Posibleng pagsirit ng COVID-19 cases, dapat pa ring paghandaan

@Editorial | April 15, 2021

Agad na nilinaw ng Department of Health (DOH) na wala namang inaasahang pagsipa sa bilang ng COVID-19 cases sa Pilipinas sa kalagitnaan ng taon.

Ito ang reaksiyon ng ahensiya matapos sabihin ni vaccine czar Sec. Carlito Galvez, Jr. na may inaasahang “surge” ang pamahalaan pagdating ng Hunyo o Hulyo ng taon.

Ayon sa DOH, nagpapaalala lang umano ang opisyal sa mga hakbang na maaaring gawin ng bansa sakaling sumirit na naman ang kaso ng coronavirus.

Tiniyak naman ng gobyerno na ginagawa ang lahat ng paghahanda tulad ng pagpapalawig ng kapasidad sa mga ospital, dagdag na healthcare workers at gamit sa mga pagamutan sakaling magkaroon man ng surge.

Ginagawa umano ito ng gobyerno hindi lang para sa kasalukuyang sitwasyon kundi sa kahit anong posibleng mangyari dahil patuloy na kumakalat ang COVID-19.

Sa ngayon, wala pang pagtataya ang DOH sa posibleng bilang ng COVID-19 cases sa bansa pagdating ng Hunyo at Hulyo.

Para sa atin, sumirit man o hindi ang kaso ng COVID-19 sa kalagitnaan ng taon, wala tayong ibang dapat gawin kundi ang magpatuloy sa pagsunod sa mga health protocols.

Iwasan nating maging dahilan ng lalo pang pagkalat ng virus lalo na ngayong ibinaba ang quarantine classification.

Huwag naman sanang ito ang maging ugat ng grabeng pagtaas ng COVID-19 cases.

Pamimigay ng ayuda, problema pa rin

@Editorial | April 14, 2021

Bagama’t nagkabigayan na ng ayuda sa ibang lugar, meron pa ring hindi pa nakatatanggap at idinaraan na lang sa mga post sa social media ang pagpaparinig kay mayor.

Kaugnay nito, aminado naman ang mismong Department of Social Welfare and Development (DSWD) na naging mabagal talaga sa pagsisimula ng pamimigay ng tulong pinansiyal sa mga apektado ng lockdown sa NCR Plus.

Walong porsiyento lang umano ang kanilang naipamahagi nitong Abril 11. Katumbas ito ng 1.7 milyon sa 22.9 milyon beneficiaries sa NCR, Cavite, Laguna, Rizal at Bulacan.

Halos wala umanong ipinagkaiba sa pamamahagi ng ayuda noong nakaraang taon na naging mabagal sa simula pero, matapos ang apat haggang limang araw ay bumilis naman daw.

Bukod sa mabagal na pamimigay, problema rin ang palpak na listahan. Merong naalis ang ‘head of the family’, kaya kulang ang nailagay sa payroll. Kumakalat din ang post sa socmed na kahit patay na ay nasa masterlist pa rin.

‘Yung mga ganitong pagkakamali o problema ay hindi na sana naulit kung natuto lang sana sa mga nagdaang pamimigay ng ayuda.

Umaasa tayong sakaling makalusot ang Bayanihan 3, kung saan may inaasahang ayuda part 3 ay magiging maayos na ang sistema.

Huwag sana tayong masanay sa palpak na proseso. Walang masama kung gagayahin natin ang ginagawa ng ibang lugar lalo na kung ito’y mas epektibo at ligtas.

Samantala, nilinaw naman ng Department of Interior and Local Government (DILG) na pasok na rin ang period ng modified enhanced community quarantine (MECQ) sa cash aid na ibinibigay ng pamahalaan sa mga apektado ng enhanced community quarantine (ECQ) sa NCR Plus.

Ibig sabihin, wala nang aasahan na karagdagang ayuda ngayong MECQ.

Mas maluwag na lockdown, mas mahigpit na health protocols

@Editorial | April 13, 2021

Bago mag-modified enhanced community quarantine (MECQ), 14 na araw munang ibinalik sa ECQ ang NCR plus.

Kaugnay nito, batay sa ulat ng Philippine National Police (PNP), umabot sa 50,416 ang mga pasaway sa health protocols.

Nanguna sa mga paglabag ang hindi pagsusuot ng face shield na umabot sa 25, 752. Sinundan ng mga hindi naka-facemask na 13,467 ang bilang.

Nasa 4,611 naman ang lumabag sa physical distancing; 6,245 sa RA 1332 o Mandatory Reporting of Notifiable Disease at 341 naman sa mass gathering. Ang nanguna sa pinakamaraming quarantine violators ay sa Metro Manila.

Samantala, bagama’t ibinaba na sa MECQ ang NCR plus, tiniyak naman ng mga awtoridad na regular pa rin ang pagpapatrulya sa mga pampublikong lugar. Bantay-sarado pa rin ang mga palengke, terminal at iba pa.

Tulad ng una na nating sinabi, ang mas maluwag na lockdown ay hindi nangangahulugang dapat nang magpakampante, magliwaliw o magpasaway, kundi kailangang maging mas maingat at mas mahigpit sa pagpapatupad at pagsunod sa health protocols laban sa COVID-19.

Huwag tayong masanay sa lockdown dahil hindi na kakayanin ng ekonomiya, ‘ika nga, ligtas nga sa virus, patay naman sa gutom. Sa halip, masanay tayo sa pagsunod sa mga panuntunan, masanay tayo kung paano sasabayan itong pandemic na ‘to.