Benefits ng mga frontliners, tutukan

@Editorial | April 26, 2021

Ipinapanawagan sa Department of Health (DOH) ang mabilisang pagbibigay nang lahat ng mga benefits ng mga frontliners at sa kanilang mga pamilya.

Lalo na silang mga nawalan ng buhay sa harap ng laban kontra COVID-19.

Batid naman natin na araw-araw ay iniaalay ng mga frontliners ang kanilang buhay sa panganib alang-alang sa kanilang pamilya at kababayan.

Base sa datos ng DOH, hanggang noong Marso 26, 2021 kabuuang 15,662 health workers na ang tinamaan ng COVID-19, kung saan 82 rito ang nasawi.

Posibleng tumaas pa nang magkaroon ng surge, partikular na sa Metro Manila.

Sa umiiral na mga batas, makatatanggap ng 1 milyong piso ang pamilya ng isang health worker na binawian ng buhay habang nasa gitna ng trabaho, P100,000 kung sakaling magkasakit at mauwi ito sa kritikal na kondisyon habang P15,000 naman kung ito ay mild o moderate case.

Sa totoo lang, walang katumbas na halaga ang serbisyong ibinibigay nila at walang ring salita na sasapat para tayo makapagpasalamat.

Sana, lahat ng paraan na puwede nating maipabatid ang kanilang kahalagahan ay huwag nang ipagkait o patagalin pa.

Habang abala tayo sa pagbangon sa ating ekonomiya, bigyang-pansin din natin ang ating mga frontliners na literal na buwis-buhay sa gitna ng pandemya.

Huwag nating hintayin na tuluyan na silang mapagod at sumuko. Kung paano nila tayo inaalagaan at pinatatatag, ganundin sana tayo sa kanila.

Health and safety protocols sa community pantry, laging sundin

@Editorial | April 24, 2021

Patuloy na lumalaganap ang bayanihan sa pamamagitan ng community pantry.

Gayunman, hindi maiwasang may mga health and safety protocols na nalalabag na dahil sa kagustuhang makakuha ng tulong.

Una nang nahuli at pinagmulta ang ilang residente na pumila nang maaga, sila’y lumabag sa ipinatutupad na curfew. May mga sumusuway din sa social distancing, tila dedma na sa banta ng COVID-19.

Samantala, sa kabila ng inspirasyon na ibinibigay ng mga community pantries sa iba’t ibang panig ng bansa, nabahiran naman ito ng lungkot.

Sa hindi inaasahang pagkakataon, sa dapat sana’y masayang birthday treat ni Angel Locsin kahapon, isang senior citizen na pumila sa itinayong sariling community pantry ng aktres ang nasawi. Ayon sa opisyal ng barangay, unang nahimatay ang 67-anyos na lalaki at naisugod pa sa ospital, subalit idineklara nang dead-on-arrival.

Aminado rin si Locsin na kahit may tulong na mula sa barangay at kapulisan, hindi na talaga nakontrol ang mga tao, wala nang social distancing at lalo pang gumulo nang may mga sumingit na sa pila.

Nawa’y magsilbi itong paalala sa lahat, mula sa mga pumipila hanggang sa mga organizers na palaging panatilihin ang kaayusan at kaligtasan. Isa sa mga layunin ng community pantry ay maitawid ang pangunahing pangangailangan ng mamamayan, ‘yan ay ang pagkain. Pero, kung hindi ito magagawa sa maayos na paraan, baka sa halip na makatulong ay makadagdag pa sa problema.

Palaganapin ang totoong diwa ng bayanihan

@Editorial | April 23, 2021

Patuloy na lumalaganap ang konsepto ng “Community Pantry”.

Marami nang lugar sa Pilipinas pati sa ibang bansa ang na-inspire sa ‘Filipino bayanihan spirit’.

Masarap sa pakiramdam na makitang nagtutulungan ang bawat isa habang nasa gitna ng pandemya. Gayunman, ‘pag pumasok na ang pamumulitika at propaganda, hindi maiiwasan na mabahiran at pagsimulan na ng gulo.

Napag-alamang ang tinaguriang “community pantry” na ginawang popular sa isang barangay sa area ng UP ay pinangunahan umano ng mga aktibista.

Kaugnay nito, sinabi naman ng Department of the Interior and Local Government (DILG) na okay lang magtayo ng community pantries ang grupong Makakaliwa, upang makatulong sa mga nangangailangan, pero kung bibigyan umano ng kulay-pulitika, magmimistulang propaganda na lamang ito.

Hanggang sa ilang videos at photos ang naglabasan online, kung saan makikita sa ilang community pantry stations na may namimigay ng babasahin na tila paglaban umano sa gobyerno at may nagsasalita sa mikropono na kinukuwestiyon ang pamahalaan sa pagtugon sa pangangailangan ng bayan.

Hindi tuloy maiwasan ng ilang netizens na magtanong kung ano ba ang layunin ng mga itinayong community pantries? Tila inuudyok umano ang taumbayan na mag-alsa laban sa gobyerno, at hindi para tulungan ang isa’t isa.

Usap-usapan din ang mga epal na pulitiko na imbes makisawsaw sa isyu sa community pantry ay atupagin na lang kung paano maitatawid nang mabilis ang ayuda.

Sa totoo lang, napakaganda ng ideya at konsepto ng community pantry, pinalalaganap nito ang totoong bayanihan at pagtutulungan. Huwag sanang babuyin, ‘wag haluan ng pamumulitika at propaganda, na walang ibang maidudulot kundi gulo.

Kung gusto nating tumulong, tumulong tayo nang tapat at walang hinihinging kapalit.