan. Kayo ay tinanggap o itinalaga sa inyong posisyon bilang mga public servant.

Ngayong mag-e-eleksiyon na naman, magpapalit ng mga opisyal, tiyak na may mga mananatili at meron ding mga papasok na bago. Riyan pa lang, duda na tayo na sila’y maglilingkod sa taumbayan.

Dapat talagang baguhin at higpitan ang pagkuha ng mga empleyado sa gobyerno. Hindi puwede ang palakasan at wala namang alam.

Maraming mas may ‘K’ na maglingkod sa taumbayan kung nabibigyan lang sana sila ng patas na pagkakataon.

Mga pasaway, dedma sa Alert Level 4

@Editorial | October 11, 2021

Nasa kabuuang 236,764 health protocol violators ang naitala ng PNP Joint Task Force COVID-Shield sa nagpapatuloy na implementasyon ng Alert Level 4 sa National Capital Region (NCR).

Sa nasabing bilang, 9,688 dito ang mga bagong reported violations.

Base sa record, mula September 16 hanggang October 7, ang average daily number of violators ay nasa 10,762.

May mga violators na binigyan ng warning, samantalang ang iba ay pinagmulta, habang meron ding binigyan ng parusa.

Sa totoo lang, parang marami na ang nakakalimot sa COVID-19.

Sabi nga ng iba parang nasapawan na ng pulitika bagama't kapansin-pansing tumataas na naman ang bilang ng mga nagpopositibo sa sakit.

Paulit-ulit na ipinaaalala na huwag magpakampante. Kahit maraming suplay ng bakuna, hindi pa rin ito kasiguraduhan na safe na.

Sa halip na magpabaya, mas dapat pang mag-ingat dahil unti-unti nang lumuluwag ang sitwasyon. Mas marami na ang pinalalabas, mas bata at mas matatanda.

Kung hindi tayo makikinig, huwag naman sana, babalik na naman tayo sa simula.

Asamin na natin ang mas malayang pamumuhay alang-alang sa ating mga anak.

Sila ang higit na kawawa dahil malaking bahagi ng kanilang buhay ang apektado.

Kayang-kaya na nating kontrolin ang sitwasyon kung lahat ay disiplinado at hindi pasaway.

Malapit na naman magpalit ng taon, huwag nating hayaang ganito na naman.

Puwedeng magtalo pero ‘wag mag-aaway

@Editorial | October 10, 2021

Grabe ang mga post at palitan ng komento sa social media ngayon.

Lalong tumindi nang makapaghain na ng kani-kanilang certificate of candidacy ang mga gustong kumandidato sa Halalan 2022.

Kaliwa’t kanan ang batikos, ungkatan ng nakaraan, hanapan ng ambag pati ninakaw.

Kung nakamamatay lang ang mga post, marami nang nawala.

Okay lang sana kung ang mga nagbabasagan, eh, sila-silang mga trolls o bayaran ng mga pulitiko, wala namang silang paki basta sumusuweldo.

Ang problema, may mga netizens na totoong tao — magkakapamilya, magkakaanak, magkakaibigan, magkakapitbahay, magkakatrabaho — na hindi rin nagpapatalo sa kung sino ang sinusuportahan. Sa isang post, maraming komento, nagsasanga ng magkakaibang paniniwala, hanggang sa nauuwi na sa ‘di pagkakaintindihan. ‘Yung isyu sa pulitika, nagiging personal na.

Ang tanong, habang kayong mga supporters ay nag-aaway-away, ano naman kaya ang iniisip ng inyong mga sinusuportahan? Nagkaparinigan na sa mga post, na-block na ang mga friends, family, etc., nagkapalitan na ng masasakit na salita, silang mga pulitiko, may paki ba sa inyo?

‘Ika nga, okay lang magtalo pero ‘wag mag-aaway.

Magkakaiba tayo ng pananaw, karanasan at pinaniniwalaan sa pulitika, wala tayong karapatan na pilitin ang sinuman na sumang-ayon sa atin. Kung gusto mong makahikayat ng kakampi, galingan mo sa pagpapakilala sa iyong kandidato at hindi sa paninira ng iba.

Mahaba-haba ang panahon bago ang eleksyon, marami pang puwedeng magbago, pero sana, matapos ang lahat nang bati-bati pa rin tayo.