NCR plus, ibinaba na sa MECQ, utang na loob ‘wag nang pasaway

@Editorial | April 12, 2021

Ibinaba na sa modified enhanced community quarantine (MECQ) ang quarantine classification sa NCR plus o sa National Capital Region, Bulacan, Laguna, Cavite at Rizal simula ngayong araw, Abril 12 hanggang sa Abril 30.

Kasama rin sa nasa MECQ ang Santiago City sa Isabela, lalawigan ng Qurino at Abra.

Isinailalim naman sa general community quarantine (GCQ) ang mga lalawigan ng Cagayan, Isabela, Nueva Vizcaya, Batangas, Tacloban City, Iligan City, Davao City, Lanao del Sur at probinsya ng Quezon. Ang nasabing quarantine classification ay tatagal hanggang sa katapusan ng Abril.

Ang iba panig naman ng bansa ay nasa ilalim ng modified general community quarantine (MGCQ).

Kaugnay nito, ngayong araw naman tatalakayin ng Malacañang ang malinaw na kaibahan ng MECQ sa GCQ.

Anuman ang maging quarantine classification, magbago man ito kada linggo, ang hindi dapat nating makaligtaan ay ang patuloy na pagsunod sa health protocols laban sa COVID-19.

Kung isailalim man tayo sa mas mahigpit na lockdown o sa mas maluwag, hindi dapat nagbabago ang ating pag-iingat. Sa halip, mas dapat tayong maging responsable at disiplinado upang bumaba na ang kaso ng COVID-19. Sa pagiging kampante doon mas umaatake at kumakalat ang virus.

Tulungan nating maging epektibo ang mga panuntunan. Huwag nating sayangin ang mga araw na pare-pareho nating isinasakripisyo ang ating oras, trabaho at higit sa lahat ang buhay, lalo na ng ating magigiting na frontliners.

Quarantine pass, ginawa na ring raket sa NAIA?!!

@Editorial | August 29, 2020

Limang security personnel sa NAIA Terminal 3 ang inireklamo ng pangongotong ng isang banyaga.

Base sa impormasyon, noong Agosto 14 nang magmadaling pumasok ang isang foreigner sa nasabing terminal para habulin ang kanyang flight papuntang Malaysia.

Gayunman, hinarang umano siya ng isang security at iginiit na ipinatutupad nila ang ‘No Quarantine Pass, No Entry’ at agad umano itong humingi na lang ng ‘tip’.

Binigyan naman umano siya ng banyaga ng halagang P3, 000 at kasunod nito ay hinarang siya ng apat pang guwardiya na nanghingi rin daw ng lagay at binigyan naman daw sila ng P2, 000 para hindi na maabala.

Pero, nakansela ang biyahe ng biktima kaya nagawa nitong isumbong ang ginawa sa kanya ng limang security personnel.

Bagama’t, patuloy ang imbestigasyon sa nasabing reklamo, mga iba na tila hindi na nagulat sa ganitong raket na nangyayari sa airport. Ano pa ba raw ang hindi kayang gawin ng mga taong sagad na sa buto ang kawalanghiyaan? Tipong lahat na ng puwedeng pasuking raket ay ginagawa na nila kahit pa masama at magpapabagsak hindi lang sa kanilang sarili kundi sa lahi ng Pinoy.

Nakadidismaya na sa kabila ng dinaranas nating pandemya may ilan na nagagawa pa ring mangotong at manlamang ng kapwa. Mahiya naman kayo!